Philophobia/فِيلُوفُوبيَا🍃

الفصل الأول:نقطة البداية🌸

<<مقدمة>>
"سعات الواحد بيبقا عايش حياته حلوة اوى لدرجة انه يبقى متمسك بيها جدا..بس مش كل حياتنا هتفضل حلوة للابد و هنفضل مبسوطين..اكيد هيجى وقت و الدنيا هتوريك وشها الحقيقى..دى سنة الحياة..الحياة زى مافيها الحلو..اكيد فيها الوحش..مع مرور الوقت هنلاقى الدنيا بتبدا تسود قدامنا بالبطئ..لحد اما تحصل حاجة تخلينا مش عايزين نكمل حياتنا تانى خلاص..عايزينها تقف لحد هنا..بنحاول ننسى لكنه بيبقى صعب..صعب اوى اننا نسى ناس قريبة مننا..او بمعنى اصح..الهوا اللى بنتنفسه..فبنحاول على قد مانقدر ننسى..فبنسى كل حاجة..فنتضر اننا نبنى لنفسنا حياة جديدة مع ناس جديدة..ولا كنا نعرف بعض..ولا كان ف بالنا اننا نشوف بعض صدفة اصلا..و مع الوقت نعرف ان الناس دول..هما حياتنا كلها..واننا منقدرش نعيش من غيرهم..وان من غيرهم احنا..ولا حاجة!..و طبعا كل الكلام دة مش احنا مرتبينه ولا قولنا ان دة هيحصل..لكن كل دة حصل عن طريق القدر..القدر هو اللى كاتبلنا كدة..يمكن عشان يعوضنا عن كل حاجة وحشة حصلت ف حياتنا..او مثلا عشان يعرفنا قيمة الناس اللى حوالينا اية..الله اعلم..المهم اننا نعيشها بحلوها و بمرها صح..مع الناس اللى عرفونا طعم الحياة و قيمتها اية..هنعيشها ازاى بقا و مع مين و لية...دة اللى هنعرفه ف القصة♤" •~•~•~•~•~•~•~•~•~•~•~•~•~•~•~•~•~•~•~•
~الفصل الأول~ (نقطة البداية)
هو اية اللى بيحصل..انا مش فاهمة حاجة..انا شايفة ناس كتير لابسين لبنى و مش شايفة ملامحهم و لا حتى سامعة هما بيقولوا اية...حاولت اركز عشان اعرف فى اية..لقيت عينى بتزغلل و الصورة بدل ما بتوضح..بدات تنغوش اكتر..فضلت حبة كدة لحد ما عينى قفلت و مابقتش شايفة اى حاجة خالص..بعديها ب دقيقة كدة محستش بنفسى اصلا..هو انا مت ولا اية؟!فضلت على الحال دة حوالى ساعتين ..تلاتة اربعة خمسة!!..بعدين بدات احس بجسمى تانى بدات احس انه..لا انا..انا عايشة و بتنفس كمان..بدات افتح عينى وحدة وحدة لحد ما فتحتها كلها لقيت نور جامد اوى ضارب ف عينى وجعهالى اوى ف قفلتها بسرعة و استنيت دقيقة كدا و بعدين فتحت و حاولت مابصش على النور دة عشان اخلى عينى تتعود على ضوء المكان اللى انا فيه..بصيت جمبى..مش شايفة اى حاجة غير باك جراوند بيضة مزغللة..بدات اركز فيها ..كل شوية الصورة بتوضح اكتر..لحد اما بانتلى الصورة واضحة..انا ف اوضة لونها ابيض..بصيت على جسمى لقيتنى نايمة على سرير و فى ف ايدى محاليل كتير ...هو فى اية انا بتحاسب تقريبا..قطع تفكيرى صوت صفير جهاز كدة بصيت الناحية التانية لقيت جهاز قياس نبض القلب دة..هو من اللى انا شايفاه ف دة واضح انه انا ف مستشفى! بدات استكشف الاوضة بعينى..اية دة ثوانى..مين دة؟؟و اية اللى جابوا هنا اصلا و بيعمل اية عندى؟