القصه قصيرة ..ويوميه بارت او اثنين وصاحبه القصه ويانا تابع تعليقاتكم ونصائحكم الها .سلسلة ..حكايات قصص قصيرة ..#سلسلة_حكايات_معاناة_امراة_الحكايه_الاولى_ثمن_طيبتي#
الحكايه الاولى ...ثمن .طيبتي
...اسمي حسناء .. سموني .لان جميله .وجمال كان فيما تقدم من عمري نقمه عليه .. اني مواليد ٨٠ ..شكلي مميز من بين اخواتي ..احنا ٤بنات و.٢..اخوة .ابويه وامي نقيضين مختلفين عن بعض ..امي كتله حنان وطيبه لكن والدي عكسها تماما ..قاسي الى ابعد الحدود ويفضل الولد على البنيه .احنا من محافظه.... . درست ..اعداديه تجارة . وكعدت مواصفاتي بيضه .وطويله شعري اسود . وعيوني . وساع ..جوزيات . بعد مكملت الاعداديه بقيت بلبيت .امي علمتنا من صغار الشغل .تلكينا كلنا نادرات ونار ناكل الشغل اكل.
..الام ...حسناء يوم . كملت غدا .. من يجيون ابوج واخوانج صبو .راح اصلي وانام ..
...حسناء .صار يمه
جوي ابويه ..وكلعاده عصبي وميتحجه ..
لج ..وين امج
حسناء .... يابه ..نامت مالها خلك
الاب ..دمشي خليلنا زقنبوت
حسناء ..صار خليت الغدا . وكعدت امي وتغدينا
اختي الاصغر .مني للملمت المطبخ وكعدنا بغرفتنا نسولف ..اخواتي وحدة اكبر مني فيحاء مزوجه واني وشهلاء .والصغيرة شيماء .
اخواني .. سجاد .وعلي .اثنينهم اكبر مني .عائلتنه مرتاحه ماديا ..والحمد لله ومعروفين بلمنطقه
الام ... حسناء .تعالي ويايه للسوك محتاجه كم حاجه للبيت ..
حسناء .فرحت لان طاكه روحي بلبيت .
بدلت بسرعه وجيت يم امي طلعنا ..بلطريق ..امي سلمت على مريه ..شلونج ام سجاد .
امي ...هلا حبيبه شلونج ..ام عماد .صحتج وين متبنين
ام عماد...بلدنيا ..خيه ..هاي الحليوة منو
امي ..هاي .حسناء بنتي .
ام عماد ...مشاء الله .يمه فدوة لله شكد حلوة .. ماخذة بعدها
امي ..لا بعدها بس فيحاء تزوجت ابن عمها
ام عماد ... الله يحفظهن ..
راحت بقت تباوع عليه .. وتتفحص
رجعنا للبيت بعد ماتسوكت امي . وبعد يومين ..جتي امي
كومي ..بدلي تعالي هاي ام عماد يمنا تريدج جايه تخطبج لابنها
حسناء ..اي هسا ..مجنت لافرحانه ولاضايجه . يعني .بس
السلام عليكم
ام عماد .. وعليكم السلام .هلا بجنتي . تعالي يمي
حسناء كعدت يمها .باستني
ها خيه .. تنطونا لا
امي ....ام عماد يجون ابوها واخوانها واكلهم وهما يقررون بعد تعرفين مو يمي الحجي
ام ..عماد ..اترخص ..امي وانتظر منج خبر
راحت ... اجه ابويه وامي كلتله ..
الاب ..اي خوش ناس بيت ام عماد ..كليلها موافقين
امي ..بيها الخير .باجر ارجعلها جواب . وتريد تجي .تجيب الولد يشوف البنيه ويشوفها .
الاب ..ادري هي موشافتها
الام .. بكيفك انته
الاب يله خلي يجون باجر العصر
حسناء ..ظليت افكر شلون شكله والي عرفته اسمه اياد .يشتغل اعمال حرة وضعه زين عمرة ٢٥ واني ٢٠.فرق ٥ سنوات بينا . شيماء ..اي اخيرا رتح يصير عدنا عرس ..
