#طعنة_قلبي

البارت السادس

#طعنة_قلبي
بقلمي فردوس عبد اللطيف
الجزء. السادس
حبيتي حين اشعر باشتياقي لك
أغمض عيني واستحضرك في
أعماقي يردد لساني اسمك
ويحتل أنفاسي عطرك فأنام
على ذكراك فيأخذني الحلم إليك
لاتتركيني ......
••••••••••••••••••••••••
مصطفى ..ولك امير هاي شسويت ولك كتلت اختك وهي ما اذنبت ولك راحت زوزو من بين أيدينا
امير .اختكم عار وأريد اطم عارها
مصطفى ..بعدك بعقلك المعفن دشيل وياي خلي نلحك نؤديها للمشفى ..وعود حضر نفسك للسجن
يالى شيل وياي
ام امير ..يبووووووي يمه بنتي ولك كتلتهه وارتاحيت ولك هاي اختك دمك ولحمك ولكم انتظروني البس عبايتي ولج لمى خابري ع ابوج خلي يجي ورانا للمشفى
ام امير ركضنا للمستشفى ودخلوا بنتي للعمليات واني اقرى قران وابجي
الدكتور ..احنا حانخيط الجرح الحمد لله ما واصل للاحشاء الداخليه الجرح ماخذ طبقتين ..بس اريد تقرير من الشرطه
ام أمير ...اي دكتور هسه يجي ابوهه ويروح يجيب التقرير
الدكتور ..اتصلنا بالشرطه وهسه يجون يسألونكم
ام امير ..اي يمه ترى هي وكعت على تنكه الدهن وانشكت بطنها
الدكتور ..حجيه الضربه مبينه غرسه سجين ع كل كيفكم اذا تردون تتسترون عالمجرم اكيد من راح تصحى حايسالهه الضابط وتظهر الحقيقة
بعد مرور نصف ساعه
ابو امير ..ها سميه اشبيها زينب ؟
ام امير ..الحكني كريم تعال شوف المصيبه الي احنا بيها ...اني تعبت ميصير هيج هذا ابنك يوميه هاجم على اخته وانوب اليوم الله ستر لو ما اخوته يلزموه جان كتلهه البنيه فقدت وغمى عليها مدري من النزف مدري من الخوف
ابو امير ... هسه اشلونهه ؟
ام امير ..بعدهه جاي يخيطون الجرح
الطبيب وين اهل زينب عبد الكريم
ابو امير ..اني ابوهه دكتور طمني
الطبيب ..خيطنا الجرح 4 غرز بس البنيه عدهه فقر دم والظاهر نفسيتها تعبانه لازم تهتمون بصحتها تعوضون الدم الي نزفته وكلوهه معلاك وخضروات اخذوهه للردهه
زوزو ..اسمع اصوات الاطباء وحولوني بالسديه وسمعت صوت امي تبجي وتلزم بايدي وصوت ابوي ودوني للردهه
مره انام ومره اكعد كنت تعبانه من البنج بعدين ضربوني ابره مهدئة وكتبلي علاج حتى لا يلتهب الجرح
فتحت عيني شفت امي وابوي
ام امير ..الحمد لله ع سلامتج بنيتي هاي وين جانتلج
ابو امير ..حبيبتي زوزو حايجون الشرطة يسالوج ع الحادثة
كولي وكعت
زوزو ..اعرف بابا خو مو اسجن اخوي
نزلت دموعي وكلبي يحترك من القهر لأني بوضع لا احسد عليه ...بس الي لاحظته معامله اهلي تغيرت امي وابوي نظره العطف والحنان الي ما لمستهه بالايام الي مضت بس اليوم حنونين ويعاملوني بطريقة تختلف
اجه الضابط وحقق وياي هما يعرفون القضايا العائليه وميتدخلون طالما اني نفيت ان احد ضربني وانغلق الموضوع بس امير ما اجاني للمشفى ولا شفته
بقيت بالمستشفى 3 ايام وراها كتبلي الطبيب خروج ورجعت للبيت وللكابه ....الناس سلوتهه وسعادتها بيتها ولكن اني داخله الى معتقل بعد ما وصلت مرحله من العمر والدراسه جردوني من كل هذا وخلوني اداة يحركوهه حسب عادات وتقاليد العائله
بالبيت لازم حركتي قليله وبهالفتره اهلي حاولو يدارون مشاعري ارتاحت نفسيتي وبديت اشعر بالامان
•••••••••••••••••••••••••••••••
عماد ... عمو ابو زهير اني جايك ورايد منك خدمه
ابو زهير ...تفضل ابني
عماد ..عمو انت شيخ عشيره والمهندس عبد الكريم صديقك ويحترمك ويحترم رايك واني رحت خطبت بنته ورفضني بحجه تكمل دراسه
ابو زهير ..بنته الي تدرس طبيه
