الفصليه زهره

الفصلبه زهره ٩١٠

الفصليه زهره ٩
زينب الموسوي
ظليت محتاره وادور بالتلفون  ارقام اهله لگيت رقم ابوه اتصلت بيه
عمي الله يساعدك الولد شخبارهم حسام وسام بوحداتهم لو بالبيت
والله عمي حسام بالبيت بس وسام من البارحه ممحصله
عمي جا وين راح الدنيا مكلوبه وتكريت داخليها داعش والجيش مسحوب
شكلچ عمي امه راح تتخبل وحسام ضرب راسه بالحايط 
والچاره شلون
باچر نروح للمناطق القريبه من تكريت حتى لو بغداد بلكي نحصل خبر
عمي خابروا اصدقاىه عندي ارقامهم  تلفونه عندي
ودي ارقامهم
عمي مااعرفهم راح امي تجيبني واجي
بتي بساع تعاي
جايه عمي
وصلتني امي وراحت دگيت الباب فتحه حسام وين التلفون زهره
انطيت التلفون بدوا يدورون التلفونات اصدقاىه كلها لو مغلق لو مو وياه بالوحده لحد بالعشره. حصلوا تلفون الامر سالوه كلهم مدام صار يومين مسامعين اخباره يعني عند الدواعش وكل الي اسروهم ذبوا تلفوناتهم لو اخذوها الدواعش
من سمعنا الخبر كل واحد اخذ زاويه بالبيت وظل يبجي وسام كان طيب وحنون ويه الكل حتى اخواته من كان يقسي عليهن يرجع ورا ساعه يصالحهن ومن يرجع للبيت لكل واحد جايب حاجه كان حسام اكثر واحد متاثر وكل شويه يكول
بويه وسام راح مثل قاسم راح واني كاسر ايده ومحروگ كلبه مني
ابو حسام انت الحقد عمى گلبك حتى على اخوك ادري الي صار مو شويه دم وعار بس انت انتقمت من ناس مالها ذنب لاتزوجت زهره ولا خليت اخوك يتزوجها
بويه انت چنت تدري بيه جان يريد زهره
گالي من يوم الي تزوجت حوراء وكتله خلي يطلگها واودي ناس تخطبها الك
بويه گلي هسه شسوي منين اجيب اخوي بويه الاخبار يكولون انذبحوا بسبايكر والامر يكول عد داعش
يطلع الصبح ونروح ابغداد نسال عنه
هسه اروح اني ماانتظر الصبح ابات بالكراج ولج زهره ادعي وسام عدل انتي مظلومه الله يستجاب منج
ياربي يطلع عايش
ولج زهره اخر كلمه طلبها مني اطلكج  زهره انتي طالگ روحي لاهلچ. واذا رجع وسام اني اجي لاهلچ مشاي واخطبچ اله روحي لاهلچ بس لاتشورين بيا وشارتج تطلع باخوي بس هالاخوه عندي بهالدنيا
اسم الله عليه وماروح لاهلي انتظر وسام يرجع ويوصلني لاهلي
ظلينا بين بچي وتلفونات للصبح الفجر طلع عمي وحسام
والله بيومها ولا واحد بينا عرف الفراش ونام  سبايكر مو بس اخذت شباب هجمت بيوت وعوائل كنت اشوف امه ضهره محني من تكوم
واخواته كل وحده لازمه قران وتدعي
يارب ترجعه بالسلامه
الفصليه زهره ١٠
زينب الموسوي
مرت الساعات اتصلنا بعمي گال ماكو خبر وحدات الجيش منسحبه واحد ميدري بالثاني مابقى غير الدعاء والصلاه بعد مارجعوا بدون خبر امهم گطعت حتى المي وكل شويه تريد تطلع ويلزموها وهدومه شكتهن ظلينا تلث ايام والله حتى الاكل نحسه مر وبكل دكه باب نتامل فرج والفضائيات ماترحم باخبارها  اني والبنات دخلنا امهم للحمام نسبحها لان بدت تفقد الوعي اندگت الباب الغروب اسمع حسام يگله تفضل تفضل حياك الله يمه طارش من وسام نسينا نفسنا كلنا طلعنا من ااحمام وركض على الابواب وگفنا نسمع
اخوي وياه ابنكم عند مره حاميتهم بتكريت منتظرين فرصه ويطلعون
وليش ماخابرنا وين تلفونه
شامر تلفونه بالسيطره حتى ميعرفونه عسكري لان الاسماء كلها الضابط والعريف تخلص منه وماحافظ ارقامكم  واخوي خابر علينا حاجاني وسام انطاني العنوان للبيت ومنتظركم تتصلون بيه على تلفون اخوي اول واحد اخذ التلفون حسام ومانسمع غير البجي خويه خويه صار صياحنا وبچينا وشفت امهم تحضني بدون وعي وتبجي واني ابجي
بتلك اللحظه ادركت ان رغم قساوة بعض الناس تگدر تسامحهم وتتخلى عن كرهك بلحظة فرح كنت اريد ابقى بالبيت وانتظر اشوف وسام بس محد يضمن الشوق واللهفه ممكن تخليني اتصرف بلا وعي كدام اهله فگلت لحسام وصلني لاهلي وصلني سالته
بعدك حاقد عليه وعلى اهلي
عليچ لا بس حاقد على اهلچ وحتى لو صرتي مرت اخوي يوم الي الزم يوسف محد يكتله غيري
انشاالله ربنا ياخذ حقكم منه بدون متتروط بدم صح هو اخويه بس عملته دنكت روسنا وروسكم ترى مو بس البنيه تجيب العار لاهلها الولد همين
الله موجود ولاتدعين عليا واهلچ لايخربونج على وسام وترفضيه
خلي يرجع سالم واني اله لو اعرف اهلي يربطوني بحبال
روحي الله وياج
حجيت لاهلي كلشي وكدام اخواني
ابوي گال اذا تقدملح الناس شتكول تزوجت اخو طليقها يعني جانت تحبه
محمد الناس تحجي وتسكت والي يريد يفتهم براحته والي مايفتهم براحته بويه تگلك حاميها حتى من اخوه هو احنا اخوانها ولد عمها تخلينا عنها وانطيناها فصليه حتى نحمي ارواحنا
بعد سبع ايام رجع وسام واتصل بيه
شلونج زهره
هلا يابعد اهلي وناسي شلونك وسام
مشتاقلج تصورت اول ماادخل البيت اشوفچ واكفه بالمطبخ مثل كل مره
اجي هسه واكف بالمطبخ لعيونك
انتي ماصدكتي تخلصين من سجن اهلي تريدين ترجعين اله
ارجع للسجن مدام انت بيه

