بسأل نفسي كتير هي ايه الفايدة الحقيقية من إن الست تحقق ذاتها ويكون ليها كاريير مع إن ده شيء مرهق جداً جداً مش بالساهل يعني انه يتحقق خصوصاً إننا في مجتمع بيحط على الست كل المهام والمسؤوليات سواء كانت بطولها أو زوجه وأم لأطفال في مراحل عمريه مختلفه ...
الست دايماً خيرها لغيرها واللي فـ ايدها مش ليها بتتعب وتشقى وتجيب فلوس وتعمل لنفسها مكانة في المجتمع وبتفضل بردو من جواها ست محتاجة اللي يطبطب عليها ويحتويها ويقولها انتي تعبتي خلاص كده كفاية عليكي ارتاحي من الجري ورا نفسك شوية وحاولي تعيشي حياتك
بس ده طبعاً احلام يقظه فـ مجتمع شايف إن الست سوبر هيرو سواء كانت قاعده فـ البيت أو بتشتغل هي لازم تحل كل المشاكل المادية والمعنوية والسخان اللي باظ والحنفيه اللي بتنقط والتكييف اللي صوته عِلي فجأة ومش عارفين ايه السبب !!
الست مشكلتها انها ريحت كل اللي حواليها على حسابها ، ونسيت انها بني آدم ليه حقوق لازم ياخدها ويستمتع بيها
احنا كـ ستات اللي صنعنا المشكلة اللي معظمنا فيها بلاش تبقى شهيده الواجب وتعملي نفسك فاهمه فـ كل حاجه اتعلمي تقولي : لأ لما تبقي مش قادره تعملي حاجه او مش عارفه تتصرفي مش عيب انتي مش إنسان آلي متبرمج بالكمبيوتر وعارف كل حاجه ولا جوجل بردو علشان تعرفي كل حاجه ده حتى جوجل ساعات مبنوصلش فيه لحاجه 😊.
* متنسيش نفسك ، علشان بعد كده مش هتعرفي تلاقيها !
