الكلام ده على لسان المبدع : Mohammed Esmat
مش انا اللي كتباها ومليش أي دخل فيها..
لينك بروفايله علي الفيسبوك : https://www.facebook.com/mohammedesmaat
---------------
اللي جاي تفريغ لمجموعة رسايل صوتية لقوها علي تليفون مرمي في مكان مهجور و مش معروف مين صاحبه حتي الآن
9 يوليو 2017 .. 2:45 بعد مُنتصف الليل
سكوت إزيّك ، أنا كودي ، الحارس الليلي ، لاحظت شوية حاجات غريبة بتحصَل هنا مؤخرًا ، بدات أحِس إن في حد بيحاوِل يقتحِم المكان ، مفيش حاجة جدية أوي ، يمكن يكونوا شوية أطفال بيحاولوا يستكشفوا المكان بما إنه مهجور ، بس بصراحة ... أنا حاسِس إني خايف ، عمومًا متشغلش بالك ، شوية و هبقى كويس ، علي أي حال مستني ردك عليّا و يا رب تكون بخير
11 يوليو 2017 .. 1:00 بعد مُنتصف الليل
آسف إني بزعجك مرة تانية ، الموضوع كُله إنك الوحيد من حُراس الأمن اللي قال إنه شاف حاجة غريبة في وردتيه ، عشان كدا إنت الوحيد اللي مش هتقول عليّا مجنون لمّا أحكيلك شُفت إيه ، أنا كودي بالمُناسبة ، إنت عارف إننا بنحرُس مؤسسة طبية مهجورة ، صح ؟
كُنت في دورية مرور و لمّا رُحت الجناح الغربي سمعت صوت غريب ، زي صوت الكُرسي المُتحرك القديم لمّا يزيّق ، لمّا فحصت الجناح كويّس ملقيتش أي حاجة ، إنت مريت بحاجة زي كدا قبل كدا ؟
مازلت مستني ردك ...
18 يوليو 2017 .. 12:00 مُنتصف الليل
( صوت تنفس ثقيل ) .. اللعنة ، اللعنة ، سكوت لازم ترُد عليّا ، أنا لسّه بادئ الوردية بتاعتي حالًا و لمحت شخص بيقتحِم المكان ، عادةً دا مش هيخوفني بالشكل دا ، لكن الشخص دا كان لابس قناع مُخيف ، عارف الأقنعة المطاطية الضخمة اللي بيلبسوها الناس في الهالوين ، بس القناع مكانش فامبير أو زومبي أو حاجة تقليدية زي كدا ، لا .. القناع كان شبه راس الغزال بس ملامحه شيطانية و له قرون ضخمة ، ( صوت تنفس ثقيل خايف ) ، اللعنة عليه ، كان بيتحرّك بسُرعة ، حاولت أتتبعه لكنه إختفي في الجناح الغربي ، دوّرت كويس في الجناح دا خصوصًا إني سمعت صوت غريب فيه من كام يوم ، لمّا ملقيتش حاجة قررت أتصِل بالشُرطة ، وصلوا بعد دقايق ، إنت عارف أهمية المكان اللي بنحرسه طبعًا ، لكن ملقوش أي حاجة برضه ، لكن قالولي إن اللي شُفته مُمكن يكون أحد أعضاء الطوائف الشيطانية و لازم آخد بالي كويّس ، لو حصل حاجة جديدة هبلغك ، حاول تتصل بيّا
19 يوليو 2017 .. 3:30 بعد مُنتصف الليل
حبيبي ، أنا جوليا ، أنا عارفة إنك في الشُغل ، حاول تكلمني في أقرب وقت عشان أعرف هترجع البيت إمتي ، أنا عارفة إنك بتشتغل أسبوعين و ترتاح أسبوعين بس إنت وحشتني
صحيح ، صاحيك من الشغل إسمه كودي أو كادي إتصل و بيقول إنه مش عارف يوصلك ، إبقى كلمه
هشوفك لمّا ترجع البيت ، بحبك
19 يوليو 2017 .. 3:35 بعد مُنتصف الليل
( صوت شوشرة مُخيفة إستمر لمُدة 5 دقايق ) ، ( صوت مرعب بيتكلِّم ) هشوفك لمّا ترجع البيت هشوفك لمّا ترجع البيت هشوفك لمّا ترجع البيت هشوفك لمّا ترجع البيت هشوفك لمّا ترجع البيت هشوفك لمّا ترجع البيت هشوفك لمّا ترجع البيت هشوفك لمّا ترجع البيت هشوفك لمّا ترجع البيت هشوفك لمّا ترجع البيت هشوفك لمّا ترجع البيت هشوفك لمّا ...
