درب العشك

14....

هلا وغلا ياأروع متابعين وقرآء 💕
يسلملي تفاعلكم ويارب يزيد اكثر ..
صعدوا البارت وسوو تاگ الاصدقائكم ..
///البارت الرابع عشر///
#درب_العشگ🔥
#بقلمي_الكاتبة_شمس

بصدمة وصوت مخنوگ گتله صگر انت شتسوي هنا .
واحس الصوت بالگوة يطلع مني !!
هو من شافني ارتبك ..
اتقرب مني . ويحجي بصوت خافت . رفيف ..
تركته ورحت ركض الغرفتي !!!

صگر ..
جانوا اكو ناس يم الشيخ .. جايين على قضيه كتل وطالبين ابوي يتدخل ..
وعرفت شغلتهم تطول ..
گلت الرفيف .. لاتنتظرني وتنام .. لان ادري بيها حامل  وتتعب بالدوام والبيت ..

بقوا الجماعه فوگ 12 بالليل  ..
اني بالي يم روحيتي . بس لا منتظرتني هسا ..

كملوا وطلعوا . وبقينا نحجي اني والشيخ بشغله عمتي وزينب ..
گتله يابة .
الصبح من حاجتنا عمتي وگالت استعجلوا بشغله الزواج اني ماحجيت ولارديتها لأن رفيف واكفه ..

گلتلكم اي قرار ماتاخذون عني ..
جبرتوني اقبل بشرطكم وهو اعقد عليها بس .
واني وافقت علمود اخذ الي اريدها ..
بس يابويه اشوفها صعبة اخذ مرت اخوي ..
الي گضيت عمري اگللها خويه ..
الي من هي طفله حاجزها اسد ومسمايه بأسمه .
شلون تريدها تنكتب بأسمي ..

شلون تريدني اباوع بوجهها .. وهي تحلفني وتگلي خويه بروح اخوك لاتوافق ..
اني مالي رأي وماأگدر احجي ..
انت احجي وارفض بمكاني ..
خويه اموت اذا تسلجت بالجنسيه بغير اسم اسد ..
كل هذا وتريدني اوافق ..
حتى اذا على ورق . لااگدر اجرح مرتي ..
ولااجرح مرت اخوي ..

ودور عمتي غيرت شروطها وتريد ادخل عليها وزواج حاله حال زواجي برفيف ..
واني لو اموت ماابدل وحدة برفيف وتاخذ مكانها ..

الشيخ .. هي لعب جهال .. هاي ماشيه بالعشاير كلها تريد بناتنا يتهجولن .

صگر .. بويه وليش يتهجولن . واحنه فوگ روسهن .
وانت كاتب بستان بأسمهن للكبر يفيدهن  .
وسويتلهن راتب وغير مصرفهن .
واني مدام راسي يشم الهوا مااعوفهن بعازة شي .
وامهن وهن يعيشن ويانا معززات مكرمات .
محد يدوسلهن على طرف ..

الشيخ .. واذا زينب نست حزنها بيوم وگالت اريد اعرس وتدريها صغيرة وحلوه .
حلالنا وبناتنا يضلن للغريب ..

صگر .. زينب ماتفكر هيج.  وادريها بحياتها ماتتزوج ماتشوفها شلون مسودنه عليه ..
وبعدين هي الكلفتني وگالتلي احجيلي وي الشيخ .
مايخلينا نعقد . ويهدي امي عليه ..
واني مستعده اسويله تعهد وابصمله مااتزوج بحياتي واگعد اربي بناتي واكبرهن ..

وياشيخ ترى محد مرض زينب ومعذبها غير عمتي وزنها على راسها ..
تحرض بأمي وزينب حتى يوافقن .
وشادة  وي مرتي وتسمعها حجي .
ومرتي ماشكت ولاادري .
لو ما منى والبنات يگللي ..