حب نسرين ♥قصة حب باللهجة الجزائرية♥

1

أنا اسمي نسرين، طفلة جزائرية بيضاء و شابة، عندي ثلاثة خاوتي ذكورة أنا الكبيرة فيهم ، المهم بابا "جادارمي" و ماما "أستاذة رياضيات" في الثانوية، كل مرة نتنقلو لولاية بسبة خدمة بابا، المهم أنا شاطرة في قرايتي و نموت عليها و أمنية حياتي نصير "محامية" قد الدنيا و نفتح مكتب كبير، جبت الباك تاعي في 2006 و الحمد لله، ثما كان في عمري 18 سنة و جبتو بمعدل مليح و دخلت كلية الحقوق كيما تمنيت و جاتني الجامعة صعيبة خطكش مكاش عندي صحبات و كانت "ماما" هي تروح معايا خاصة الأيام الأولى وقت التسجيلات و كانت تعيطلي الفنيانة هههه.

المهم سجلت و بديت نقرى كل يوم نروح للجامعة و نرجع للدار و مين داك يجي ليا بابا نروح معاه، حكايتي بدات نهار دخلت نقرى في المدرج، كيما حضرت محاضرة جا ليا وحد لولد و قالي: معليش تشديلي لبلاصة لي حداك، أنا خزرت فيه و قتلو: خلاصو عليك لبلايص عجباتك غير هذه روح المدرج كبير و عريض و دورت وجهي، قالي: يخي صامطة يخي و جا خارج هههههه، أنا شبعت ضحك، كي خلاصت المحاضرة جيت خارجة صبتو واقف قالي: واش يا الصامطة قريتي مليح؟ أنا صمطت فيه و جيت ماشية كملت نهاري و روحت لدارنا.

تاني يوم صبتو واقف حدى لاصال لي نقرى فيها أنا، عندنا (TD) كيما دخلت و قعدت جا قعد حدايا و قالي: واش هاد الصدفة مع بعضانا في ( Group ) واحد باين فيه عام هبال، أنا محكيتش معاه قع و دورت وجهي، قالي: وشحااال صامطة أنت مخدومة هكدا ماتضحكي ما والو، جيت نايضة و بدلت بلاصتي و فاتو ليام و في كل خطرة نصيبو يعيطلي الصامطة و أنا نهبل، المهم وحد النهار جا لعندي و اعطاني كراسو و قالي: معليش تكتبيلي المحاضرة هادي أنا منقدرش نحضر عندي شغالات، قتلو: إيه معليش و شديت عليه الكراس و راح، كي كملنا ماصبتوش ديت معايا كراسو للدار كتبتلو قع الدروس لي ناقصينو ما كاتب والو، وحد ربع أيام مابانش و أنا كل يوم نكتبلو هههه حلابة ههه........

وشرايكم نكمل ولا ☺☺♥