عماد ..اي عمو اني وياها بس هالسنه اتخرج وأريدك تساعدني وتجي وياي وتأثر على ابو امير
ابو زهير ..دكتور عماد انت جيتني من طرف عمك صديقي وانت مبين عليك مرتب ومحترم وباجر اروح وياك لبيت ابو امير وان شاء الله يصير خير
عماد ..اشكرك عمو باجر جايلك من الفجر
ابو زهير ولك يبين انت واكع بالحب انتو الشباب مستعجلين ع رزقكم باجر بالخمسه العصر اني جاهز
عماد ..حاضر عمي
اليوم الثاني
ابو امير ...يا اهلا وسهلا ابو زهير زارتنا البركه هلا بيك عمو عماد تفضلوا
ابو زهير ... ابو امير دكتور عماد سبق وان طرق بابكم وطلب ايد كريمتكم زينب وانت رفضته
واليوم اني جاي واتمنى ماتردني لان متعشم بكرمك وبعلاقتنا وصداقتنا واني متاكد مراح تردني
ابو امير .. جيتك ع راسي ابو زهير انت تعرف البنيه تدرس طبيه وتعبانه ع نفسها والزواج حاياخرهه عالدراسه هو هذا سبب رفضنا احنا ما رفضنا عماد لشخصة ولكن رفضنه توقيت الزواج والبنت مصيرهه تتزوج
ابو زهير ..ابو امير الولد شاريكم وخوش ولد ومستعد يتعهد يخليها تكمل كليتهه وهو هم طبيب يساعدهه بالدراسه توكل ع الله ابو امير ولا تردني
ابو امير ... جيتك ع راسي ابو زهير ممكن تنطيني كم يوم اسال امهه اخذ راي البنت
ابو زهير .. اخذ اسبوع وأريدك ماتفشلني
ابو امير ..شيخ ما عاش الي يفشلك بس هذه شكليات حتى الشرع هم يكول ناخذ راي البنت
ابو زهير ...خير ان شاء الله نلتقي بعد اسبوع نقرى الفاتحه ونسمع الهلاهل
ابو امير ..خير ان شاء الله
•••••••••••••••••••••••••••••••
ابو امير ... سمية رجع خطبها مره ثانيه وهالمرة جايب وياه شيخ ابو زهير لان يعرف يأثر علي بس اني ما مقتنع
ام امير ..لعد شراح دكوللهم
ابو امير ..محتار شكول وشطلع عذر
ام امير ... والله احترنه اشو حتى الدراسه انحرمت منهه بعد بيش نتحجج
ابو امير ... اني هم متردد عدنه اسبوع نفكر بي
ام امير . مو بس هاي الطبيب وصانه عليهه وكال وظعهه خطر ولازم نداري مشاعرهه واذا تبقى مسجونه هم اخاف تاذي نفسها ...خليني اسالهه هذا هم حقها
•••••••••••••••••••
سميه .. حبيبتي زوزو عماد وابو زهير اجوي خطبوج وابوج كللهم انطوني مهله اسبوع افكر
زوزو ..ماما انتو شنو رايكم ترى الموضوع يخصني وانتو اهلي انت امي وابوي انتو الي تحددون مصيري لا بيد امير ولا بيد احد بس انتو ..فدوه يوم خلوني اتزوج واخلص من هالسجن حرمتوني من كليتي وسجنتوني والولد خطبني مرتين شتردون بعد
سميه ..اذا انت مقتنعه هذه حياتج وانت تتحملين النتائج ..مو تالي تتندمين وتجين دكولين لحكوني
هذا الزواج باختيارج وانت الي حاتعرفين مستقبلج الدراسي علمود رجل
زوزو ..راح اكمل كليتي ما اعوفهه وانتو شرطى عليه بهذا الموضوع
سميه .. براحتج بنتي احنا الي يهمنه سعادتج وانت هوايه تاذيتي
••••••••••••••••••••••••••••
سميه ..ابو امير البنيه موافقة وانت احجي ويه امير وخصوصا هو البارحه طلب مني افاتحك بموضوع
ابو امير .. خير ان شاء الله
سميه ..خير ..يريدك تخطبله بيداء بنت اختي
ابو امير .. بيداء ..بنت اختج انت احجي ويه امها وخطبيها واحنا الزلم النا الصافي
سميه ..افهم من كلامك انت موافق
ابو امير ... هو من زمان حاطط عينه عليها ومتفقين عبالج ما اعرف
سميه .. هههه اثاري انت تعرف كولشي وماتحجي
بعد عندي طلب 2
ابو امير .. احجي ويه امير يرجع تلفونهه وخلي تداوم بكليتهه ترى فاتته هوايه دروس
ابو امير ..هو وينه دزيليا ..اكولج هاي شنو الصياح فوك هذا مو صوته
سميه. اي اي
••••••••••••••••••••••
