leS noir Couples

الحلقة04

الحلقة 4 
قامت ال10 متع الصباح راسها يوجع فيها .. استوعبت لي صار و تذكرت هي فين..قامت بقات دور في البيت بعد دخلت دوشت و لبست مريول و سروال متعرش متع شكون لقاتهم محطوطين عالفرش ..و بعد تردد حلت الباب و هبطت...  عرضتها مرى في دروج كانت تلم في الحوسة متع سهرية البارح تبسمتلها  -صباح النور..انت بنت اخت المدام موش هكا عملتلها براسها اي  -صباح الفل.. قلي مهدي محبيتش ندخل نفيقك ايجا معايا نحطلك تفطر  قعدت تفطر و تحكي مع نجلة مرى تخدم غادي عندها سنين .. بحكم هي كانت صندوق الاسرار متع مدام الهام كانت تعرف ميرال و تسمع بيها -كلمني البارح مهدي في اخر الليل قلي ايجا رغملي كونجي متاعي اما كيف عرفت لي انت في الدار محبيتش نخليك وحدك وزيد الجماعة الكل مسافرين.. والله مدام الهام بش تفرح برشا كي تشوفك كانت ديما تخمم فيك..  نبسمت ميرال و مجاوبتهاش اما حست روحها فرحت واطمانت -امك و خالتك كانو كالتوامة ميتفارقوش اما الله غالب الدنيا فرقتهم .. كل حد مشى في شيرة و كل حد تلهى في حياتو.. -سامحني اما منين تعرف هذا الكل .. تعرفها امي! -لا اما نعرف..نعرف كل شي.. احسبني خالتك الثانية لهنا ..  تبسمتلها ميرال وبقات ساكتة..  كملت فطرت و جات طالعة للبيت لي باتت فيها و يعرضها مهدي في دروج هابط يلبس في مريولو و دايخ بالنوم..  -صباح لخير.. -صباح لخير رقدت بالباهي عملتلو براسها اي  -هي باه..  كمل لبس مريولو و هبط و خلاها .. طلعت للبيت و سكرت الباب و ترمات عالفرش و تفلقت بالبكاء كانت ضايعة موش عارفة شبش يصير موش عارفة اللي عملتو صحيح ولا غالط .. كانت خايفة لا خالتها تزيد تتخلى عليها و تظطر انها تختار بين الشارع ولا رجوعها لبلادها و عذابها ..  قعدت نهار كامل تستنى لين هزها النوم .. حلت عينها تلقى الهام تخزرلها و تتبسم .. قامت مفجوعة بعد وقفت سلمت عليها قربتها ليها مدام الهام و عنقتها و بقات تخزرلها  -مشاء الله كبرت في ظرف ثلاث سنين تبدلت عليا .. مرحبا بيك  بعد دخل سي يوسف سلم عليها و فرح بيها و خرج.. قعدت هي وخالتها يحكيو  ..  الهام كانت متأكدة انو جايانها موش بالساهل و انو وراه حاجة كبيرة .. لكنها محبتش تلزلها..  تلمو العايلة تعشاو تعرفت ميرال على ولد خالتها الصغير ريان فيسع دخل معاها في الجو و ولاو يفدلكو و يحكيو..   في اخر السهرية قعدت مع خالتها و بعد تردد كبير حكاتلها ع كل شيء بالباء و التاء .. حكاتلها ع التمرميد لي ذوقهولها بوها و مرت بوها عالحرمان و الضرب و السب لي تاكل فيه .. حكاتلها كيفاش و علاش حرمها من قرايتها السنة كارهة راي دخلت باك كيف اندادها .. واخيرا حكاتلها ع هروبها نهار كتبان صداقها.. هروبها مالجحيم لي كانت فيه.. كانت تحكي و تبكي و الهام تسمع فيها مصدومة.. كانت تخزرلها كأنها تشوف في اختها ورثت عليها الشعر لرطب العينين الزرق واللي فيهم بريق يسحر ورثت عليها بيوضيتها و الرقة و الفيناس في حركاتها و طريقة كلامها.. -مكارنيش خليتك نهارتها كارني جبتك معايا نشاء الله حتى بالغصب.. يزي عيش بنتي معاش تبكي.. نوعدك لي عشتو معاش بش يتكرر احسن معملت انك هربت و متخافش بش ناقف معاك و موش بش نخليك  -خزرتلها ميرال و عينها تملات دموع و زادت ترشقت بالبكاء و ترمات في حضنها..  قعدت تبكي و تبكي لين دموعها نشفت...   -معاش نحبك تبكي نحبك تنسى كل شيء من ليوم بش تبدى حياة جديدة معايا تفاهمنا..  -جيتك نحبك دبرلي خدمة و انا نجم بعد نعمل ع روحي نوعدك موش بش نكون حمل ثقيل.. -ميرال شنوا لكلام لي تحكي فيه راك بنت الغالية.. و من ليوم انت في مقام بنتي..