استغربت اوى يعنى..ازاى واحد معرفهوش قاعد معايا ف الاوضة و لية نايم على الكنبة بتاعت المرافقين ؟ عايزة اصحيه اعرف مين دة بس هصحيه ازاى و انا معرفش اسمه حتى..طب اعمل اية انا دلوقتى..هو جى ينام عندى انا ف الاوضة يعنى..ملقاش غير اوضتى..دة اية الخرا دة ياربى..بدات اناديله بطريقة غير مباشرة:بس بس..ياا كابتن..ياابنى..يا حج..يا عم اصحى بقا جتك القرف...يا بس بسس.. الله يحرقك😒
طب اعمل اية بقا..هفضل متشعلقة ف السرير دة كدة لحد اما اى دكتور يعبر امى..اية الزهق دة ياربى..بصيت جمبى على الكمودينو..اية دة الله..فازا🤓..اشطا جدا انا هوقع الفازا عشان اى بنى ادم يعبر امى..اية دة ثوانى ..طب و مين هيدفع حقها..يلا مش مهم هبقا اخلى اى حد يدفعه..وقعتها على الارض لقيت الراجل اللى كان نايم على الكنبة صحى مفزوع:اية فى اية ؟؟
انا:😂😂😂شكلك مسخرة
****:انتى صحيتى امتى دة انتى متبنجة
انا:مش عارفة انا بقالى حوالى كدا ساعتين بستكشف الاوضة
****:ااه تمام
انا:احم لامؤاخذة يا اخ بس هو انت مين و بتعمل هنا اية؟😟
****:انا مصطفى اللى خبطك بالعربية..و انا هنا عشان اطمن على حالتك مش اكتر
انا:خبطتنى؟
مصطفى:ايوة اما خبطك بالعربية على طريق الصحراوى فاكرة؟؟
انا:ل..للا...دة حصل امتى
مصطفى:يعنى من حوالى شهر و نص كدة
انا:نعم شهر و نص؟؟
مصطفى:ايوة
انا:معلش ممكن تحكيلى اية اللى حصل بالظبط..انا مش فاكرة حاجة
مصطفى:بصى هو كل اللى اعرفه انى كنت مسافر اسكندرية و ماشى على الصحراوى الساعة ٣ الفجر عادى جدا ف جيت اعمل يوتيرن لقيتك ف وشى كنتى بتتكلمى ف التليفون و ملامحك كانت غريبة..تقريبا كنتى بتعيطى ..طبعا معرفتش اتحكم ف السرعة ف زمرتلك جامد بس على مااخدتى بالك كنتى فوق عربيتى خلاص..نزلت لقيتك سايحة ف دمك ف خدتك بسرعة على اقرب مستشفى ف اسكندرية و دخلوكى العمليات و اما طلعوا سالتهم قالولى انك دخلتى ف غيبوبة و مش عارفين هتفوقى امتى..ف فضلت معاكى من ساعتها ..عشان مشلش ذنبك..انا مش ناقص والله😂😂
انا:انت هتهزر معايا...انت مين اساسا عشان تقولى كدة..اطلع برا
مصطفى:نعم
انا:مسمعتنيش...بقول اطلع برااا
مصطفى:هو انتى برج الجوزاء؟
انا:انت لسة هتهزر..بقولك اطلع برا!
مصطفى:اسمعينى بس
انا:مش عايزة اسمعك انا اتفضل برا والله هصوت و الم المستشفى عليك
مصطفى:لا حول ولا قوة الا بالله
انا:براااا
مصطفى:خارج اهو والمصحف
خرج برا و فضلت عاملة زى الضفضعة المطلقة..طب اهبب اية انا دلوقتى انا مش عارفة اى حاجة...انا عايزة اعرف انا هنا لية و بعمل اية..مقداميش حل غير انى انادى الزفت مصطفى دة..مش قدامى حاجة غير كدة
انا:مصطفى..مش من سواد عيونك يعنى اخلص
لقيته دخل
مصطفى:نعم😂
انا:متضحكش
مصطفى:احم سورى
سكتنا شوية كدة و بعدين اتكلم
:انا المفروض بعمل اية هنا؟!