1 أغسطس 2017 .. 2 بعد الظُهر
سكوت ، إنت فين ؟ .. أنا كودي بالمُناسبة ، بقالك أسبوعين مُختفي ، لإنت إستقلت و لا إيه ؟
مش عارف أوصلك و زوجتك كمان قلقانة عليك ، حاول تطمننا عليك
1 أغسطس 2017 .. 11 ليلًا
آسف إني بتصِل بيك كتير كدا ، أنا كودي ، بس نسيت أقولك حاجة مُهمة ، أنا علي وشك أقبض علي الشخص اللي بيقتحِم المكان ، في الغابة الشرقية اللي جنب المبنى لقيت حاجة كدا شبه مُخيمات اللاجئين ، و لقيت مانيكان مربوط في شجرة لابس القناع المُخيف اللي قُلتلك عليه ، حاجة مُرعبة و غريبة .. صح ؟
كلمت الشُرطة و قالولي بكرة هيمشطوا الغابة كُلها عشان يشوفوا إيه اللي بيحصل هناك و يحلوا المُشكلة .. لسّه مستنيك تكلمني عشان تطمني عليك
3 أغسطس 2017 .. 10:30 ليلًا
سكوت ، إنت لازم تطمننا عليك ، مش عارف أتكلِّم مع حد في الموضوع غيرك إنت بس ، الشُرطة مشطوا الغابة و قالولي أخبار مُخيفة بخصوص مُخيّم اللاجئين اللي حكيتلك عنه ، إتضح إن اللي مربوط في الشجرة مش مانيكان ، دي جُثة شخص مقتول بوحشية ، أنا حسيت عشان كدا خُفت أقرب منها لكني تمنيت إنه بس يبقي مانيكان مش أكتر ، القناع كمان مش قناع ، دي راس غزال متفرغة من جوا ، أنا مش هكمِّل هنا ، أنا هعمل زيك و هستقيل ، المهم .. كلمني عشان عاوز أتطمن عليك ضروري
3 أغسطس 2017 .. 3:33 بعد مُنتصف الليل
( صوت شوشرة مُخيفة إستمر لمُدة 5 دقايق ) ، ( صوت مرعب بيتكلِّم ) راس غزال متفرغة من جوا راس غزال متفرغة من جوا راس غزال متفرغة من جوا راس غزال متفرغة من جوا راس غزال متفرغة من جوا راس غزال متفرغة من جوا راس غزال متفرغة من جوا راس غزال متفرغة من جوا راس غزال متفرغة من جوا راس غزال متفرغة من جوا راس غزال متفرغة من جوا راس غزال متفرغة من جوا راس غزال متفرغة من جوا راس غزال متفرغة من جوا راس غزال متفرغة من جوا
5 أغسطس 2017 .. 6:35 صباحًا
( صوت تنفس ثقيل ) لا .. لا .. لا.. لا .. اللعنة ، يا الله .. لا .. سكوت أنا كودي و لازم تسمعني كويس ، كان لازم تبقى هنا و تشوف عينك ، أنا مش عارف إيه اللي أنا شُفته دا بالظبط ، اللعنة .. أنا رجعت الغابة و مكانش لازم أعمل كدا بس فضولي كان أقوي مني ، مش عارف هتسمع المُكالمة دي و أنا حي و لا هكوت مُت ، مش قادر أصدق ، مكانش قناع و مكانش مانيكان ، مش عارف إيه اللي شُفته دا بس عارف و مُتأكد إنه شيء شيطاني مش بششري ، مستحيل يكون بشري
كانوا كتير ، أكتر من إني أقدر أعدهم ، واقفين في القبو بتاع الجناح الغربي ، لمّا فتحت الباب المكان كان دافي و رائحته كريهة أوي ، كلهم لابسين رؤوس غزلان متفرغة من جوا و مزينة بقرون طويلة ، باصين للحوائط بهدوء و صمت ، فجأة كلهم بدأوا يبصولي ببطء ، خرجت أجري من القبو لكن كانوا بيجروا ورايا
واحد منهم كان بيجري ورايا و هو بيدفع عربة تسوق حديد من بتاعة المولات و كانت بتزيّق ، هي دي مصدر الصوت اللي سمعته قبل كدا ، جوا العربية كان فيه جُثة متغطية ، لمّا وشها إتكشف إكتشفت إنها مش جُثة و مش شيء بشري ، شيء شيطاني قبيح عاجز لكنه بيتحكم فيهم كلهم عشان ينفذوا رغباته ، عشان أهرب منه مدخلت جوا الغابة و قلت أكلمك ، طمني عليك
أنا هقفل عشان سامعهم بيقربوا و خايف يسمعوني .. سلام
أنت تقرأ
"In The Dark Side/بالجانب المظلم"
हॉरर[Completed] #19 in horror from 767 story #8 in ghost #9 in scary تحذير ⚠ : لـا ينصح بقراءه هذا الكتاب من أقل من 12 عام أو أصحاب القلوب الضعيفه.. الكتـاب ده مختلف عن أي كتاب.. كل فصل هيبقي له قصه مٌختلفه عن التانيه وهيبقي في حرص شديد أن كل القصص تب...
