الحب صدفه ام قدر

الجزء الاول

#الحب_صدفة_ام_قدر؟
للكاتبة ميار الشمري
الجزء الاول
#الناشربارق_العراقي
سعد،،،كنت دائما اتسائل ماجمعني بسما صدفة ام قدر!!!!
بدت قصتي من كنت سادس اعدادي اكبر اخوتي احنا 3 ولد وبنات اثنين
كنت متزمت ومسيطر على البنات واتدخل بلبسهم وبطلعتهم وبزياراتهم لان كنت شاب ومحتك بشباب جيلي ومنطقتي واعرف تفكيرهم كلش زين فجنت اخاف على اخواتي البنات جانت سلمى ثالث متوسط وسالي ثاني متوسط
كنت حتى بأختيار صديقاتهم ادخل
وفارض نفسي عليهن
ابوية معلم قدير وعايشين على راتبة والحمدلله جان وضعنا متوسط لكن ماقصر علينا الوالد ابد بس جنا منطلب شي منة حتى منكلف عليه اكثر
كنت مرات اوصل البنات للمدرسة واذا صار عندي وقت اجيبهم او احد من اخوتي يجيبهم
وبالصدفة مرة انتبهت على بنت وياهم تمشي
كانت وياهم صديقة بالمنطقة دائما تروح وياهم وترجع وياهم اذا مااجيت اوصلهم واذا جيت اوصلهم تتركهم وتمشي وحدها او مع غير بنات
كانت اية من الجمال سبحان الي مصورها عيونها تجدح خضر وشكرة ورسومها ناعمة كنت اروح مرات اجيب البنات حتى بس اشوفها واشبع بيها شوف بس كانت متشيل عينها من الارض وتخاف اذا احد تكلم معها لان اهلها معروفين بالمنطقة شكد شرانيين وعدوانيين ومحد بالمنطقة يدوسلهم على طرف
ظليت اراقبها وباوعلها من بعيد بالروحة والجية بس مجنت اعرف اذا منتبهتلي لو لا
سلمى ،،،يمة الله يخليج دأحجي مع سعد انريد نروح على عيد ميلاد صديقتنة وهنا قريبة مو بعيدة يعني بابا يوافق وهو يعترض ترة ماصارت هاي
ام سعد ،،،ميلام بيجن هو هسة وكت اعياد ميلاد روحن درسن ماظللكم شي على الامتحانات وانتي بكلوريا
سعد،،،هاي شكو شنو هالبلبلة شبيهن الجكمات
سلمى،،،سعد ليش متخلينا نروح لعيد ميلاد صديقتنا فاتن مو تعرفهم وتعرف اهلها وقريبين هنا
سعد،،،اني كلت ماكو روحة يعني ماكو روحة كعدن قلمن باميا مع امجن فايخات هية مال اعياد ميلاد بهل وكت التعبان
سلمى،،،ياربي بس احنا هيج معقدين حتى سما الاخوتها معقدين وشرانيين سمحولها تروح واحنا لا
سعد،،،جنت بالصالة وحجي سلمى وكع بنص اذني رجعت للمطبخ وخليت نفسي ماسامع شكالت
سعد،،،منو بلة تريد تروح لعيد الميلاد غيرجن هسة تطلعن بس انتن مشيلات وتريدن تحين الحفل 😠
سلمي وسالي ،،،بدن يعددن فلانة بنت فلان وفلانة اخت فلان وفلانة جيرانة واني انتظر يكولن سما
سالي ،،،وسما بنت المعقدين ذولي جيرانة الي براس الفرع
سعد،،،احس كلبي طار مني همست اهووو شكد يلحن بناتج يوم يلا اخذجن بس بشرط اخذجن واجيبجن وهسة تخلصن تقليم الباميا عن امجن وتسولنا جاي وتجيبنا للأستقبال واخذت امي وكعدنا نشرب جاي وفرحان بداخلي لان راح اشوفها للكمر
اخذتهم من بعد ماطلعت روحهم وكل شوي اخليهم يغيرون ملابسهم تالي لبسن اعرض ماعدهن الي يكول كونية😬 اقتنعت ورحنا
جانت كدامنا سما دتمشي ومعاها امها
باوعتلي وابتسمت حسيت بعد مااندل طريقي كلت لخواتي كدامها يلا حبيباتي طبن وتونسن الف عافية
