البارت التاسع
قلب الصخر
صخر ...
حسيت بتعب ... رحت لغرفتي و نسيت ريم بيها ... فتحت الباب و لا يا ربي .... انه شسويت ... لگيتها شالحه هندامها و باقية بقطعة وحدة و مو مسترة ... هي شهكت و غطت نفسها بايديناتها ... وانه ارتبكت و طلعت من الغرفة و نار بصدري ... انه اغم ... اي والله من دهر طرك يا صخر ... انت موش تدري هالبنت بالغرفة ... دك الباب هي هاي اصولك ..؟
تانيت دقايق و جان ادكها الباب ... ما سمعت حس ... انه محتاج اخذ هندام نظيفة من الكنتور و البنت خجلت .. عفية عليك صخر چا والمحاظرة قبل شوي الي لقيتها ع البنت وينها ..؟ هسة شحدكولن علي... مراهق ... ما عندي اصول ...؟ تربات غجر ...؟
كالت تفضل ... انه فتحتها بهداوة و ما باوعت عليها درت وجهي للناحية الاخرى و كتلها سامحيني انه نسيت انت موجودة ...من التعب ... من رخصتج رح ادخل اخذ شكم غرض و اطلع ... ما جاوبت بس شفتها متلفلفة و لابسة حجاب ... اخذت من الكنتور الي اريده و درت وجهي لغير صفحة و كتلها باجر نروح لهلي من الصبح اريدج كاعدة و متحضرة ... و خاف امي تسالج شي كلشي لا تجاوبينها ... كوليلها اسالي صخر ... فهمتي ...؟ مظطر اخذج لهناك و عگب باجر زفتنه ... و رح اسويها چبيرة حتى الكل يعرف انت منو ... و صخر ابن جبار تزوج ...
حتى ما علي حجة لو واحد من اهل راضي تعرضلج و انه فنيته ... و عفتها و مشيت ...
ريم ....
من طب عليه و اني جنت دا ابدل ... عزة غديت نملة 🐜والله من الفشلة .... هو ارتبك و ع السريع طلع ...... لبست هدومي و شالي شديته زين .... رجع دك الباب مرة ثانية و تاناني اكوله تفضل ... فتح الباب و دخل ياخذ غراض ... وكلي باجر يوديني لاهله... و حذرني من امه ... شما تحجي ما اجاوب و اذا سالت شي اكولها سالي صخر ... يا ربي ظاهر امه مو هينة لذلك حذرني ... نمت و سلمت امري لالله بس حسيت روحي مختنكة و لازم احجي وية امي دكيت قبل ما انام ... و سولفتلها و بجيت و هي هم بجت و رادت تجي و ابوية ما خلاها .... وراها سديت التليفون و نمت شوية مرتاحة لان حجيت وية امي و كلام صخر هم ريحني ...
صخر ...
صبحنا الصبح و شفت خال ريم كاعد صافن يضرب اخماس باسداس ... جان يكلي ابني انت بتت هنا ..؟
كتله اي عمي لان كرابتي و ولد اعمامي بيت اهلي و متروس فرجعت هنا نمت ... كتله بس ترة سدك امين لان صعدت فوگ بالسطح نمت ... هو اطمئن و ملامحه لانت من شاف ريم طلعت من الغرفة ركض عليها و جرها حضنها و باسها من راسها و كعدها بصفه كلها شلونج باباتي اليوم ... هزت راسها كالت بنبرة حزينة ... زينة الحمدلله ...
كتله عمي رايدك بموضوع من رخصتك ... كال اي كول ... كتله لا على انفراد.... كلي اي ابني جيت ...
وكام و طلعنا للطرمة ... كتله عمي انه فكرت ... انت جيتك وياي للفصل موش بصالحنه ... كال لييش؟ كتله لان اكيد اكو ناس من هلي و بالخصوص عمي جاسم ... رح يعرفوك انت اخو فطيم ... ما اريد تنكشف سالفة ريم هسة ....و احنه بهالوضع ... انه اكول خليك هنا بالبيت و رح اخذ ريم و اروح ... هو خاف و راد يعارض بس شفته سكت و درس السبب ...كال ولو صعبة عليه بس ميخالف لاجل ريم اتحمل ....ريم ليش تاخذها ...؟ كتله عمي انه زفتي على ريم باجر ... شلون انزف و هي ما شايفها احد من هلي .. هاي من غير رح يكلولي شلون خطبتها و احنه ما عدنه علم ... بس انه رح اسكتهم كلهم بحجايتين ثلاث .... انت لازم تحط نفسك بمكاني ...
دخلت للغرفة و جانت ريم مو بيهة اخذت هندامي و عباتي و غترتي .. و طلعت ابدل ...
باسني من راسي .....