امير ..ولج لمى انت هم تردين تخزينه مثل اختج الساقطه كدام خلك الله عساج بالموت بلكي تموتن واخلص منجن يا عار
وطلع من الغرفه وسد الباب حيل
لمى ..اختنكت وتبجي
زوزو ..حظنتهه وبقينا نبجي
لمى ...زوزو وافقي وتزوجي وخلصي من هالضيم الموت ارحم من هالعيشه ليش انخلقنا بنات بهالبيت اشو صديقاتنا عايشين حياتهم مو مثلنا
زوزو ...حبيبتي اني اختج ومحد وكفلي بمحنتي غيرج انت الوحيده الي وكفت وياي وان شاء الله ربي يعوضج من هالسجن بحياة افضل
•••••••••••••••••••••••••
ابو امير ..ابني امير رجع تلفون اختك زينب ومن باجر حاتداوم لان فاتتهه دروس ونفسيتهه تعبانه
امير ..بابا انت قابل ع تصرفاتهه
ابو امير ..احنا حانوافق ع زواجهه من عماد وبقت بس هي تفكر فد كم يوم وخليها تروح لحال سبيلهه
امير ..خلي نخلص من عارهه
ابو امير امك كالت تريد تخطب بيداء
امير ..اي بابا اريد أتزوجها
ابو امير .. بالخير ابني هسه روح لأختك وانطيها تلفونها
امير .. انت موافق نخطب بيداء ؟
ابو امير .. مبروك ابني
•••••••••••••••••••••••••••
امير ..شمر التلفون علي ...ها راح تتزوجين حبيب الكلب بنت الكلب يا عار
زوزو ..تسلم .. مو اني حيوانه وانت بشر تحب وتنحب وحد عنك وعن غيرك
اي اتزوج شتريد مني مو انت تريد تخطب حبيبتك بيداء وتتزوجها ..اني هم اريد اعيش وارتاح وأكون عائله قابل وحد عن خلق الله لو انت شايفنه غير شكل
خزرني وطلع من غرفتي وسد الباب قوي ماكدر يضربني لان ابوي موصي وهو يريد يهدئ الوضع علمود مصلحته
فتحت تلفوني مامصدكه ..دزيت مسج لحبيبي
زوزو ... هلو حب
عماد ... كنت جاي ادرس واجاني مسج قريته من حبيبتي زوزو
هلو عمري مشتاق بكد البحر لا بكد علو السما لا بكد حب الدنيا كولهه يا اغلى حبيبه
زوزو ..راح انام هسه باجر نلتقي بالكليه
عماد ..انتظرج الصبح اني اوصلج
زوزو .. لا لا عماد خابرت ابو الخط معود اذا شافك امير تصير مشكله نلتقي بالكليه
••••••••••••••••••••••
اليوم الثاني
لقاء حبيبين بعد فراق ثلاثة أسابيع اثنين جمعتهم المحبه والأشواق واللهفة وفرقهم العادات والتقاليد واخاف الناس تحجي وكل هالكلام الي عكر صفو هذا الحب ولكن لا بد من نهايه لكل ازمه ولابد من لقاء بعد الفراق طالما الاثنين احبًوا بعض حب صادق
عماد .. اليوم يوم لقائي بحبيبتي لبست اجمل ماعندي وطلعت من وقت وكفت انتظرهه بلهفة واشتياق
أقبلت اميرتي وهي ترتدي بنطرون كريمي وستره نيلي مكسمه على حسمها وكأنها برنسيسه وابتسامتها الخجوله كسرت قلبي اقتربت مني
زوزو ..صباح الخير
عماد ..صباح الورد صباح العسل ولج لو ما احنا بالكليه الا احظنج واشيلج وافتر بيج واكولهم هذه اميرتي
هذه حبيبتي هذه زوجتي المستقبليه
زوزو .. خجلتني عماد
عماد . عيون عماد ولج اشو ما رديتو طمنيني كلبي نار
زوزو ... بعد لا تستعجل
عماد ..احتمال يرفضون ؟ ترى اذا رفضو اجي اخطفج اقتحم بيتكم واخطفج بالليل
زوزو ..يعني تسويها ؟
عماد طبعا اسويها انت مو قاصر من حقج تختارين شريك حياتج
زوزو .. عماد انت تخوفني بكلامك هذا
عماد .. كولشي اصير رئيس عصابه مجرم في سبيل اتزوجج
زوزو .. باوع اهلي تقريبا اقتنعوا بس بقى راي اني
عماد ..ها ولج انت ماخره الموضوع
زوزو .. من حقي افكر هي كم يوم وهذا عمر راح أعيشه وياك لازم افكر قبل ما أخطو هيج خطوه
عماد ..من حقج ولو كلامج قهرني بس اصبر هي بقت عاليومين ...يعني احتمال ترفضين ؟
للحكايه بقيه
*********بقلم فردوس عبد اللطيف***********