مصطفى:انا هروح انادى الدكتور عشان يشوفك..هو اللى هيقدر يوصفلك حالتك اية
انا:ماشى
خرج مصطفى و عدا دقيقتين كدا و لقيته داخل و معاه دكتور طويل اوى كدة😂ابتسملى كدة و بعدين بدا يتكلم
الدكتور:صباح الخير
انا:صباح النور يا دكتور😊
الدكتور:حمد الله على سلامتك
انا:الله يسلمك😄
الدكتور:انا دكتور حسام اللى متابع حالتك من ساعة ما دخلتى المستشفى
انا:اه اهلا وسهلا
الدكتور:اهلا بيكى😊 انا بس هبص على كام حاجة كدة عشان نتاكد انك هتقدرى تخرجى
انا:اه اتفضل
جيه جمبى و فضل يعمل حجات غريبة انا مش فاهماها كدا و بعدين رجع مكانه تانى
حسام:كدا تمام تقدرى تخرجى انهاردة
انا:طيب الحمد لله..احم دكتور انا بس كنت عايزة اعرف حاجة
حسام:اتفضلى
انا:هو انا لية مش فاكرة اى حاجة خالص انا حتى ناسية..ناسية اسمى!!🤤..هو انا اسمى اية
مصطفى:نعم يختى!!😲
انا:مين الكائن دة😥
حسام:دة مصطفى
انا:ايوة مين يعنى..بيعمل اية هنا
حسام:دة اللى خبطك بالعربية..هو جابك على هنا و من ساعة ما دخلتى ف غيبوبة و هو معاكى
سكت شوية كدة و بعدين بصيت لمصطفى..حسيت بارتياح من ناحيته كدة..و اكيد الدكتور مش هيكدب مثلا...لقيت مصطفى خد باله انى بابصله ف ضحكلى ضحكة هبلة كدة..لا انا قفلت منه خلاص🙂
انا:طب كمل يا دكتور..هو انا مش فاكرة حاجة لية
حسام:للاسف انتى جالك فقدان ذاكرة مؤقت
انا:يعنى اية يا دكتور؟
حسام:يعنى انتى فقدتى نص ذاكرتك..بمعنى انك مش هتفتكرى اى حاجة حصلت قبل الحادثة..ممكن الذاكرة ترجع مع الوقت..بس دة ف حالة ان يبقى فى حد ف حياتك عارف كل حاجة عنك بيفكرك و بيحكيلك عن كل لحظة ف حياتك..لكن لو دة محصلش..ف الذاكرة هتفضل على حالتها..مش هتبقى فاكرة اى حاجة غير اللى حصل بعد الحادثة و بس
انا:يانهار اسود😣طب انا عايزة اعرف اسمى اية طيب
حسام:احنا حاولنا نعمل اى حاجة عشان نوصل لاسمك بس مقدرناش
انا:طب اكيد كان معايا موبايل..ممكن اتصل منه على اى حد
مصطفى:احم..هيهيهيه😅
انا:انت اهبل يا مصطفى؟؟!
مصطفى:لا..اصل..اصل بصراحة كدا هو وقع منك لما خبطك و طبعا اتلخمت و نسيت اخده معايا..ف احنا بقالنا شهر هنا..ف اكيد اتاخد😊
انا:انت متخلف؟؟الله يحرقك😭
مصطفى:حبيبيتسلم😊
انا:طب يا دكتور انا اقدر اخرج امتى
حسام:يعنى كمان ساعتين كدا
انا:طيب شكرا يا دكتور
حسام:العفو على اية..عن اذنكم
انا و مصطفى:اتفضل😊
خرج الدكتور و انا بصيت ل مصطفى
انا:بص بقا..انا مش فاكرة اى حاجة خالص تمام..ف معلش والله انا اسفة بس انا هنام دلوقتى و اول ماتعدى ساعتين صحينى و نشوف هنعمل اية
مصطفى:اشطا..ارتاحى و انا هبقى اصحيكى..بس ابوس ايدك ياشيخة ماتدخلى ف غيبوبة تانى😂
انا:لا انا هبقى تمام ماتبقاش اوفر😂😂..يلا تصبح على خير
هو:وانت من اهله
غمضت عينى و بدات افكر مين مصطفى دة..و انا كنت على الصحراوى بعمل اية الساعة ٣ الفجر..و كنت بعيط لية..بعدين مصطفى قال انى كنت ماسكة التليفون ف اكيد اللى كنت بتكلم معاه قالى حاجة خليتنى اعيط..حاولت اركز اوى و افتكر..بس كانى بعيد ف شريط بايظ كل اما اجى افتكر..افتكر اللى حصل انهاردة و مفتكرش حاجة بعدها...حاولت اركز اكتر بس معرفتش...فضيت دماغى خالص و فكرت ف النوم..النوم و بس