شهلاء ..لازم نروح نشتري ملابس .للخطوبه
حسناء ..ان شاء الله
امي ..رجعت الهم جواب بلموافقه وبلغتهم يجون باجر ثاني يوم .كعدت نظفنا وغسلت ورتبت نفسي .لبست تنورة سودة وقميص وردي واجوي امي صاحتني جيبي عصير وتعالي . دخلت واني ميته خجل قدمت لامه .ولااخواته وصلت يمه لمحته بسرعه ..شكله مقبول هو جان يباوع عليه بس محجه شي طلعو وتحدد موعد خطبتنا والمشيه .. بيوم خطوبتي رتبت نفسي بلبيت لان مو مثل هسا .العروس تروح صالون .. جوي امه وخواته . واقربائهم ..واتفقو على كلشي .وصارت هلاهل ..وطلعو وحددو موعد يلبسوني الذهب والحلقه .. طلعنا اني ويا وامي وامه نشتري الذهب وباقي احتياجاتي .. اشترينا الذهب والملابس والمكياج هو ابد محاجاني ولا باوعلي ...رجعنا .والعصر ارتاحينا ورجعت امي اخذتني اجرنا .فستان .. اخذته احمر .. وبسيط اشترت لااخواني ملابس ... وحجزتلي صالون ورجعنا ..
فيحاء ..وصفيلي فستانج ..
حسناء ..حلو يخبل ..
فيحاء ..اي .وانتي ويا شحجيتو
حسناء....كلشي محجينا غير السلام متكتر على جها جنه مغصوب بلجيه .
فيحاء ...لا ولج بس هما الرياجيل ميحبون هاي السوالف .
حسناء ...يجوز بعد مااعرف طبعه اني .
فيحاء ..اي .تتعلمين .. وانوب تردين الفكه منه ماكو ..يلزك بكل مكان .
حسناء 😂
شيماء .. انتي عوبه .. اني منج اجلب بايدة ..واحجي ويا ..
حسناء 🤤شلون ..ولج .مو عيب شيكول عليه .
امي ...وين ..صرتن .تعالن تعشن
رحنا تعشينا .. ونمنا .. من الصبح غسلت ورحت صالون .. شلت بس حاجبي لااول مرة .. ومكياج .وتسريحه طلعت غير شكل رجعنا للبيت ..ساعه واجوي طبعا .اخذني .اياد قبل يوم عقدنا سيد ..لان راح انكشف عليه ويشوفني ويلبسني الذهب .اجه اياد باوعلي باعجاب .بس محجه سلم وكعد لبسني .. وطلعو ..تحدد زواجي بعد اسبوعين .. ومرن الاسبوعين .ركض بين تجهيز وحجز وترتيب .. بيوم الزفه ودعت اهلي .. وانزفيت لااياد وبديت حياة جديدة بخيرها وشرها ..
اياد سلم ..وكعد بدا يحجي ..وصاني على اهله .. وتم زواجنا اعتيادي .. بعد السبعه .انتبهت اياد ميهتم اليه ابد ومن النوع البارد . شما اجمل بنفسي . ولاينتبه اصلا ..
غدير وسام .
#ثمن_طيبتي#
البارت الثاني ...غدير وسام
طبعا .انتبهت اياد ميهتملي ابد .وجان شغله عبارة عن سفر لخارج العراق ..وهنا بعد زواجي ..اشتغلت الحرب جان بيت عيالي متكون من ٤ اخوان و٢ خوات ..وحدة مزوجه والاخ .. موجودة .وحمويني ١ مزوج الي هو عماد ..واياد زوجي .وسجاد .. والصغير العله الي جان محاربني .. محمد .. طبعا ناشبني .مااعرف ليش ..
ام عماد ... يله حبيبه .. طلعي الزوالي غسليهن ..
حسناء .صار
لميت الزوالي غسل ..وتركتهن ينشفن .
ام عماد .خلصتي .يله بلشي بلغدا ..
وغسلي الملابس ..
حسناء ..صار . عرفت بتقدم الايام ..انو خالتي تحاول جزعني .بلشغل متدري اني .. ميهمني شا اشتغل .. واحب التنظيف ..عمو.ابو عماد كلما يدخل للبيت يكلي الله يرضه عليج ..وعوضت بحنانه القسوة الي شفتها من ابويه .
طبعا ..مر شهر على زواجي .عرفت اياد مامنه امل يعبر عن مشاعره اليه اوحبه .فسكتت وبعد محجيت ويا ولااهتميت .. بس .كامو يسئلون مصار شي ..
