#قصة نور
#ليوثي المياحي و مرتضى الجنوبي
قصه حقيقيه... من الواقع العراقي
#تنويه:_تم تغيير اسماء الاشخاص والمناطق ...
&&&&&&&&&&&&&&
ورة ما ظهرت حقيقه كتل سعاد .. والله اخذ بثارهه ... والناس عرفت شلون انكتلت وهيه بريئه ... كل ذنبهه انو جانت عايشه وي ناس متخلفه وما تعرف ربهه ... بقت امهه بحزنهه وبضيمهه .. وقهرهه ع بتهه الوحيدة سعاد ..اخذت جهال سعاد يمهه وكامت تربيهم .. رغم العوز والفقر اللي عايشين بيه...
بعد ما عرفت حقيقه المسكينه سعاد .. حسيت براحه ... بداخلي .. وراحت الخوفه اللي جانت لازمتني ... جانت كل سيارة تمر من يمي اكوم اتلفت يمنه ويسرة واختل من يمهه ... لو ارجع ركض للبيت...
صديقي محمد ساكن بمحافظة الناصريه... كلت فرصه هم اروح ازورة وهم اتصيد سمج.. لان اني هواي احب الصيد ... بدلت ملابسي وخليتلي جم هدمه بالجنطه ... ومشيت للكراج... صعدت بالسيارة... وبالشفعات ياله قبطت... مشت بينه السيارة .. لحد موصلنه الناصريه .. ومناك ركبت سيارة ثانيه لهوار الجبايش .. جنت كلش احب الصيد... وخصوصا من تكعد بالمشحوف وتدندل رجليك بالمي ويدغدغ بيهن السمج الزغار...
وصلت لحد بيت محمد ... لكيته واكف بالباب من شافني اجه يركض عليه ... ويرحب بيه ...وضل يحضن بيه ...ويسئلني عن احوالي واحوال القريه.. صديقي محمد جان وياي بالقريه... وضروفهم جانت كلش صعبه ... اضطرو يبيعون بيتهم ومزرعتهم ... ويشيلون للناصريه... صار اكثر من سنه ماشايفه... دخلني ابيتهم جان كلش بسيط .. كعدنه وضليه نذكر ايام زمان ... كالي اليوم عازمك ع السمج المشوي وانته راح اتصيدة ... كيفت كتله اي اموت على صيد السمج... طلعنه رحنه للهور مال الجبايش ... نزل المشحوف للهور وصعدت براس المشحوف ومحمد صعد بالنهايه وجاب وياه العدة مالت الصيد ... والشبج... وعصا طويله يسوك بيهه المشحوف ...مشينه بنص الهور شمرنه الشبجه بالمي وتانينه دقايق وسحبناهه... طلعت بيهه 3 سمجات ... ضحك محمد... وكال هاي خوش صيدة ... كتله وين اكو هاي يسموهه صيدت الفكر.... ضحكنه واخذنه السمجات ... حتى نشويهن ونتغدة بيهن.. نزلنه بيابسه يم حافه الهور .. ولمينه حطبات وشعلنه نار ... محمد لزم السمجات ونضفهن وخليناهن ع النار ....
واحنه دا نتغدة جابتنه السوالف ع الصيد واحواله والعيشه بالهور...وجانت هاي الطيور النوارس تحوم فوك روسنه عسى نعوفلهه فتفوته من غدانه ..ونوبات اشوفهه تصعد ليفوك وتنزل نكس ع راسهه تغوص بالمي ... وتطلع صايدتلهه سمجه لو عكروكه....
محمد كالي ... شكد مكيف بجيتك اليوم... صدك اشتاقيتلك هواي ...كتله هم صادفتك مشاكل بالعيشه هناي بالهور... كال لا ماكو مشاكل .. العيشه هنا بسيطه وبنفس الوكت صعبه... اسولفلك حادثه صارت ...
بيوم جنت ستوني رايح الصيد.. جان بوكت الربيع وجان الصيد كلش زين ... طلعت بالسته الصبح جان الجو بيه مسحه مالت ضباب وكلما تقربت ع الهور يزيد الضباب ... صعدت بالمجحوف مالتي وكمت ادفع بيه بالعصا لحد موصلت بنص الهور ... فليت شبجتي ورتبتهه وستوني اريد ارميهه باوعت اكو شي اسود... يبعد تقريب عشرة امتار او اكثر ضليت اخمن ويه روحي... احتمال سمجه جبيرة ... لا لا ...فركت عيوني اكثر من مرة حتر اركز عليهه... متعرفت عليهه ..شنو هذا حوت ... بس الهور مو مال حيتان... كلت خل اتقرب عليه اكثر واشوفه... جان طافي بالمي ومجلب بجم كصبه وباقي ثابت بمكانه... بس حسيت بيه شي ميت لان ما يتحرك.. بس من المي يلتطم بيه ...يتحرك شويه.. اتقربت من يمه وندسته بعصاتي ...