●~●~●~●~●~●~●~●~●~●~●~●~●
:بابا..ممكن تاخدنى معاك الشغل انهاردة بلييز
:لا يا حبيبتى مش هينفع..عندى ضغط شغل انهاردة و مش هينفع تيجى
:لاا بقا انت كل يوم بتقولى كدا🙁
:معلش يا حبيبتى مرة تانية انشاء الله
:لا انا زعلانة منك😢
:طب بصى ..هجبلك شوكولاتة وانا جى
:بجد يا بابى😍
:ايوة بس على شرط
:اية اية؟
:متزعليش منى و تسمعى كلام ماما
:ماتخافش يا بابى انا مش زعلانة منك..و هساعد مامى كمان😄
:شطورة يا حبيبتى..يلا عايزة حاجة
:لا يا بابى شكرا😄
:يلا سلام يا حبيبتى..ابقى قولى لماما ان انا نزلت
:حاضر...باااى😊
:باى يا حبيبتى😙
قفل الباب و جريت على مامى
:مامى ...مامى..مامى..بابا نزل
ماما:نزل🙁
:اه
ماما:طيب😢
:انتى بتعيطى لية يا ماما
ماما:مفيش يا حبيبتى..اصل بابا زعلان منى شوية..ف انا بعيط عشان هو متضايق منى و مسلمش عليا قبل ما ينزل😭
اخدت ماما ف حضنى
:متعيطيش يا مامى..بابا بيحبك اوى..ممكن يكون نسى مثلا😄
ماما:ماشى😢
:بصى..خشى خدى شاور و البسى دريس حلو عشان بابا كان بيقولى انه بيحبك اوى وانتى لابسة دريس و انك بتبقى جميلة ..ف ممكن تصالحيه ب كدة
ماما:بجد😄
:اه والله😊
ماما:ماشى..متلعبيش ف حاجة على ما اتطلع
:حاضر يا مامى😄
ماما دخلت تاخد شاور..روحت مسكت موبايلها و طلعت رقم بابا و كلمته..فضلت اتصل كتير اوى لحد اما رد عليا
بابا:نعم
:بابيييى
بابا:اية يا حبيبتى ازيك..انتى كويسة
:اه..بس مامى لا
بابا:مالها ماما 🤤
:عمالة بتعيط و بتقول انك زعلان منها و مش عايز تكلمها..ممكن لو سمحت تجيبلها شوكولاتة و انت جى...بلييز..لازم تصالحها
بابا:(بتنهيدة)حاضر ..حاضر يا حبيبتى..حاجة تانية؟
:اممم..اهه..هات معاك ورد كتير اوى لونه بينك و ازرق و ابيض..ماما بتحب الالوان دى اوى
بابا:ماشى يا حبيبتى..سلام عشان اكمل شغل واجى بدرى عشان اصالح مامى
:ماشييى ..باى😄
خلصت و قفلت التليفون و قعدت اتفرج على باجز بانى😍😊
شوية و مامى خرجت و قعدت على السرير
ماما:البس انهى دريس بقا😕
:بابى بيقول انك لما بتلبسى الدريس الازرق الطويل بتبقى شبه سيندريلى😍
ماما:يعنى البسه😍
:اه..بيبقى شكلك تحفة يا مامى
ماما:ماشى
طلعت الفستان و لبسته
:الله😍
ماما:حلو
:اووى
ماما:طب احط انهى روج..بينك ولا احمر
:بينك..و حطى منوكير بينك و كحل بينك و بلاشر بينك و توكة بينك و حلق بينك😋
ماما:😂بس يا هبلة
:حاضر😂
ماما حطت الروج و بعدين مسكت بتاع اسود كدا غريب و حطيته على عنيها...لفتلى كدة و برقت روحت ميلت راسى على جنب و برقت زيها راحت ضحكت..شكلها حلو اوى
ماما:شكلى حلو؟
:اوييى
ماما:طب تعالى بقا
مسكت ايدى و رحنا على الدولاب بتاعى و طلعت فستان لبنى قصير كدة و عليه ورد ابيض و بينك و بحملات
ماما:دة حلو
:اه اوى
ماما:طب تعالى
