ذنـــــــــــبٌ بـــلا ذنـــــــــــب ☆
الـكـاتــبــة #نـــازك_الــبــور ✎
" ² الـــبــــارت الـــثــانـــي ² "
سرّي : لا لا يذبحوني اكيد اي اي
ام سرّي : گومي يووم گومي
سرّي : گومتني بالموت گمت صرت جثة .. حيلي كله ع امي المهدود حيلها
وين اموديتني يمةة ... وين هاا وين ..؟؟
ام سرّي : اضمج يمةة اضمج
سرّي : وين تضميني .. متضميني من اهلي مينضم منهم شي يمةة .. يطلعوني من جوا الكاع
ام سرّي : اني امشي و امشيها وياية بس مادري لوين دامشيها لحد وين اريد اوصلها .. وين اريد اوديها .. المهم رجليا وين يروحن اروح وياهن .. وين اضمها .. اريد بگلبي اضمها ..
سرّي : ابجي و احجي .. مشينا و مشينا واني خوفي ياكل اباوع ع امي ساكته طول الطريق بس دموعها تجري تجرررري .. اخذت روحي دموعها .. اول مرة اشوف امي تبجي بسببي .. اول مرة اسببلها الوجع .. من الالم البروحي متت الف موته بالدقيقه ..
طبينا بساتين مهجورة اشوي بعيده عن بساتينا و مزارعنا
ام سرّي : يمة اختلي هنا بين الزرع لتخلين احد يشوفج
سرّي : وين انتي وووين تروحين تعوفيني هااا .. اخاااف وحدي يمةة اخاااف عيوووني
ام سرّي : يمةة ماعوفج ارجعلج اشلون اعوفج رويحتي .. اشوف الوضع اذا هدئوو اهلج اخذج
سرّي : جلبت بيها ..
لتعوفيني والنبي اخااف والنبي يمةةة و الله ماكدر اخاااف
ام سرّي : اخذت روحي من تبجي و تتوسل
مابيدي شي شبيدي .. بالحالتين اني راح اخسر بنتي ع الاقل ارتاح من اعرف بعدها عايشه .. المهم عايشه .. ماتحمل فكرة بنتي جوا التراب .. داخلي تملخ ماريد اعوفها و اريد اخلصها .. احس داموت و اشوفها كدامي منتهية هيج
اتحملي يووم .. اتحملي لخاطري .. ماريد اعوفج بس ماريد اهلج يذبحوج يمةة گليبي .. خليج قوية
اكعدي .. اكعدي هنا يمةة و لتطلعين ابد الا من تسمعين صوتي ..
سرّي : كعدت و ماريد اكعد اريدها يمي ماريد اعوف ايدها ..
يمة .. يمةة .. ترجعين مو .. موو
ام سري : ماريد ابجي بعد كدامها حتى لتحس بضعف و تنهار بكد ما هي منهارة ... نزلت بوستها جان تحظني و تبجي .. بلحظة ترددت ماريد اعوفها اريد اخذها للبيت و شيصير خلي يصير خليهم يموتوني وياها .. بس بلحظة ماتحمل فكرة موتها بعدها صغيرة ..
اكيد يووم اكيد ارجع .. ماعندج ثقة بامج روحي .. بنيتي الوحيده ..
سرّي : راحت .. راحت امي .. الدنيا راحت .. لملمت روحي حولي .. كمت اشهگ بالبجي ..