مرت اشهر .. وصار سنه على زواجي .. وماكو حمل .. حماتي تزوجت ..وزوجة حمايه حامل .. خالتي بدت تعير بيه وتهدد تزوج اياد ..واياد الشغله مويمه ..تعبت .مخليت دكتورة بلنجف تعتب عليه ولاوصفات عرب ولاكطع ..مفاد ..بعد السنه .. وصفولي دكتورة .. بس بغداد ..
حسناء ...اياد اكو دكتورة بغداد يكولون زينه
اياد ..يمعودة ..عوفيها على الله
حسناء . لك عيني .انته هاي اخير مرة وراها اسكت وانطم حتى اذا تريد تطلكني هم قابله
اياد...شلج بهذا .الحجي شنو اطلكج . كافي يله اسبوع الاخ افرغ نفسي واخذج .
حسناء .. ان شاء الله . نمت .. وثاني يوم شغل اعتيادي وحجي خالتي الي ميخلص .. دخلت للحمام ..لكيت ملابس جمعتهم وغسلتهم .. زرا ساعه سمعت حمايه الصغير يعيط
محمد...وين ملابسي جانو بلحمام
حسناء ..اني غسلتهم
محمد ...ومنو سمحلج تمدين ايدج عليهن وتغسليهن
حسناء .. لكيتهن بلحمام .وغسلتهن
محمد ..انوب اكسر ايدها الي تمدها على ملابسي وتغسلهن ماريدجن توصلون على حاجتي
ابو .عماد ..شبيك لك تخبلت شلون تحاجي مرت اخوك هيج
ام عماد...خلي وياها ..مسويه نفسها نادرة العاجر .
حسناء😢😢
ابو عماد ..استحي ..يامرة بدال متربين ابنج
ام عماد ..ابني مربيته عدل بس ذني . الي الله مااعرف منين لمهن عليه .. ممتربيات .
ابو عماد ..روحي بابا كملي شغلج اني اعرف اتصرف وياهم
رحت للمطبخ كملت غدا .. وصبيت وصعدت لغرفتي مااشتهي العسل
ام ..عماد ..تعاي خاتون لمي المواعين لو اني اغسلهن لان حضرتج زعلانه ..
حسناء ...جايه خاله .
لليل اجه اياد .طبعا من الباب .استلمته خالتي ..وكلعاده لاتعليق
تعلمت اسمع واسكت لان مالي غير حل
اياد ..حضري نفسج باجر نروح لبغداد
حسناء ..صار .
كعدنا الفجر وطلعنا .توجهت لاامير المؤمنين كتله اريد تبشرني وماارجع خايبه بجاهك عند ربك
وصلنا ..حجزنا بفندق .وطلعنا للدكتورة .. حجز وانتظار وصل السرة طلبت تحاليل الي ولزوجي ..وكشفت عليه
الدكتورة ...شوفي حسناء ..كل مشكله ماكو واستعدادج للحمل ممتاز .. راح انطيكم علاج تلتزمون بي شهر الاخ تجيني حامل .
حسناء ..صدك دكتورة
الدكتورة ..بلي امي ..تفائلي .بلخير ليش هلشكل متشائمه
حسناء ..صار سنه دكتورة
الدكتورة ..كولي ياالله واحمدي ربج احسن من غيرج ناس تكعد سنين
حسناء ...الحمد لله .نطتني العلاج اخذته وطلعنا بتنا بلفندق وثاني يوم رجنا للبيت .
خاله ..ظل ذب بفلوسك عليها ..اذا حبلت ولك هاي كاع بور واني ورطتك بيها .بس حلا من برة فارغه
اياد ..شسالفه يمه .تونا طبينا خلي نرتاح ..
اول مرة يدافعلي .صعدنا ..لغرفتنا واني متفائله كلش الدكتورة كلامها بلسم .
مشت الايام .والتزمت بلعلاج ..وفعلا فات موعدها ..وحللت وجانت المفاجاة .حامل ..فرحه .متنوصف غصيت بلبجي . مثل الصايم بيوم حار وانطو مي بارد .. هيج شعوري .
الكل فرح .. حملي متعب .. وشغل بيت عيالي ميرحمون
جنت كل فترة اروح لااهلي ابات كم يوم اشبع من امي وخواني يجتمعن ..سوالف ولمه حلوة بس نحس ابويه يضايق فقللت روحاتي .امي بدت تعتب .
ام حسناء ..ليش كاطعه هواي تتاخرين
حسناء ..صدكي يمه مو بيدي تعرفين بعد شغل
ام حسناء ...ميخالف امي ..بس حتى بيته كمتي متباتين تجين ساعه وترحين .حسناء ..احسن يمه ..ابويه يضايق من نجي .ونلتم .
