البارت ١٣
.....................
ريسان: حجي
ارتبكت من دخل ريسان
رغم الوضع عادي بس خجلت من ابني
مااكدر ابعدها ولا اكدر اعوفها
ضياء: تعال ريسان
يباوع ريسان ومقهور عليها وتفهم الوضع
ريسان: الله يرحمه ويجعل مثواه
هدئت وهي بحضني
تمنيت بلحظتها اشبكها
ابتعدت وكمت حسيت اني سخيف استغل ضعفها
ليش هيج اتخيل نفسي
هدئت ونامت بسريرها وتأشر على صوتها
ضياء: اطمأني مؤقت هذا صوتج لان تعبانه ومن الصدمه لازم تصيرين قويه حتى تحجين واطلعين عمج سامر وبيبيتج محتاجيج
تهز براسها وتبجي
بقت لازمه أيدي ونامت
ماتحملت عفتها وطلعت بره
ريسان: روح للبيت انت تعبت
ضياء: روح لاخواتك انتظر ام ضي وارجع للبيت اسلم الامانه
ريسان: ماشي
بقيت وحدي كاعد واجه حامد ألي
دخلت لغرفتها نايمه مثل الملائكه
اباوعلها حلوه بشرتها شفافه
تقربتلها على كيفي
بدون وعي خليت أصابيعي على بشرتها
تلمستها اخذت نفس قوي
ناعم حيل ناعم ذوبني ورقيقه
سحبت نفسي بسرعه ورجعت كعدت بمكاني
احس صرت مراهق بسبب ضي
بشبابي ماسويت هذا الشي
وشوي ودخلت مره للغرفه وحامد وياها
حامد: ام ضي
ضياء: اهلا وسهلا
ام ضي: اهلا بيك يمه بنتي شبيها
ضياء: عوفيها نايمه خلينا بره نحجي
طلعتها بره
ضياء: اكيد سمعتي وفهمتي من حامد
ام ضي: من يومه ابوها حقير بس ماتوقعت يأذي بنته
ضياء: اذا تعرفين الابو حقير ليش تركتيها ضي اهم من نفسج انتي ام هذه امانه عيشي حياتج بس بنتج وياج شلون عايشه وتشتمين الهوى وماتعرفين شي عن بنتج
ام ضي: مااسمحلك تجاوز وياي انت منو
حامد: ام ضي انتبهي على كلامج
ضياء: حامد لاتدخل
حامد: اسف
ام ضي: وين عماتها
ضياء: محد يقبل يجي يمها المسكينه ماالها احد غيرج
ام ضي: يصير اطلعها مااكدر ابات هنا
ضياء: باتي وياها اليله ويسجلون خروج الج بلكه باجر
ام ضي: لاعفيه عندي دوام
ضياء: الله اكبر بنتج مريضه وطلعت من موت وتفكرين بدوام
ام ضي: اني اخذ بنتي لبيتي وهناك اهتم بيها
ضياء: ماشي اساعدج واحاول اطلعها الج
ام ضي: ياريت
اشوفها طلعت موبايلها وخابرت
ام ضي: ها حسن راح نطلعها انزلي
ام ضي: ماشي
سدته اباوعلها شابه حلوه مو جبيره وضي تشبها
ضياء: حامد كمللهم اجرأتهم
حامد: ماشي
ام ضي: انت شتقربلهم
ضياء: ضي ماتنطق من الصدمه ماتكدر تنطق ونفسيتها زفت ديربالج عليها
ام ضي: توصيني على بنتي
شكد كرهت كلامها وين جانت هسه دكول بنتي
كون هلمره تحس بمسئولية ضي
ام ضي: ادخل اشوفها خطيه
بقيت بره كاعد وشوي واجه رجال ويخابر
اسمعه يكول هاي الغرفه
ودخل لغرفة ضي عرفته زوج ام ضي
دخلوا للغرفه واسمع ضي تبجي وتصرخ
موتتني هلبنيه
بعدها اسم ام ضي تصيح الممرضه وخايفه
ضياء: شكو
ام ضي: تخربطت ضي
*****************
ضي
بعد ماحضنته ارتاحيت راحه تامه
امان بحضنه وعطره طيب
بي ريحة محنه وحنان حضن غريب
ماكدرت اوخر منا بقيت بحضنه ابجي وارتاحيت بحضنه
مابعدت عنه الى ان هدئني
ابنه ريسان وياه يسولفون وياي الى ان نومني
غفيت واني لازمه أيده
ماكعدت اله ووحده تبوسني بخدي
فتحت عيوني
اشتم رويحت جنتي