خدتنى و دخلنا الحمام و فتحت الدش و حميتنى و غسلتلى شعرى و قعدنا نضحك سوا..بعدين طلعنا و لبسيتنى الفستان و سرحتلى شعرى و عملتلى كحكة حلوة اوى و حطيتلى توكة بينك😍 و حطيتلى زبدة كاكاو بالفراولة😄 و راحت هيا عملت كحكة و راحت خدتنى و دخلنا المطبخ و عملنا كاب كيكس بالريد فيلفيت و جيلى بالفراولة😍 و خلصنا و شغلنا اغانى و قعدنا نرقص..بعدين جت الساعة ٥ ف ماما طلبت بيتزا من برا و قعدنا نستنى بابا و بتاع الدليفرى..بتاع الدليفرى جيه و بعدين على الساعة ٦ و نص كدة لقينا الباب بيخبط راحت ماما فتحت لقينا بابا ماسك بوكيه ورد فيه ورد ازرق و بينك و ابيض و ماسك علبة شيكولاتة راحت ماما ضحكت
بابا:انا اسف يا حبيبتى متزعليش منى
ماما:انا اللى اسفة مكنش لازم اتعصب
راح بايس ماما من راسها و خدت منه البوكيه و دخلت تحطه ف فازا رحت نطيت على بابا
:وحشتنى اوى يا بابا
بابا:وانتى كمان يا حبيبتى
:اية رائيك ف الكحكة دى
بابا:حلوة اوى ..ماما اللى عملهالك
:اه
بابا:اه جميلة..بس انتى احلى
:😍ميرسى يا بابى
بابا دخل يغير و قعدنا نتغدى و نضحك بعدين روحت انا و ماما جبنا الكاب كيكس و الجيلى و عجب بابا اوى..خلصنا و بعدين دخلنا ننام..صحيت الصبح لقيت ماما ف المطبخ بتحضر الفطار..خلصنا و دخلنا اوضة بابى نصحيه
ماما:عمرو...يا عمرو..اصحى يلا يا حبيبى..يلا يا عمرو
:بابى...يلا اصحى..يلا احنا عملنا بان كيك نفطر بيها
ماما:عمرووو..عمرو
فجاة لقيت ماما بتبصلى و بتبرق..هو فى اية..هو بابا مش راضى يصحى لية..هو لسة زعلان من مامى؟
ماما مسكت ايده و سابتها لقيتها نزلت سايبة خالص..ماما قربت منه و حطت ايدها على رقبته..بعدين بدات تعيط جامد
ماما:لا ..لا لا مستحيل..اكيد دة مقلب صح؟..عمرو انت صاحى مش كدة
:ماما..هو..هو بابى مش بيصحى لية..هو لسة زعلان منك؟
ماما:لا..اكيد بيهزر معانا..عايز يعمل فيكى مقلب..صح يا عمرو..خلاص احنا فهمنا انه مقلب..قوم بقا خلاص..يا عمرووووو
ماما بدات تسرخ جامد اوى و فضلت حاضنه بابا جامد..فبدات افهم
:ماما...هو بابا مش هيقوم تانى؟؟😢
ماما:بابا ماات...ابوكى مات خلاص..عمرو ماات😭
:لااا😢..بابى اصحى بلييز...متسبنيش يا بابى..يا بابييييى😢😭😭
~●~●~●~●~●~●~●~●~●~●~●~●~●
:بس بس..يا بنتى اصحى
انا:فى اية
قومت اتعدلت على السرير
مصطفى:مش عارف انتى كنتى بتحلمى تقريبا..و كنتى عمالة تقولى بابا..و متسبنيش..و شوكلاتة و ورد و حجات عجيبة كدة😂
انا:😕انا مش عارفة الحلم دة معناه اية
مصطفى:انتى اية حكايتك؟
انا:مش عارفة..مش عارفة حكايتى اية ولا انا مين حتى!
قولت كدة و انا برجع شعرى لورا
مصطفى:طب اهدى بس كدة و ربنا هيحلها
انا:يارب..الساعة كام عايزة امشى
مصطفى:٦ و نص..عدت ٣ سعات مرضتش اصحيكى..شكلك كان تعبان
انا:شكرا ..انا هقوم البس بقا
مصطفى:هو انتى هبلة يا بنتى؟
انا:فى اية؟😂
مصطفى:هتجيبى اللبس منين يا بنت المجنونة
انا:احم😅 ماهو اكيد مش همشى بلبس المستشفى
مصطفى:هنزل اشتريلك اى حاجة تلبسيها و هاجى..بس قوليلى بس انتى مقاسك كام
انا:☺
مصطفى:اه صح😅..طب بصى..انا هجيبلك medium..شكلك بتلبسى medium
انا:ماشى
مصطفى خرج من الاوضة و جيه تانى بعد حوالى ساعة كدة و كان ماسك ف ايده شنطة مكتوب عليها H&M ..شكله براند يعنى من اسمه كدة
مصطفى:اتفضلى..مش عارف بقا هيعجبك ولا اية..عمتا البسيه و لو معجبكيش واحنا ف الطريق هاخدك محل تانى تجيبى لبس