مشت الايام وصلت للتاسع ..وجنت منتظرة اشوف الطفل الي راح ينور عمري .
صارت .ولادتي ب ٢٠٠٣ ولدت بنتي زينب .. جبيرتي وكمر حياتي . صارت محور حياتي .. عوضت بيها كل حرماني ..اياد ويا زينب يختلف . يضهر مشاعرة ويحبها بشكل جنوني . كبرت زنوبه .وصارت سنه حملت مرة ثانيه ..فرحت ..خصوصا لمة اجاني ولد سميته حسين .. حمدت ربي وشكرته على النعمه الي اني بيها .. اياد اغلب الشهور مسافر .صار كل حمل الاولاد عليه ..كبرتهم ومحبيت اسوي طفل ..بعد ... لذلك استخدمت موانع حمل ..ومنها وضعت لولب . حتى اضمن ..ميصير طفل .. بهاي الفترة امي حيل تعبت ..وبدينا نروح يمها نسليها .بس عرفنا ايامها معدودة .
#ثمن_طيبتي#
..البارت الثالث .غدير وسام
هنا عرفنا ايامها معدوده وجانت صدمه عمري امي خسرتها خلال اسابيع ..بيومها رحت للبيت اغسل لااطفالي وارجع يمها .عمر زنوبه ٦ سنوات .وحسوني ٤ . بعدني .ردت اطلع ..اجه اياد ..وجه ميتفسر عرفت صاير شي
شبيك اياد
اياد .والدتج توفت
حسناء .لا ولج يوم المن عفتيني .هو بس انتي اليه وترحين
احساسي .مااعرف اعبر عنه كل فاقد ام يحسه ..حسيت خلص مالي احد بلدنيا جانت دايما تسئل عليه وعلى اطفالي ..رحت ..للبيت . شيعو امي .واخذت روحي وياه موتت نفسي بجي ولطم كل هذا وحركتي بصدري ماطفت ..
(يمه ..لو رحتي اظل بلايه خيمه ياحنينه وساعة فراكج اليمه ) الدنيا اسودت بعيني ايام لااكل ولاشرب .. تمرضت واحتار بيه اياد واخواتي ..مخلو ومحد وكع لعلتي ..وصفو دكتور لااياد واخذني اله .اول كلمه كال ماتصرف قبل تحليل للحمل .
حسناء لادكتور مو حامل
الدكتور .منخسر شي بنتي .
سويت التحليل وهنا المفاجأة جنت حامل .
حسناء ..شلون دكتور ..اني مخليه لولب
الدكتور تصير بابا ..راجعي نسائيه افضل .. راجعت .وكان حملي متعب .بسبب صدمتي بامي .وضعي ويا اهل زوجي .. ولدت ..بنت سميتها مريم انشغلت باطفالي وحزني على امي .. اياد سفراته كثرت وطولت .. بدا يصير عندي وقت فراغ .. تركت خبر عند الاقارب .ولزمت ..صوم وصلاة عن الاموات وبدت تصير جوا ايدي ..فلوس .. عيشتي ويا عيالي دمار كلت ليش ما اسوي سلف .بيهن واضمهن ..حتى اشوفلي بيت قطعه ارض ..لان زوجي ممفكر بلموضوع . بنيه معرفه .. كتلها متعرفين احد كالت اعرف وحدة وفعلا جابتها تعرفت عليها ..واتفقنا اسوي وياها سلفه ب٣ ملاين وكتلها القبض براحتج لان ممتوازيه اني ..
البنيه ..جان اسمها ام شهد
بدت تتردد عليه .وهي تجي تقبض الفلوس وصارت بينا تلفونات وعلاقتنا كلش قوت . حبيتها كلش .ومرت ايام .. وبيوم اتصلت
ام ..شهد ....شلونج ام حسين حبي
حسناء ..هلا ام شهد بخير
ام شهد ...اكلج حبي .طالبتج وامستحيه منج .بس محتاجه مبلغ .. محتاجه .فد ٣ ملاين حسبة ١٠ ايام اسبوع وهنا يمج
حسناء .. والله حبي ماجوة ايدي .. حاليا تنتظريني من استلم اسمي
ام شهد ...لا وداعتج متوازيه كلش ومااخرهن
حسناء ..عندي بس . فلوس زوجي مالت شغله ومااكدر اتصرف بيهن
ام شهد ..هي حسبه اسبوع والفلوس يمج اختج واكعه بشدة ..