اي هذه هيه رغم قليل شامه ريحتها بس هيه
اعرف ريحتها امي هذه
امي الي ماشالتني ولاربتني ولاسهرت عليه ولا مسحت دمعتي
هذه امي الي ماتعرف هموم بتها وماتحس بألمها واشواقها الها
امي جنتي هذه أمي
فتحت عيني وشفتها كدامي تبوسني
ام ضي: ضياوي حبيبتي
شبكتها واني نايمه وكمت ابجي
بشهكه والم ابجي
حاضنتها مثل المخبله مااريدها تروح
مااريد تعوفني
اريد انطقها الها ومااكدر
هل ياترى تحس بداخلي وتفهم اني محتاجتها
هل ياترى امي ماتتركني هلمره وتتخلى عني
تهدئني وتسكتني
اني اباوعلها فرحانه بيها
...........(تذكر تذكر تذكر تذكر)
بزواجي من نوح
بداية زواجي بليل نوح نايم يمي
نوح: ضي
ضي: ها
نوح: شكد طيبه انتي
ضي: انت الاطيب
نوح: ضي ديري وجهج اريد احجي وياج
ضي: شنو
نوح: تدرين ليش طيبه
ضي: ليش
نوح: اعرف تحبيني وتتمنين تعيشين وياي بسعاده حالج حال البنات بس مستحيه مني ومن مرضج وجاي تصرفين وياي بكل برود حتى انفرج ومااتعلق بيج لو بنيه غيرج تسودني وتخليني اتعلق بيها وانعل ابو المرض
ضي: تصبح على خير
نوح: لحظه بعدني ماكملت كلامي
ضي: نوح كل كلامك خطأ
نوح: ليش ماتحاولين تتقربيلي وتبعدين
ضي: احنه متفقين فتره ونطلك
نوح: تدرين لو عندي اسفرج واسويلج عمليه ونعيش سوه بس ااااااخ
ضي: مااريد اني راضيه بأمر ربي
نوح: كلشي الدنيا بلفلوس انتي ماتتفوتين ضي تدرين اني تعبان من حظي ااااخ اخ ضي بسببج من اشوفج شكد افرح وشكد اختنك بنفس الوقت
ضي: ليش
نوح: افرح اشوف بسمتج وطيبتج واختنك من اذكر مرضج ااخ ضي لو مو مريضه انتي ماكو مره مثلج
عفته والتفتت
دمعتي نزلت انقهر عليه لان حقه خطيه
واستحيت من نفسي
وضجت ليش هيج يجرحني بدون مايقصد
وفرحت لان يشكيلي همومه
وحبيت حبه واعجابه بيه
اووووف ربي ليش هيج حياتي معقوله ضاملي شي
ثاني يوم اتصلت على امي
ضي: الو سلام عليكم
ماما: وعليكم السلام ضي
ضي: اي ماما اني ضي
ماما: هلاو ياماما شلونج ليش ماتسألين تخابرين
ضي: انتي الي ماتتصلين حتى زواجي ماحظرتي
ماما:والله ياماما لان بيت جدج مااكدر
ضي: ماشي ماما
ماما: شلونه زوجج وياج سولفيلي شخبارج
ضي: زين بخير بس مشكله عندي ومخنوكه مااكدر اسولف لاحد بس انتي
ماما: شنو
كمت ابجي وياها
ماما: شبيج ضي يأذيج زوجج
ضي: لابلعكس ماما نوح مايتمكن لو عنده مايقصر وياي
ماما: شنو يعني محتاجه فلوس
ضي: لا
ماما: شنو
ضي: ماما اريد ابيع ذهبي وهوه من عنده كم فلس وساعديني بمبلغ واسوي عمليه
ماما: ياعمليه
ضي: ماما لصدري
ماما: ليش ضي تزوجتي وانتي مامسويه عمليه لعد ابوج الحقير ماكدر يخسر عليج من يومه نذل
ضي: ماما استحي من نوح بجسمي هذا وخطيه هوه شنو ذنبه واتمنى اعيش مثل البنات
احجي وابجي وياها
رغم زعلت من كلامها ماتعرف اني مسويه عمليه لا
ماما: لاتستحين من شي وازوج وهوه قبل بحالج ياماما ابد لاتغيرين نفسج لخاطر رجال
حسيتها تتهرب مني
غلقت الخط
حضنت مخدتي وكمت ابجي الوحيده الي تحس وتتحمل همومي ومشاكلي
............................... (رجعت من الذاكره)
للحكايا بقايا
