البارت التاسع ٩
حسام .واذا عدتها شتسوين
هدى ..افكس وحدة من عيونك واذا عدتها بعد افكس عينك الثانيه
حسام واهون عليج اظل بدون عيون
هدى..اي احس ماعيونك تشوف غيري وتكول عنها حلوة
حسام..هداوي قلبي اكول لج كلمه وحطيها ببالج عيني اللي اشوفج بيها تختلف عن العين اللي اشوف بيها باقي الناس
هدى..فرحت بكلمه حسيته دخل قلبي
حسام ..انا ماحبيت شكلج تدرين حبيتج قبل لا اشوفج.
هدى.هاي شلون بالله
حسام والله شبيج من سمعتج تغنين وانا قلبي كال هي هاي اللي راح ترتاح وياها
هدى.اغني🙂 وين سمعتني اغني
حسام ..من اجيت للمدرسه وكانت وحدة من المدرسات راجعه من السوق وانت غنيتي لها مالي شغل بالسوق
هدى..يبووو وين سمعتني
حسام .سمعتج وعلى كولتهم الاذن تعشق قبل العين احيانآ وانا عشقتج من صوتج
...
صار يوم الحفله والحمد لله طلعت اميرة مكياج نازك بس المشكله من فرحتي بالفستان لان موديله ضيع عمليه صدري ما انتبهت ان بي فتحة على طول الرجل بعد مالبسته الا انتبهت
رجعت للبيت وماما ماقبلت انزل قبل العقد خافت من كلام ام حسام خاف تاذيني بكلامها بعد شويه صاح ابوي وطلبني علمود العقد وتعرفون العادات كرر السيد اللي عقد لنا كلامه ٣ مرات يله نطيت الموافقه
حسام..نبهت على امي ابد ماتزعل هداوي بكلمه.
من صاح الها ابوها علمود العقد طار قلبي من الفرح اخيرا راح تصير الي بقى السيد يكول الكلام وهي ماترد انا هنا خفت كلت يجوز امي سمعتها كلمه وهاي بطلت والله تسويها هداوي وب٣ مرة كالت نعم قبلت هنا ارتاح قلبي
.عقد النا السيد وصارت حلالي سلمت على عمي وابوي بارك لي والاهل وانا قلبي هناك يمها اريد اشوفها
هدى من خلصت عقد اجيت كعدت يم النسوان انا فستاني مال حفله سواري يعني مو تله ونفش وانا اصلا طويله وعندي ورك مقوس على كولت سارة فد اطلاله مميزة
سارونة ماقصرت وياي ترفع معنوياتي.عمتي نظرت لي نظرة ماعرفت افسرها بس ماكانت استهزاء يمكن تفاجأت عبالها راح اطلع مو حلوة.دقايق ودخل حبيبي فدوة لطوله لابس بنطرون جينز فاتح وقميص سمائي وسترة نيلي كان ستايله يجنن.كعد بصفي وانا كامشه الفتحة مال الفستان بيدي ومن كالو لبسو الحلقات ما انتبهت بعد تركت الفستان ورة شويه شاورني حسام..غزالتي هاي شنو ؟
هدى..استغربت كلت له شنو؟ أاشر لي بعيونة على الفتحة انا بسرعه غطيتها هو ضحك كال صار لي ساعه اباوع شبعت
من خلصت الحفله رحنا للمصور واخذنا هوايه لقطات من رجعنا كال ابقى عندكم ونطلع نتعشى برة .من وصلنا للبيت واهله رادو يروحون عمتي اصرت على حسام يروح وياهم وكالت له عيب خالك جاي من السليمانيه علمود خطوبتك وباجر يرجع ...انا هنا دخنت لان خاله معناها بنت خاله اكيد جايه صار الليل وحسام ماخابرني ضليت الوب تالي اتصلت انا
حسام..الووو
هدى.هلا .شنو عمي من لكة احبابه نسى اصحابه
حسام..انا انساكم انتم بلقلب
هدى..ايي مبين شوفك اتصلت حجيت
حسام..ملتهي عندنا خطار وخالي
هدى..ايييه الله يخلي لك خالك وعايله خالك
حسام..هاي شنو هاي عايله خالي شكو بالسالفه
هدى..ليش مو من الاقربون
حسام..هدوووش احجي شبيج اكو شي مضوجج
هدى..لا ماكو شي
حسام..هدوشتي انت بس اللي بقلبي وبعيني لايظل بالج
هدى..اعرف ومتأكده
حسام..ااه من غيره النسوان
هدى..غيرة؟ لا متوهم
حسام..ههه متوهم
هدى يله انا استأذن خاف اتاخرت على خطارك .تصبح على خير
حسام اجمعين.احبك ياقلبي
مرت ايام خطوبتي كانت احلى من العسل كنت سعيدة وحسام كان يعاملني مثل الاميرة شنو اريد صار وتم اتفقنا الزواج بعد ما ينتهي دوام
حسام..هداوتي الغرفه ترديها خشب عراقي لو غرفه تركي
هدى ..حبي اريدها تركي لان اكره لون الخشب الصاج احسه يخنك
صااار وتدللين
من جهة ثانيه كنت محتارة بفستان العرس لان اريد فستان راقي ونفس الوقت مابين صدري والعرس بالقاعه يعني لازم شي مرتب ما اريد اسمع كلمة تزعجني من امه.اقترحت عليه بنت خالي افصل فستان عند مصممه بسوريا وفعلا تواصلت وياها وشرحت لها وضعي واقترحت عليه هواي افكار واخر شي صممت لي موديل يكون بيه رقبه وتنزل للصدر كله كيبور بي نقش والكيبور خيوطه تلمع مثل الكرستال وقصه الصدر شكل قلب وعليه نقش ورد تطريز ناعم وكثيف حتى يغطي والردن مالت الفستان همين كيبور .بقيت بقلق وطلبت منها تسلمني الفستان حتى البسه واتأكد منه قبل فترة علمود نلحك نتصرف اذا ماكان حلو .وفعلا كملته بوقت قياسي ووصل الفستان ولبسته ماصدكت حظنت امي وصرنا نبجي كنت خايفه من هاي اللحظه لكن الحمد لله الفستان كان روووعه .بقت الخوف الاكبر وهو يوم العرس
