الفصليه زهره

الفصليه زهره ١ ٢ ٣

الفصليه زهره ١
زينب الموسوي
الفصليه جريمه ترتكب من عشرات السنين بحق الفتيات وطريقه للاغتصاب والغصب تحت ستار العرف العشائري بالفتره الاخيره اغلب كروبات القصص الخياليه تنشر قصه لفصليه وتصور الفصليه شي رومانسي جميل والي ياخذها يدخل بملابس عربيه وملامح رجوله بحيث تحبه من اول نظره ويحچي وياها بمنتهى الادب والرقه بحيث گامت الكثير من البنات تتمنى تعيش هاي التجربه ولاني اعيش بعيده عن العراق لكن روحي في بلدي اتصلت بشيخ من احبابنا وطلبت منه يعرفني على فتاة فصليه وتحچيلي كيف وجدت حياتها كفصليه هل التقت بالحب والرومانسيه اخذ الموضوع فتره الى ان عرفني بنت اسمها زهره فكانت الحقيقه صادمه لي وستكون صادمه لكم اذا قراتم بقيه القصص في كروبات الاخرى زهره تروي قصتها
اسمي زهره كان عمري ١٧سنه من منطقه جنوبيه ابوي حينها عسكري متقاعد وامي ربه بيت اخواتي خمسه كلهن متزوجات واخواني تلاثه محمد وحسين ويوسف واني اخر فرد بالعائله اخواني اثنينهم شرطه واخوي يوسف الله رزقه بوجه حلو بس اخذ منه الاخلاق ودائما مشاكل وعرك بالشارع واخواني مبتلين بيه اخواني متزوجين بنات عمهم ويوسف تارك الدراسه كنت ناجحه للسادس اعدادي كانت بمدرستنا بنيه حلوه بس كل البنات تكرها ومتمشي وياها ومن اسال ليش يگولون سمعتها مو زينه هي كانت تختلف عنا تلاسن المدرسات وترد عليهن تتعارك وتضرب البنات
اول متدخل المدرسه تذب الحجاب احنا اغلبنا نبقى بيه لان دراسه منلحك نمشط بصراحه مو كلنا بس اغلبنا
اخوي يوسف كان يوميه يوصلني للمدرسه فد يوم هاي البنيه سحر اسمها شافت يوسف بالفرصه حچت وياي
اگلچ هذا الي يوصلچ الصبح اخوچ لو صاحبچ
صاحبي شنو اخوي والبنات كلهن يعرفنه اخوي
اذا البنات كلهن يعرفنه عرفيني عليه شبيچ
كانت صديقتي خديجه يمي جاوبتها
اكلچ تريدين تتعرفين عليه روحي اله يشتغل بمحل كماليات بالسوگ اسالي وين كماليات يوسف وروحي
بمرور الوقت عرفت يوسف وسحر عدهم علاقه وماادري شلون صارت بس كنت اسمعه وهو يتصل بيها ومره انطاني اغراض گلي وصليها لسحر البارحه اشترتهن ونست تاخذهن
اگلك يوسف ترى سحر عدها علاقات وسمعتها مو زينه
وانتي منين عرفتي هي موزينه
البنات تحجي عليها
شوفي اذا عرفت تمشين وياها لو تحجين وياها ادفنچ وانتي عايشه
اني احجي وياها شنو هاي الزباله وهاك اغراضك وديها انت الها احسن
جيبي وابد لاتحجين وياها
اخوي يوسف مكانت سمعته احسن من سمعة سحر وهواي ولد ميريدون يمشوون وياه بس احنا بمجتمع يغظ النظر عن تصرفات الشاب وينظر بالمكبره لتصرفات الشابه

توافقوني الراي   ؟

الفصليه زهره ٢
زينب الموسوي
بقت علاقه سحر ويوسف وصديقاتي كلهن يعرفن ويگولن
البارحه شفنه اخوچ وسحر يتمشوون سوا بعد المدرسه
زين هاي اخوانها ميدرون بيها ميسمعون حجي الناس
اصلا اخوانها ولد مستورين بس ميدرون بسوالفها
خوش مستورين واختهم صايره تكسي
استغفر الله احنا شعلينه
فد يوم كانت مناسبه دينيه واكثر البيوت تفرغ اخواني طلعوا قبلنا همه وزوجاتهم واطفالهم واني وامي بعدهم بتلث ايام يوسف ماراح ظل بالبيت وابوي هم بقى الشوارع تفرغ بهاي المناسبه والبيوت ميبقى احد تقريبا طولت روحتنا تسع ايام رجعنا للمدارس مر اسبوع سحر مداوم ويوسف اسمعه يغلط عليها من يجاوبها مره سمعته يگلها
اتزوجج انتي شكالو لج سطل اني ماافتهم عمي روحي شوفي حل لمصيبتچ اني مالي علاقه شمدريني كم واحد مدخلته لبيت اهلچ قبلي  بعد مرور فتره عرفنا سحر بطلت واجتي امتحانات نص السنه وهي متداوم فد يوم گعدنا الصبح يوسف كان يحضر جنطته سالته امي
وين رايح الله وياك
رايح لبغداد حصلت شغل هناك
يمه بغداد شماخذك انفجارات وخطف وكتل
هاي الناس عايشه وتشتغل وهنا ابو المحل يريد ابنه يوكف بيه لاتعرضيلي
راح يوسف بعدها فتره اندگت الباب الصبح فتحت امي سحر وگايله لامي اني صديقه زهره واريد احجي وياج بشغله
اني شفتها امي حجت وياي هاي صديقتچ شنو هذا المكياج الي مخليته
يمه مو صديقتي كانت بالاعداديه وصاحبة يوسف اكيد جايه تسال عليه
دخلت ويه امي لغرفه الخطار دخلت ماي شفت سحر تبچي وامي صاحت عليه اطلعي منا
طلعت البنيه وامي استلمتني تدرين بيوسف وياها من شوكت
يمه من بدايه السنه وماگلت لان يوسف يوميه وحده
وهي هم يوميه واحد
واني شمدريني بيها البنات يحجون عليها
من هاي اخوچ انهزم لبغداد
دخلت امي گعدت ابوي وظلوا يسولفون وبدت الاجتماعات بالبيت بس اني مااعرف شكو وكل مااسال معليچ انتي لاتددخلين
بعد يومين عرفت التفاصيل من مرت اخوي
يوسف مسوي علاقه ويه سحر من بيتهم كان اهلها تاركين البيت
يعني شلون علاقه
ولچ يعني طياح حظ افتهمتي
عزا العزاك يوسف وهاي سحر الدايحه هسه لازم يتزوجها مو
امچ وابوچ هيچ يكولون بس من خابروا يوسف ماقبل
بكيفه ميقبل اذا گالت لاهلها يذبحوه ويذبحوها
يوسف يگول مچانت بنيه اصلا وتريد تضحك عليه وتتزوجه حتى تستر سالفتها
هاشنو يمه عزا بعينها وعين يوسف هاي تاليت سوالفه المكسره
ولچ المشكله ابن عمها جاي خاطبها وهي تخاف تنفضح
عفيه كافي شنو هاي اذا ابن عمها رايدها مراح ينطوها ليوسف نسيتي سمعته زفت واكيد ينطوها لابن عمها وتنفضح
والله ماادري هي تكول انهزم عدكم ويوسف يتزوجني ويمشي على اهلي وعمامي بعدين
والله مخططه بنت.ال
وفعلا يوسف انهزم  من بغداد لاربيل