حسناء ..تعالي اخذيهن ..
ام شهد .....الف رحمه لوالديج ..جايه
ربع ساعه وهي يمي ..
حسناء ..هذني ..كل مابلبيت ..٣ ملايين .ملات زوجي .
ام شهد ..لاتخافين .هو شوكت يجي .
حسناء .فد ٢٥ يوم
ام شهد ...لا قبلها هنا يمج ..طلعت واني مطمنه ..لان كلبي ابيض وعمري مااخون بشر ولاافكر بي تفكير سيء بس اكتشفت بعدين ان هذا الي وداني للتهلكه حسن ظني بلناس مرت ال١٠ ايام .وام شهد لاحس ولاخبر .كلت مااضيق عليها لو عدها رجعتهن .. بقى يومين ويرجع اياد واول ميرجع ويرتاح .يجيك حساباته ويضيف ارباحه للفلوس .. اتصلت بيها
حسناء ...ام شهد على بختج ..اياد على الحدود
ام شهد ..والله ام حسين المبلغ ماادبر عندي ..شلون
حسناء ..شلون دبريني من يجي شكله
ام شهد ،.....*اكو حل .. اعرف وحدة تنطيج فلوس .. وتوقعيلها ورقه تظمن حقها امشي اني اكفلج .وتنطيج الى ان ادبرهن وارجعهن ..اني جان وقعت بس ماخذة منها
حسناء ..يله ميخالف .
ام شهد ...ديله جايتج .
اخذتني لوحدة نطتني الفلوس وكالت تتاخرين تدفعين بلشهر ٥٠٠ وقعت كمبياله بدون مااشوف الرقم .او الشروط ..عبالك انعمى على عيني او جنت مسيرة مو مخيرة .. اخذت ال٣ ورجعتهن للبيت اجه اياد .ورتب حساباته .. اني امنت .فلوسه رجعن وام شهد ترجع فلوس المريه ..
اجه راس الشهر اتصلت .كالت وين الدفعه ..
حسناء ..ام شهد ماسددتج
ام ... سارة ..لاحبيبه ماشايفه ام شهد اني طيتج الج ..مو لاام شهد .
حسناء ..ان شاء الله اتصل بيها وارجعلح جواب .
ام سارة .....حبيبتي القسط العصر يمي لا اجي لبيتج وافضحج لو اروح للشرطه
حسناء ...لا ماكو داعي ..اتصلت بام شهد ..نكرت هي ماخذة مني اي مبلغ .
حسناء ..على بختج ام شهد مو وكفت وياج وفكيتلج عازة
ام شهد ....لا حبيبي لاتذبين بلاج عليه عدج شهود اني ماخذه منج جيبيهم وانطيج فلوسج ماكو لاتظلين تنعثلين وسدته بوجي ..
وهلي تتصل . زين شسوي وين اروح والمن اشتكي .. رحت لاختي ..نطتني نص والاخ نص .دبرن هل الشهر ..ومشت الشهور وكل شهر ادين مبقى احد ميطلني .. اني الجوارين جانت تحلم تسمع صوتي .كمت اروح ادين منهم في سبيل اوفي .. كملت ال٣ ..رحت كتلها هاي .فلوسج وصلت .
ام سارة شوصل حبيبه انتي ماخذة ١٧ مليون ولهسا كلشي مموصلتني .
حسناء ...شنو ١٧ اني خذت ٣ وفيتهن .
ام سارة هاي الكمبياله حبي .وانتي مناطيتني ولافلس .
بعد مجاداله وياها رجعت رحت لااخواتي .. فيحاء . صخام بوجج وشلون
حسناء ..بجي ..دبرني وين اروح
شهلاء ..لا لهنا ..وكافي صارت هسا الشغله مو اختصاصنا لازم ندخل الزلم
حسناء ..
يازلم ولح ..اياد يطلكني . يتبع وللحكايه بقيه .توقعاتكم حسب شخصيه اياد يتخلى عنها لو يساندها ..
أنت تقرأ
سلسلة حكايا وقصص قصيرة ..معانات امراة عراقيه الحكايه الاولى ثمن طيبتي
Chick-Litقصص عن نساء عراقيات .. والتطرق عن كل تفاصيل حياتهم ومعاناتهم والظلم الذي يتعرضن له ..
