#حياتي_بعد_الغربه
بقلمي
(وردة الجوري)
الجزء الرابع والاخيررر
كال هيثم : بتوسل كافي ما عاد عندي صبر
اريد اعرف انتي تحبيني لو لا
والله اذا ما تحبيني عادي ابقى زوجج علما تجتمعين ويه اهلج واطلكج
علا : من كال اطلكج كلش انقهرت ما ردت يطلكني اني احبو
علا:بهمس اني احبك
هيثم : اااشني عيدي ما سمعت
علا: ما اعرف شنو هذا الاحساس بس اعتقد هو حب اي احبك
هيثم : ولج اني هم اموت عليج فدوه لكلبج
هيثم: ذاك اليوم جان احلى يوم عندي لان صارحتني بحبها.
ومن شفتها لابسه الفستان وصايره حمره من الركص راسا ارتفعت عندي الحماوه...
حضنتها قوي وفرغت بشفافها اشتياق وحرمان شهور ..تجاوبت ويايه وعيونها الذبلانه دمرتني..
وعشنه ليله من العمر كلها حب وسعاده
ورا شهر حبيبتي كامت تتعب وتلعب نفسها اني خفت وديتها عند الدكتور سوينا تحاليل
طلعت حامل كلش فرحت ..
علا :عشنه حياتنه مرتاحين والامور طبيعيه وحبيبي شايلين بعيونه وبطني كبرت ومتلهفه للنونو
هيثم: اني عندي حنيه زايده داريتها بعيوني وهم لان اهلها بعيدين ولان احبها حب مو طبيعي...
بس صار شي قلب حياتي وحياتها
مره جنا طالعين اني وياها
كتلها اوكفي اهنا اني اروح اشتري كعك واجي
رحت شويه من اجيت شفت واحد حاضنها بكل قوه
اني فقدت ما اعرف اسيطر على نفسي
ذبيت الكعك ورحت جريت ايدها بنص الناس
كمت اسب بيها وهي بس تبجي
وصلنا للبيت نزلتها لزمت شعرها صعدتها فوك امي وكفتني
ام هيثم: ولك هيثم اش كاعد تسوي عوفها
هيثم : لحد يدخل والله العظيم اليوم اموتهاااااا
جان يصيح بصوت عالي وعيونه تجدح شرار
علا:فوتني عالغرفه كام يضربني باي مكان باي مكان يجي ايدو عليه ويسب وينعل ويدفر اخير شي ضربني قوي على بطني وكال
هيثم: بت الكلب منو هذااا ها
هذا ابن منو كلبه الا اطيح حظج
طلع من الغرفة وراح
اني جسمي كله يوجعني ولازمه بطني وماحسيت باي شي .
فتحت عيوني جنت بغرفه ابيض لونها عرفت اني بالمستشفى.
كبل لزمت بطني خفت صاير بيه شي
دخلت خالتي فرحت من شافتني كتلها
علا: خاله فدوه ابني اش صار بيه
خالتي بجت
كبل عرفت اني فقدت ابني
جان شعور كلش صعب كرهت كل شي اهلي وزوجي وخالتي كرهت كلشي حولي
كمت اصرخ بصوت عالي
حقيييير كلب اكرهك طلكني ما ارييييدك
جو عليه الدكاتره ضربوني ابره ونمت
ورا فتره كمت شفت جواد كاعد يمي
جواد هو ابن عمتي واخويه بالرضاعه
من شافني بالشارع اجا سلم عليه وحضني
بس هيثم ما سيطر ع حالو
جواد. : ولج علا اني اسف كلشي صار بسببي
بس اني راح احجي وياه لا تخافين اكيد راح يعرف الحقيقه
علا: لا جواد ما اريدك تكلو شي اني راح اعوف البيت اني واخويه اموري ونروح عالخيم.
جواد: عيب عليج اشون تروحين هناك واني موجود
اني اجيت بوحدي واجرت شقه تعالي عيشي ويايه
علا : شكرا جواد كوم نروح هسه
راح جواد سوة معامله خروج وطلعنه رحت حتى اجيب اغراضي و اجيب اموري دكيت الباب طلع اموري كبل بجه كال وين رحتي
اني ما جنت اكدر احجي جواد اخذو اني طلعت فوك فتحت الباب شفت هيثم
هيثم: هلا خاتون اش رجعج روحي عند حبيبج
علا : جيت اخذ اغراضي واني طالعه بس قبل لا اطلع ارمي عليه يمين الطلاق لان ما اتشرف اكون زوجه شخص مثلك .