طبعا خواتي مصدومات على اللسان الي صار ينكط عسل 😮
انتظرتهم الى المغرب راحت رجلي من الوكفة والشمس سطرتني ومن طلعن الخاتونات طبعا كدامها استقبلتهم بأبتسامة تونستو حبيباتي 😬
هنة فرحانات اي والله حيل ولا حسينة بالوقت ابد
سعد،،،بكلبي اي متحسن مكمعات في ومي الله لايوفقجن بس خلي ارجع البيت واني اعلمجن والوجه هيج تعبيره 😬
صرت كل ماافتح كتابي اشوفها كبالي واريد اشيلها من بالي مااكدر
ولان جانت هي مع سلمى ثالث بكلوريا واني بكلوريا صادفت امتحاناتنا بنفس المدرسة بس بين يوم ويوم
يوم احنا نمتحن ويوم هنة جنت بيوم الي  يمتحنون بي اخذ سيارة ابوية واوصلهن اجتي ام سما لبيتنا وكالت ياريت ابنكم يوصل سما مع البنات لان بعيدة المدرسة الي يمتحنون بيها واخوانها ميقبلون تروح وتجي وحدها حتى اذا يريد ننطي كروة
سعد ،،،فرحت كلش عمي بس خلي تجي وياي اني انطيكم كروة وفعلا كامت تروح وتجي ويانة بس جانت هادئة بشكل وصوتها كوة ينسمع
وكل ميخلصون امتحان ويصعدون يلكوني محضرلهن العصاير والمي البارد واسألهن شلونكم بالامتحان وشلون جاوبتن جانت مترد بس سلمى كل شوي ناطة وترد ومامنطية مجال للبنت تاخذ نفسها جنت كل مرة اتحلف بسلمى واكول بس ارجع اسحلها بالبيت حتى تبطل تنطنط ومن نرجع انسى و اتركها
لحد ماكامت سلمى تلمحلي وتبسمرلي على سما وحسيتها عرفت بالي بكلبي
كعدتها قبل اخر امتحان وكتلها سلمى اريدج تمحيلها اني معجب بيها واذا كدرتي تنطيها هاي الورقة بعد احسن
سلمى ،،يمة سعد ذولي اهلها مخابيل ليشوفون الرسالة ويموتوها
سعد ،،،اكيد هية مو غبية حتى تخليهم يشوفوها
وفعلا نطتها الورقة سلمى وجنت كاتب الها حجي كومة مجنت اتذكر بالضبط تفاصيلة بس ذكرت اني معجب بيها واتمنى احاجيها
مرت الايام ونجحنا وقدمت على كلية التربية رياضيات
بس بقيت كل هالمدة انتظر ردهاو ماردتلي ابد ولا اتصلت بية
اجت بوكتها الحاسبات والانترنت وجان الياهو متصدر لحن البنات يردن اسويلهم حسابات ياهو ديحجون مع صديقاتهم
طبعا ماوافقت وكتلهن تحجن مع صديقاتكم من حسابي ضيفوهن يمي
ضافوهن وكل مارادن يحجن افتحلهن
الحساب
لحد مامرة فتحت حسابي وشفت محادثة بين سلمى اختي وسما
ودخلتلها وقريت المحادثة كلمة كلمة حرف حرف
وجانت اغلبها عن الدراسة وعن المسلسلات وعن صديقاتهم
زاد تعلقي بيها وكمت اراقب شوكت تفتح وشوكت تسد وجانت مطول نص ساعة يادوب باليوم
ومرة اني وفاتح دخلتلي سما تعتقد اني سلمى وظلت تحاجيني واني كلمة ارد وعشرة لا بالاخير صارحتها وكتلها اني سعد بس الله عليج لتغلقي اريد احاجيج بشي
سما،،،شنو رايد سعد اني مو مثل هالبنات
سعد ،،،،اعرف والله وهذا الي مخليني اتمسك بيج
سما،،،والله اهلي اذا عرفوا بية الا يذبحوني برمشة عين وهذا اسهل شي عدهم
سعد،،،والله العظيم نيتي صافية وياج يابنت الناس ومااريد اذيج صدكيني بس ريحيني الشعور متبادل لو اكو غيري بحياتج
سما،،،غلقتة خفت وماعرفت شنو اجاوبة

وللقصة بقية ،،،،،