انكلب ع وجهه واذا بجثه .. سحبتهه بالعصا وقربتهه من المجحوف .. واذا تطلع بنيه كلش حلوة .. ارتبكت ومعرفت شسوي .. كلت خل اسعفهه بلكي بعدهه ما ميته بس ما اعرف شلون يسعفون الغركان .. انتبهت لوجهه جان مورم ويمكن شبعانه مي ... وميته...بس ملامح وجهه الحلوة باقيه بالرغم من وجهه المورم ...سحبتها وخليتهه بالمجحوف ..وجانت جثتهه كلش ثكيله يمكن لان تشبعت بالمي...وجان الخوف كاتلني خاف يبلوني بيهه.. زين هاي غركت لو اكو واحد مغركهه ... ضلت افكار اتدور ابالي... مشيت بالمجحوف ويم حافه من حواف الهور نزلتهه ع اليابسه.. اني ماشايفهه لهاي البنيه بالقريه ابد وشكد اطلع للصيد بس ما لمحتهه.. ركزت بشكلهه حسيت تكلي ... ساعدني اني متت مكتوله ... فزيت ع روحي وركبت مشحوفي ومن الخوف جدفت عالسريع ورحت للبيت... واني ابالي الف سؤال ... وسؤال
بالكي يلكوهه اهلهه هل مسكينه... وبقه سالفتهه ابالي ومكلت الاي واحد سالفتهه ... جنت كل ما امر بالمشحوف اعاين مكانهه اللي تركته بيه واتذكرهه واتذكر نظرت عيونهه من ركزت عليهه ..وانفض راسي حتى اغير على موجه غيرهه واجبر عقلي ما يفكر بيهه...
مرت سنين ونسيت سالفه البنيه... وبيوم طلعت للصيد وماشاء الله؟ الصيد جان هواي..
اخذت الصيد مالتي حتى ابيعه ... اكو مريه جبيرة بالعمر يكلوولهه ام رعد .. عدهه بسطيه زغيرة تشتري السمج من الصيادين وتبيعه وتسترزق منه.. جانت كل الصيد مالتي هيه تشتريه.. من اصيد ما احتار كبل اوديه الهه..
اخذني الفضول حتى اعرف شصار بهاي البنيه ..كلت اكيد اللي اخذوهه من هاي القريه لان اني خليتهه ع الجهه مالتهم من يم الهور... فكلت خل اسألهه هيه عجوز ... وما راح يصير شي اذا سالتهه...
كلتلهه خاله سمعت لاكين بنيه غركانه بالهور وميته ... !!!قاطعتني وكالت اي وليدي اي ... اوووف هاي جارتنه... واسمهه نور.. ورددت بينهه وببن روحهه .. الف رحمه ع روحج نور بنت سميه...
هاي المسكينه لكوهه ع حافه الهور وهيه غركانه وشبعانه موت...
كتلهه خاله ماعرفو شلون غركت...
صفنت شويه ومسحت عيونهه الزغيرة بطرف فوطتهه ... وكامت تحجيلي وصوتهه بي نبرة حزن...
كالت نور جانت بنيه بسيطه كلش وفقيرة .. وجانت كلش حلوة.. وجانت ماتطلع باب الحوش ومحد يشوفهه .. حتى اني جيرانهم ماشايفتهه ما تطلع بس وكت الغدة من تروح توديه لاخوتهه...بالشغل...
كالت العجوز جنت متعودة اكعد بالباب ... وكل ما تمر نور اتسلم عليه وتروح... مرت ايام ونو مابينت ولا الهه اثر ...مرت اخوهه الجبير اخذت دورهه وكامت هيه تودي الغدة وفد يوم فاتت من يمي وسألتهه ..عن نور ليش متبين..؟؟
ارتبكت وكالت هااا .. وانتي شلج غرض بيهه حتى اتسألين عليهه... نور مريضه ومابيهه تتحرك ونايمه بالفراش... زين... لفت عباتهه ع وجهه ومشت ع السريع...اني اشو شكيت بكلامهه شنو مريضه شنو مابيهه تمشي ؟ اكيد اكو شبي ضامينه على اهل القريه وميردون احد يعرف بيه...
