الحلقه ( 13 )
روايه / للعشق وجه اخر
بقلم ✍ سحر فرج
عبد الرحمن كان معاه فى عربيته الهام ويسر وهمس.
وفارس كان معاه سلمى وكريم.
بعد حوالى تلت ساعات سفر كانوا وصلوا على القصر .
بدؤا ينزلوا من عربياتهم ودخلوا على جوا والكل بدأ يرحب بيهم .
الجده كانت فرحانه اوى أن فارس اقنعهم يجوا علشان كانوا وحشنها اوى.
كرم جرى على همس وما كنش شايف الا هى .
فارس اول ما دخل طلع على اوضته وكان طول الطريق والسفر مابيتكلمش خالص مع أن سلمى حاولت تهديه .
وكانت عماله تحاول تقنعه أنه يسامح يسر .
حسين رحب بالكل وسلم على الدكتور عبد الرحمن والهام .
وخد عيال اخوه فى حضنه وسلم عليهم.
هيام جريت على كريم وفضلت تحضن فيه وتبوسه لأنه فعلا كان وه
حشها اوى .
قعد الكل وبدؤوا يجهزوا الاكل علشان الكل يقعد يتغدى .
بس قبل الغدا الكل طلع على اوضته علشان يغير هدوم السفر .
اتجمعوا الكل واتغدوا وجهزت ليهم ملك الشاى .
عبد الرحمن كان قاعد مش على بعضه وكان عاوز يفاتح الحاج حسين فى الموضوع بتاعه هو وسلمى .
وبعد ما اتشجع والهام غمزتله أنه يفتح الموضوع بدأ يتكلم .
عبد الرحمن .... الصراحه يا حاج حسين انا جيت النهاردة علشان كنت عاوز افتحك فى موضوع مهم.
حسين ... انا تحت امرك يا دكتور عبد الرحمن اتفضل .
عبد الرحمن .. انا يا حاج طالب القرب منك فى اختك سلمى.
حسين ... اختى سلمى يا دكتور ؟؟؟؟
الهام .... الصراحه يا حاج انا عمرى ما هلاقى واحده لعبد الرحمن اخويا افضل من سلمى .
ادب وجمال وتربيه وعيله والافضل من ده كله انها اخت المرحوم احمد الله يرحمه .
حسين ... وانا عمرى ما هلاقى لاختى افضل من الدكتور عبد الرحمن. بس .......
وسكت .
عبد الرحمن .... بس ايه يا حاج ؟؟؟
حسين ... انا قصدى الظروف اللى مرت بيها سلمى وموضوع طلاقها والخلفه ده .
عبد الرحمن ... معلش يا حاج بعد اذنك الطب اتقدم جدا
وانا عارف كل الظروف اللى هى مرت بيها .
انا عاوز سلمى لنفسها مش علشان خلفه ولا عيال انا شريها هى .
هى ملهاش ذنب فى انها مخلفتش دى حاجه بتاعه ربنا وبس.