ادانى الشنطة..فتحتها لقيت سويت شيرت ابيض كدة و عليه قلب جنزارى و بنطلون جينز و ف الشنطة التانية لقيت كوتشى ابيض

انا:على فكرة حلوين اوى
مصطفى:بجد
انا:اه والله..بجد شكرا مش عارفة اقولك اية
مصطفى:حبيبيتسلم😂
انا:حبيبيتولع😒😂
انا و مصطفى:😂😂
انا:طب بعد اذنك بقا يعنى عايزة البس و كدا
مصطفى:اشطا انا برا اما تخلصى نادى عليا
انا:اشطا
خرج و روحت دخلت الحمام اخدت شاور سريع كدا و نشفت شعرى بالسيشوار بتاع الحمامات دة و طلعت غيرت و بعدين نديت على مصطفى
مصطفى:خلصتى
انا:ايوة
راح دخل
مصطفى:اللبس جيه تمام؟
انا:اه..تمام..يلا نمشى
مصطفى:يلا
خدنى و روحنا مكتب الدكتور خلصنا شوية اجرائات كدة و خرجنا برة
انا:يلا باى
مصطفى:نعم يختى؟
انا:فى اية؟
مصطفى:هو اية اللى يلا باى (بيقلد صوتها) هو انا كنت واخدك منتجع سياحى بنصيف و هترجعى بيتك تحطى مونوكير و تنامى؟
انا:😂اية يابنى فى اية
مصطفى:انتى يابنتى هبلة ولا متخلفة ولا نظام اهلك اية
انا:عايز فلوس المستشفى و اللبس يعنى..حاضر والله اول مالاقى شغل هديلك الفلوس
مصطفى:والمصحف انتى هبلة..بقولك اية شايفة العربية السودة اللى هناك دى
انا:اه مالها
مصطفى:دة اوبر..روحى اركبى يلا
انا:ثوانى هو اية اوبر دة
مصطفى:اوبر دة..بصى مش لازم تعرفى..روحى هناك و خلاص عشان على ماتفهمى هتكون الذاكرة رجعتلك اساسا
انا:مهو انا مش همشى من هنا الا اما افهم اية اوبر دة
مصطفى:يابنتى بطلى جنان و روحى هناك هروح اجيب حاجة و هجيلك
انا بعدم رضا:اشطا
مشيت و روحت راكبة العربية لقيت مصطفى جى و بيركب العربية جنبى
انا:كنت فين
مصطفى:كنت بجيب اكل
انا:ممكن بقى تفهمنى هنعمل اية عشان مش فاهمة حاجة
مصطفى:بصى عشان انتى قرفتينى..انا هاخدك نروح نحجز اى اوضة ف اى اوتيل هنا ...هنقعد هناك..لحد اما يجى بكرا..و نروح الحتة اللى عملتى فيها الحادثة و نشوف القسم اللى هناك..اكيد مصورين عربيتك بالردار..انا فاكر شكل عربيتك يعنى ف اكيد هعرفها...و نعرف انتى كنتى جاية منين..و نشوف بعدها هنعمل اية
انا:بص انا مفهمتش..بس اشطا😄
مصطفى:ماشى يا هبلة😂
انا:هو انت مش واخد بالك انك كل شوية تقول هبلة ..متخلفة ..عبيطة..مجنونة..بنت مجانين..اية فى اية مش اسلوب والله😂
مصطفى:هو حضرتك كاتبة اسمك على قورتك يعنى عشان اعرف اناديكى ب اية😂
انا:احم😅..مش عارفة..اختارلى اسم..سمينى انت
سكت شوية كدة و بصلى بعمق..و بعدين ابتسم
مصطفى:عشق..انا هسميكى عشق
انا:عشق؟!
مصطفى:اه..لايق عليكى..هو وحش
انا:لا حلو اوى..عشق..
سكت شوية كدة و فضلت باصاله..بعدين ابتسمت
انا بهمسة:عشق...حلو عشق

~●~●~●~●~●~●~●~●~●~●~●~●~●~●~
Hello guys👋
عاملين اية؟؟
بصوا هى دى أول مرة بصراحة اكتب قصة و أنزلها و كدة..
عايزة اعرف رأيكوا يجماعة متكسلوش ونبى😂..محبتش اكتب فكرة القصة لأنى مش موهوبة اوى فى الحكاية دى..ف انشاء الله تكون يعنى شديتكوا من المقدمة و كدة..
كنت عايزة اشكر كوكى اللى ساعدتنى و شجعتنى انزلها..انا مكنتش ناوية بصراحة..بس هى وقفت جنبى و ساعدتنى..انا بحبك جدا يبنتى والله😍😍 kookkiielsayed