حب نسرين ♥قصة حب باللهجة الجزائرية♥

3

  وحد النهار كان يوجد في روحو باش يجي لعرس صاحبو، كي حكالي لقيت روحي أنا تاني معروضة لنفس العرس خطكش بابات لعريس صاحب بابا، تفاهمنا نتشاوفو في العرس، قلت لماما نروح معاك تشوكات، حارت كيفاه نسرين باغية تروح للعرس هههه، أنا بيتوتية و مانحبش نخالط جاتها محال كيفاش نروح للعرس، أنا حكيتلها قلتلها رايحة خطكش صاحبتي تاني معروضة بش نتلاقى بيها، ضحكت و قاتلي: صحبتك و لالا ؟؟ و غمزتلي قتلها: ماما، قاتلي: إيه ابنتي مشني مرى كون مانحسش ببنتي و سمو أنيس، بقيت حايرة، قاتلي: صدفة لقيتك كاتبة اسمو في ورقة و لقيت كراسو في البيرو ديالك، قلتلها: يا ماما و الله غير يقرى معايا و علاقتنا نظيفة و نتشاوفو غير في الجامعة هدا مكان، قاتلي: و التليفونات ؟؟ قاتلي: حبيتك يا بنتي تفتحيلي قلبك و تحكيلي و انا عارفة تربية يدي و كنت مطمنة كي نشوف الضحكة على وجهك كي تخرجي من شمبرتك، المهم بعد العرس كي روحنا زدنا بقينا نحكو في التليفون للصباح هادا العرس جامي ننساه في حياتي هنا عرفت بلي أنيس صايي دخل لقلبي و دخلت لقلبو و بقينا غير في التليفون و بقا يستنا فيا حتى روحنا و شاف ماما و بابا ملبعيد و قالي تشبهي لباباك بزاف بصح مليوحة كيما ماماك، هو بات عند صاحبو و تاني يوم جاز عليا في كارتيا و زدنا تشاوفنا و بقينا نتمهبلو و جات لقراية و أنيس ما دخلش يقرى، راح لفرنسا عندو شغالات حتى جانفي بش بدى يقرى و بديت أنا فوتنا عام هبال غير الضحك و تمسخير و قراية حاجة باينة كنت جامي نراطي ديما نقرى و لازم نروح للجامعة يالوكان مريضة المهم كي نشوف أنيس ننسى كلشي و هو كان بزاف حنين معايا و ظريف، خطرة وصلت روطار ماصبتوش، دخلت نجري للونفي مالقيتوش، كي خلاصت المحاضرة جيت خارجة لقيتو مع وحدة في الكولوار، قلبي قريب حبس و الدمعة طاحت من عيني، بقيت غير نخزر فيه و الفشلة شدتني في رجليا ما قدرتش نتحرك منبعد خممت مع روحي هذا انسان يقرى معايا برك و جامي وعدني بحاجة لازم مايروحش بالي لبعيد و مالازمش نخمم فيه هو عندو حياتو الخاصة و العاطفية لي عمرو ما حكالي عليها و أنا تعلقت بيه بزااف، زعفت بزاف و بقيت غير وحدي نبكي غاضتني و ماحملتش نشوفو مع وحدة أخرى، من بعد عيطلي ما رفدتش عليه و هو غير يصوني يصوني، بعثلي ميساج وين راكي؟ أنا والو مارجعتلوش مانكذبش عليكم غرت كي شتو مع وحدة أخرى، كي خلصت لبكى جيت رايحة شدني من يدي و قالي: وشبيك؟؟ بقيت غير ساكتة و الدموع يطيحو وحدهم بهدلوني. 

تعبت بزاف باه نكتبهالكم ياك مش خسارة فيا دعوة خير ونكملهالكم ♥