الحب صدفه ام قدر

الجزء الخامس والاخير

#الحب_صدفة_ام_قدر
للكاتبة ميار الشمري
الجزء الخامس والاخير
#الناشربارق_العراقي
سعد،،،بقيت معلم جامعي ومافكرت انقل للتعليم الثانوي ترقيت وصرت معاون مدير بالمدرسة الإبتدائية الي تعينت بيها
وبيوم من الايام واني بالمدرسة واذا بمرة جبيرة بالعمر تدخل للمدرسة ومعاها بنت شابة تمشي وراها لكن ماظاهر وجهة وتلبس عباية راس كانت المرة الجبيرة تصارخ وتغلط على الكادر والمدرسة وصوتها عالي كلش توجه الها المدير واني واكف على بعد مسافة عنهم
كانت تصرخ ودكول ابن ابني كل يوم يجينة مفجوج والولد كاتلينة وانتو شنو شغلتكم هنا ووينكم عنهم
المدير،،،طولي بالج حجية قابل بأيدنا احنة ذولي اطفال وميسيطر عليهم كلهم
سعد،،،وترني صراخها وأسلوبها الهمجي مااعرف شلون انتبهت للبنت الي وياها وهنا تبسمرت وتهت وانقلبت موازيني وشريط حياتي مر كدامي ياربي ممصدك عيني سما !!!!
تقربت منهم وماكانت تسكت المرة والمدير يحاول يسكتها فجأة المرة ضربت سما على كتفها وكالت هالبومة خنثتة للولد وماعلمتة ياخذ حقة بأيدة وتغمها بأيدها الاثنين
سعد،،،تقربت وصحت بيها بلا وعي انتي وحدة متخلفة وبلا ذمة ولا ضمير شلون هيج تصرفين بمكان عام على الاقل احترمي حرمة المدرسة واساتذتها الواكفين
المدير ،،،مصدوم بتصرف استاذ سعد وصوته الي مامرة سمعتة عالي ولأول مرة اشوفة بهل حالة وهي كانت ولا تنكسر وترجع تعلي صوتها وتتهدد وتتوعد اخذتها للآدارة حتى اهدي الموقف
سما،،،اباوع لسعد الي مغيرتة السنين وبدأ الشيب يغزو جوانب شعرة
واكول بكلبي دومك شايل همي ياسعد وتساعدني ودافع عني تمنيت اشبكة وابجي على كتفة واشكيلة هم السنين وتعب كلبي
سعد،،،اخذ المدير المرة الجبيرة والطفل تقدم لسما وحضنتة جانت كبرانة ومتغيرة بالرغم ملامحها الناعمة بعدها
همست والحسرة تاكل كلبي شونج سماوي
سما،،،نزلت دموعي باردة من سمعتة كال سماوي من زمان ماسامعة هيج احد يدلع اسمي وهمست الي مثلي شنو تتوقع يكون حالي
سعد،،،اخذت الطفل منها وحضنتة وهمست شنو اسمك يابطل همسلي مجد بوستة بطل مجودي اباوعلة يشبها كلش الشقار والبراءة اشتمة اوووف ياريحة سما كلشي منج حلو حتى ابنج
سما،،،اباوعلة حاضن ابني واكول هنيال كلبك شكد طيب حتى ابني مابخلت عليه بحبك وحنانك
سعد،،،،جنت اباوعلها ومامصدك التقيها من بعد كل هالسنين همست مرتاحة سما بحياتج
سما،،،ضحكت استهزاء راحة !!!!!
الي شفتها كدامك شلون تصارخ وتغلط شنو تتوقع خلفتها تكون؟
صدكني انكس واتعس اني ميتة من زمان سعد من يوم الي رجعتني وتخليت عني والي كدامك بقايا إمرأة
سعد،،،،دنكت واختنكت وماعرفت شنو ممكن اردلها
طلعت المرة وكالت يلا ياوجه البومة امشي كدامي
سما،،،مشيت وراها وسعد يهمسلي سامحيني سما سامحيني
مشيت ودموعي تصب وبداخلي اكول شلون اسامحك وانت حييتني وحسستني بجمال الحياة ودفنتني بأيدك وحرمتني من الجنة ونعيمها شلون؟؟
سعد،،بيومها حسيت الدنيا تفر بية ووكعت وطلع هبوط بالضغط عندي جنت مامصدك الصدفة الي ترجع تجمعني بيها من بعد كل هالسنين وشلون صدفة؟
ومن يومها ومجد اقرب طفل على كلبي عاملتة كما ولو كان ابني كان فقير وكوة ينسمع صوتة نسخة مصغرة عن سما
،،،،،،،،،
سلمى،،،صار عندي طفلين ومن بعد سنين انتظار طلع تعيني بمدرسة قريبة علينة وجنت طايرة من الفرح بأول يوم اروح بي لدوامي تعرفت على المديرة والكادر وكعدت بالادارة واني استمع لتجارب المدرسات ومواقفهم مع الطالبات ومبتسمة ومن دك الجرس وراحت كل وحدة لدرسها دخلت عاملة الخدمة ومجنت منتبهة عليها الى ان صارت كدامي وهية دتمسح بالمكتب وهنا شهكت سما!!!