مر كم يوم على سؤالي على نور ... زاد شكي وردت اروح للبيت مالتهم واسأل عليهه ...الناس تتراكض بالقريه وتصيح اكو مريه غركانه بالهور...طلعت ويه الناس اني كلبي لبزني وحسيت بيهه هاي نور رحت اركض ويه الناس حتى اتعرف منو هاي المسكينه اللي غركت او مثل ميكولون غركت...واذا تبين انو الميته هيه نفسهه نور ...الناس بالقريه كامويتباجون ع نور لان يعرفونهه طيبه وتساعد الكل ويعرفون اطباعهه واخلاقهه المعدله...
بالقريه جانت من العادات المتوارثه انو الناس يرحون البيت الميت حتى يعزون...؟؟؟ بس انصدمو بان اهل نور رفضو استقبال المعزين وما سوو فاتحه البنتهم... فزاد شك اهل القريه بسبب غرق نور..
وكلما سئل اهل القريه خوانهه عن سبب غرق نور.. جانو يكلولههم ..نور اتمرضت وصارت مخبله في اخر ايامهه ؟ وحاولت اكثر من مرة تكتل روحهه بس انلحك عليهه ونمنعهه... وذاك اليوم طلعت وما عرفنه وين راحت ... لحد ما لكيناهه مغركه روحهه...
اهل القريه اقتنعو بسالفه نور ... على انو نور اتمرضت وتخبلت وانتحرت غركانه....
مر كم شهر على موت نور ... واذا اخوهه الجبير اتعارك بالقريه ... وينكتل بعد ما انضرب سجاجين بمنطقه الصدر وعلى اثر ضربات السجاجين مات ...رحنه احنه النسوان اللي بالقريه حتى نعزيهم بموت ابنهم... استقبلونه وسوو عزة ونصبو الجوادر ... للزلم ...وصار العزة سبع تيام...
احنه النسوان ضلينه نتبشبش بالفاتحه ونكول عزة شبيكم هذا ادمي وذيج شني خطيه لاسويتولهه فاتحه مثل الوادم .حتى الناس تترحملهه...
خلصت الفاتحه ومرت ايام وشهور اخو نور الزغيير صارت تجي نوبات ويكوم يخربط بالحجي... وشويه شويه الله اخذ عقله ... وتخبل .. وكام يمشي بالقريه والجهال ورا يركضون ويضحكون عليه ... وبيوم جنت كاعدة بالباب جان يجي وشايل عودة بيدة ويصيح ويبجي والجهال وراه يضربونه بالحجار ... جان مصلخ ربه ما خلقه ويصيح احنه الكتلنه نور.. احنه غركناهه بالهور... ؟ وضل فترة ع هذا الحال يفتر بالقريه ويصيح ... احنه غركناج نور.
وبيوم جبته يمي ونطيته اكل وملابس وسالتهه ليش كتلتو نور... هيه جانت اتحبكم وخوش بنيه... كام يبجي ... وكال خاله ... بيوم من الايام . اجينه من الشغل طبينه للبيت نور شايفه واحد طاب للبيت... اجت تركض تريد تكللنه ... بس مرت اخويه كامت تعيط وتصيح قبلهه ... الحكو اختكم جانت نايمه وي هذا الغريب... اللي انهزم اول مدخلنه للبيت ...كبل صدكنه بمرت اخويه...وجذبنه اختنه الزغيرة ...وهذ الغريب هوة اللي تعارك ويه اخويه وكتله بالسجين...رحنه ركض ع نور اخذناهه بدون منسمع منهه اي كلمه وحطيناهه بالمجحوف وغركناهه بالهور... وهسه يوميه تجيني نور ... وتبجي وتكولي شنو ذنبي كتلتوني... خطيتي بركبتكم.....انتشرت قصه نوربالقريه وطلعت بريئه وكل الناس اترحمو عليهه..
كتلهه ومرت اخوهه وين راحت... كالت من انكتل رجلهه طلعت من البيت ولليوم محد يعرف وين مكانهه...
وكالت ... قبل كم شهر شفت اخو نور المخبل ..كالي خاله حلمت بنور زارتني للحلم وهيه مكيفه وتضحك...
كتله محمد الله ميضيع حق احد ... نور انكتلت مضلومه بدون اي سبب ... الله يرحمهه ويغفر الهه......
((((وبشر القاتل بالقتل ولو بعد حين ))))
""تمت""