حچيتي ويه اهلچ
حچيت بس ابوي معارض شويه خلي ننطيه وقت
انتظرج عمري كله بس وعديني لااهلج ولاعمامج يغيروج
ولا الدنيا كلها تغيرني لو انت لو ابقى بدون زواج طول عمري

بعد سنه من هذي المكالمه تقدم لخطوبتي وسام عن طريق شيخ عشيرتنا اهله ماحضروا والدي ماحضر المشيه اخواني اثنينهم  انطوني للشيخ وبقيت بيته ليوم زواجنا الي سافرنا بيه للامام الكاظم وبقينا عايشين بغداد  لحد لحظة كتابه القصه اني وسام   نروح لاهله وازورهم. وحسام وزوجته يزورونه لكن ولا واحد منهم يزور اهلي حتى وسام ميدخل بيتنا رغم صار سنتين متزوجين احاول اقرب بينه وبين اهلي لكن الجرح كبير انشاالله يجي يوم وتتصافى الگلوب كل مااروح لاهلي احاول اقربهم واتمنى تدعولي انجح بيوم واشوفهم مجموعين بيتي اهلي وعيالي وننسى الماضي

هاي حقيقة الفصليه تختلف كليا عن القصص الي تقروها ان الرجل يحبها ويحترمها من اول نظره وهي تذوب بيه وتعيش قصه حب وغرام خلف ابواب غرفتها الفصليه ياساده ياكرام انوجدت لاذلال العشيره عن طريق بتهم للتنكيل والاذلال وعندما تاتي كاتبه تسطر قصص الحب والغرام الي تعيشه الفصليه دليل على ان هذي الكاتبه جاهله وليس لديها معرفه باحوال المجتمع والدين كل ماتملك قلم تثير به الغرائز لتحصل على كم تعليق ولايك متناسيه انها تكتب عن جريمه بحق المراه والدين والمجتمع وهناك حالات تنتهي بانتحار الفصليه سوف ارويها لكم في الايام المقبله واوجه كلامي لكاتبات القصص وكتابها اذكرهم بقول لاحد الائمه المعصومين من احب عمل قوم حشر معهم يعني من تشجعين على الفصليه بكتابه قصه راح تشاركين بظلمها وتنحشرين مع الي ظلمها خلي قلمچ لنصرتها ومنع هذي الجريمه الي انهى عنها الدين والقانون
شكرا للمتابعه