سما ،،،ابتسمت شنو هالصدفة
سلمى ،،،كمت حضنتها وبجيت على حالها والموقف الي جمعنا
سما،،،ست سلمى بعدي عني لتتوسخ ملابسج
سلمى،،،ست !!!
وج سما اني سلمى عشرة عمر بينا ودرسنا صف واحد كعدي احجيلي وين صفت بيج الدنيا واباوع لحالتها واكول عمت عيني عليك ياخوي لو تشوف هالمنظر
سما،،،كعدت وكلت اوف ياسلمى منوين ابلش وشنو احجيلج
سلمى،،،تزوجتي سما؟؟
سما،،،من بعد مارجعني سعد لبيت اهلي جنت بيومها متوقعة موتي وتمنيت هالشي بس للأسف شفت موت من نوع ثاني اخوتي من طلعت جانوا مموجودين ورجعت وهمة ميدرون بس امي ونسوانهم وامي خمشت وجهة وصارخت بية وكالت انتي على شنو ناوية سما على كسر اعراضنا لو على موتي وتضرب بوجهة وتبجي جنت مامهتمة لحالها واباوعلها بطرف عيني وحسيت بعد مايعنيني شي من بعد ماتخلى عني سعد
امي ،،،حست بخوف من ناحيتي وكلمت اخوتي حتى يزوجوني بأسرع وقت ويخلصون من همي ومااجيبلهم الكسرة والعار وفعلا ماجذبوا خبر زوجوني لأبن عمي اخو جنتنة والي جان يكبرني ب12 سنة ومتزوج وعندة اطفال والي جان يعرف بكلشي عني طبعا مااحترمني لا هو ولا اهلة وجان امر من اخوتي 
من اول يوم كرهتة وكرهت كل تفاصيلة ولعنت الساعة الي زوجوني بيها الة
وطلعت من معاناة لمعاناة ثانية ويلي الرجال وويلي اهلة وويلي ضرتي وفقر الحال وبأول حمل الي بمجودي بجيت وندبت حظي جان عندي امل بيوم من الايام يجمعني القدر بس
عد بس الظاهر قدري بعيد عن قدرة صار عندي ولدين وبنت والحياة صعبة وبعد ميلحك الي ولجهالي ولمرتة الثانية ولجهالها واهلة قدملي على شهادة الثالث وتعينت عاملة خدمة والحمدلله ساندة نفسي وجهالي وهو ميدري عن مصروفنا ولا شلون عايشين
سلمى،،،مصدومة ومامصدكة الي دأسمعة من سما ابجي واتناهت بالبجي ياربي ياسما شكد عانيتي بحياتج حسبي الله ونعم الوكيل بيهم لأهلج
سما،،،دنكت ومسحت دموعي بفوطتي وهمست سلمى اذا احجيلج متصدكين
بيوم الي تزوجت كطعت روحي من البجي وكلت لأمي ولأخوتي من اليوم انتو متوا بالنسبة الي
وفعلا اعتبرتهم ميتين ومادخلت لبيتهم الا من صار انفجار العلوة
ومات اخوية جبار الجبير وتكطعت اطراف قحطان
رحت لأهلي وبأيدي كيس جكليت هلهلت بنص الفاتحة اي هلهلت ورشيت الجكليت على امي ونسوانهم وكلت اليوم اني اسعد الناس واحس حقي وصلني وعسى حوبتي متتعداكم ولا اشوف ضحكتكم بيوم
الكل حجى عني وكالوا تخبلت وفقدت عقلي بس امي كالت شقساوتج يابنت بطني مامصدكة انتي سما
ضحكت وكتلها لا صدكي ام جبار اني سما ترباة ايديكم وضحكت من كل كلبي واني اشوف نسوانهم مكسورة وملخوا نفسهم من البجي وطلعت منهم واني ابجي واجر حسرات ومن يومها مادخلتهم واحس بعدها النار شابة بظلوعي
سلمى ،،،حضنتها وبجينا اثنينا مااتذكر باجية هيج بحياتي غير بهذا اليوم وبوفاة والدي
سألتني سما عن سعد وكالتلي قبل سنة التقت بي صدفة وسألت اذا تزوج وشكد عندة اطفال كتلها سما سعد متزوج ابد وحرم عليه اي مرة بالدنيا
سما ،،،،تباوعلي مصدومة وطلعت تمسح بالممرات ودموعها تصب
،،،،،،،،،،،،
سلمى،،،تصفحت دفتر الحياة فما وجدت اقسى من رجل اربعيني يعيش على ذكرى الماضي ويصارع قساوة الوحدة والحنين الى حب قدر الله له ان لا يرى النور
ولا وجدت اقسى من إمرأة ثلاثينية تصارع قساوة الاهل والمجتمع وتدمي جرح قلبها لتربي اطفالها
يومها فقط تأكدت  انه الحب الذي جمع سعد وسما صدفة!!
لكن لم يكون قدرآ لهما
هكذا تكون الحياة عندما لا تشاء الاقدار.......

تحيات
الكاتبة ميار الشمري