اني اتفاجئت و جمدت حواسي صح جانت بوسة بريئة وما شفت اي احساس بعينه الي ... ما عدا الخوف و الاهتمام ...
بس اني كلبي سرع نبضه لان جان كللش قريب مني ... و انفاس بوسته من حطت على جبيني دفت برودة الخوف الي جواية ... حسيت بامان ما اشوفة مرعب مثل ما يشوفه البقية ... الموجودين بيتهم من طبينه كلها ترجف و تترقب اله من دخل .. الا اني احس وياه بامان ...
كلي رح اخليج هنا بس لا تطلعين ريم ... لان امي شوية عصبية و ما اقتنعت بفكرة زواجنا و طريقتها ... فما اريد تصير هوسة هاليومين اليوم افض الفصل وباجر افض الزفة ,....
مفروض انقهر و ابجي من جاب طاري الزفة مثل البارحة .. بس اليوم حبيت الفكرة ... اني رح اصير مرت هالشهم هذا و يبقى يدافعلي و ميقبل ع العوجة ...
تمنيت زواجنا طبيعي .. وهو يصير رجلي صدك و اني مرته و يباوعلي بنظرة عاشك و ابادله النية ...
دمعت عيني لهالامنية و كلي ياله كافي ادري بيج خايفة بس ترة اهلي ميعضون .... مسح على راسي و راح ...اني ما ادري ليش حسيته رايح و يطول ميرجع ... غمضت عيني حيييل و رحت وراه هو وصل يم الباب ...
لزمته من چفه و عصرته حييل ... گتله لا تطول ...
گلي انت شنو رح تكلبينها عزة و بجي ودموع ... ابتسمت
كلي اي اريدنج هيجي تضوين بهالابتسامة ... و ابتسم و راح ...
رحت يم الشباك وكفت و ظليت اباوع من ورة البردة جان يطلع من جوة ديمشي هسة انتبهت عليه سمراه حلو ... و طوله هيبة .... ملامحه حادة مو اي واحد يحبه ... بس گلبه ابيض ... نيال الي رح تاخذك 😭😭😭😭😭😭
اي ريم اسكتي انت مو من محافظته و لا تنسين هو تزوجج صوري حبر على ورق .. و كلج اني متنازل عن حقوقي الزوجية .. يعني زواج بالاسم ... لا تفرحين باجر حيسوون زفة و كذا ... لا يابة هاي كلاوات يمشيها ع العالم مو تصدكيها ...
يروح و يجي مخبوص و كومة زلم تتمنى اشارته ... لابس سلاحه و ساعة بايده ... جذبني صراحة من شفت همته ...
ورة شوية جتي خالته ... حبابه كلش كلتلي ريم انه ادري بيج ما متريكة ... هذا ريوك ... اكلي و هذا ماي وياه ...
كتلها شكراً.. كالت و من تحتاجين شي صيحيني انه اجي طيارة ... كتلها اخبار العرسان سمعت عدكم عرس البارحة ... (ولا سالت على سارة شكد عيب ..) كالت زفينهم للفندق و اليوم حيروحون للنجف يطيرون لتركية يبقون اسبوعين و يروحون لشقتهم لبغداد ..كتلها ميجون هنا ...؟ كالت لا مو طلاب اثنينهم يدروسون ابغداد و هناك يظلون علما يخلصون ... كتلها هاا زين شكراً
خطية حبابة كووولش .. طلعت و اني ظليت افكر ... يعني سارة متجي لهنا .. هي البارحة حجت وياية بالتليفون و سولفتلهة كل الي صار و انقهرت علية ... و رادت تجي لبيت شيخ صخر و اني ما رضيت.... خطية عروس شنو اكسر عرسها ، كافي الي صار و ابتلش الشيخ بيه وعاف عرسهم هنوب هي هم خطية اخبصها ...
مر الوقت عليه بالكوة ... و صار وقت الفصل وكفت اباوع ... هاااي شنو انكلبت الامة سيارات و عالم ما ادري شكد كووومة ... و نصبوا خيم ... و الشيخ دا اباوعه من بعيد مخبوص ... كلت يا رب شنو هالصخر .. هذا مو صخر خبص هالدنية هاي كلها علمودي ...
ورة تقريباً نص ساعة صار عياط برة و هوسة ... لا هاي شنو صار طلقات و ضرب ... و زاد صوت الطلقات اني الوب شفت رياجيل ركضوا و سيارت شحطت والي بيها طلعوا رشاشات و ضربوا طلقات ... اني من الخوف رحت كعدت بالزوية و صميت اذني و ابجي ...
وجان اسمع ركع اليبوو جوووة و يصيحون باسم صخر انهاريت و كمت ابجي .... جان تجي رباب خالة صخر اتصوب ريم .....😱😱😱