هيثم: صرت اعصاب كلت تحلمين اطلكج
تريدين الطلاك حتى تروحين عند حبيبج والله الا اخليج لا معلكه ولا مطلكه امشي اطلعي برا
علا : طلعت واني بس ابجي اشون حبيت واحد مثلو
جان فارس احلامي جان كلش حنون ورومانسي بس مع الاسف ليش صار هيج
طلعت شفت خالتي رادتني ابقى بس ما قبلت
طلعت
اخذني جواد على شقتو
الشقه بيه غرفتين كعدت بغرفه اني وامير
بيوم الصبح كمت حضرت الريوك سويت بيض وطماطا وجاي ولبن ومربى اكلو جواد وامير وطلعو لان جواد راد ياخذ امير وياه
اني كمت غسلت المواعين اندك الباب.....
#اماسي_الليل
اندك الباب رحت فتحت
انصدمت شفت هيثم كبالي ردت اسد الباب
بس هو فات عالشقه
اني ردت انهزم عالغرفه بس لزم ايدي قوي واخذني عالهول كعدني
هيثم : علا اني اسف اسف على كل شي اني من شفتج بحضن واحد غيري فقدت ما اعرف اش اسوي الله يخليج سامحيني
علا : وابني تكدر ترجعو اذا كدرت اني اسامحك
هيثم: ما اكدر بس راح اسوي اي شي تطلبيه مني ارجوج الله يخليج
من يوم الي عرفت جواد اخوج لهسه اني ما اكدر انام
الله يخليج سامحيني اريد انام يمج وتسامحيني
علا: كوم اطلع برا
هو يحجي واني ابجي هو جان يبجي بحياتي ما شفت هيجي يبجي
شاف ماكو فايده كام وصل لباب الشقه
وكع انغمى عليه اني ما عرفت اش اسوي
سحبتو خليتو عالقنفه
جبت ماي ارش عليه ما يفيد
رحت جبت عطر شم عطر رجع وعيو بس جان دايخ كثير .
علا: هيثم ليش هيجي صار بيك
هيثم: خفتي عليه اكيد بعدج تحبيني
علا ما وكت هذا الحجي اكيد ما ماكل
هيثم: اي صارلي يومين بس اشرب ماي
علا: ولك ليش مو تمووت ليش هيجي تسوي بنفسك اذا متت اش اسوي بنفسي ها
ليش ابد ما تفكر
هيثم : يعني انتي سامحتيني؟ حبيبتي عمري دكولي سامحتك
علا: اني من زمان مسامحتك بس جنت شايله بكلبي عليك.
كوم هسه لسويلك اكل زين
هيثم اي عفيه بيض وطماطا من ايديج تطلع تخبل
علا:اي هسه اسوي
رحت سويت بيض وطماطا وقطعت خيار وجبت خبز اخذت صينيه وخليتو يمو اكل الاكل
هيثم : اكلت جان كلش طيب
هيثم : علا اني اسف اتمنى تنسين الي صار خلي نفسج بمكاني اذا شفتيني حاضن بنيه اش راح تكون موقفج ها جاوبيني رحمه لوالديج
علا: جنت ابجي وهو يحجي كتلو
سامحتك بس اوعدني ما تشك بيه مره لخ لان هالمره اكيد ما راح تشوفني
هيثم تدللي
اخذتها ويايه عشنا حياة سعيده
علا جابت رقم اختها من امها
جتي تزورنا اختها هسه عايشين بتركيا
كل فتره نحجي ويه ام علا وابو علا
بعد شهرين اكتشفنا علا حامل داريتها كلش وجابت بنيه تخبل سميناها عبير
وهسه بعد سنتين اتحرر جزء من الموصل
طلعو بيت اهل علا راحو ع اربيل واحنا هم رجعنا اجرنه بيت باربيل ومنتظرين تحرير الموصل بالكامل وانشاء الله نرجع قريبا
نهايه القصه اتمنى تعجبكم وان شاءالله نالت رضاكم.اني اول مره اكتب وهاي القصه من واقعنه..تحياتي (متفائله في زمن اليأس)
حبيباتي اني مره نشرت قصصي على صفحه اماسي الليل على الفيسبوك وهسه نشرتها اهنا
🌸🌸🌸🌸🌸🌸🌸🌸
نهايه قصتنا وهاي قصه بيت من بيوت عراقنا الجريح يارب تنرفع هالغمه ويرجع وطنا يلملم جروحه...
اتمنى تنطوني رايكم بالقصه
اذا تحبون استمر علقولي
