#لو_انك_لم_تعد ... الثامن عشر...
بقلمي نوره ...
وكعت بالغرفه على الكاع اني شسويت بنفسي غبيه لو استغبي الشغله واضحه جانت كلش زين ليش ماانكمشت حضي هذا. ..... لو حضي وكعني بيد كرم
ماعرف شحيسويلي ..
ثواني وانفتحت الباب .. اجه جايب حبل شمره وكومني شمرني على السرير وتناوش الحبل وبده يربط بيه واني مستسلمه اله واحاجي بدموع وهو غضب غضب يتطاير شرار منه بده ياكلني اكل
اكوله فدوه كرم لتظلمني اني مسويت الغلط وروح ريم ضربني على حلكي اسكتي ولج اشرف منج
مجانت توجعني ضرباته بكد كلامه اعتبرني خلص ساقطه .. كتله فدوه بس لاتفضحني كدام اهلي اقتلني وخلص
لا راح اخلي الكل يعرف انت شنو
لاعفيه كرم عفيه .. بعدها سد حلكي بوصله لفها بي
وطلع .. عني
مرت الساعات احس اختنكت .. هواي تحركت ع السرير ووكعت . بالكاع اسمع صوت بجي ملك
فتت روحي .. متت قهر عليهاا .. تمنيت اني غير وحالي غير تمنيت ارجع طفله مثلهه بلا اخطاء بلا ذنوب تمنيت بس ..
من كثر الحركه وكعت الوصله من حلكي وتنفست
سمعت صوت امي يم الباب اي امي تصيحلي بصوت مخنوك غرور غرور
زحفت بجسمي وصلت للباب .. يمه ماما فدوه طلعيني منا فدوه يمه
ولج ليش هيج سويتي بينا ولج مكافيج اخوج وج اخوج تدمر سالفة رفل وهسه سالفتج فقد النطق كلش مايحجي ابد ..
يمه والله ماسويت شي محد لزمني ولاطخ شعرايه مني
ولج هذا جسمج امانه عندج هيج تسوين بي
يمه محد لزمني طلعيني اثبت برائتي والله محد لزمني يمه مااريد شي حتى لو يموتوني بس صدكيني اريدج بس تحسين بيه وتصدكيني ..
ماااسمعت صوت امي بعد سمعت صوت حجي مافسرته بعد ابد .. دعيت الله يخلصني ربي رحمتك واسعه اشملني بيها ربي سامحني واغفرلي وكعدت استغفر واني مربطه ايديه وي جسمي بحيث مااكدر اكعد او اكوم فقط ازحف ..
محسيت غفيت ع الارض .. طلع الصبح احس الباب انفتحت .. رفعت راسي كوه اشوفه كوم نزل عليه ظل يفتح قيودي .. وجايب الي اكل
وكال يله اكلي حتى ارجع اربطج
كتله مااريد اكل .. مااشتهي
كتلج اكلي ..بصياح ..
جفلت من صوته .. كتله انت موتكول عني عاهره انت صنعت هالعاهره شكو تريدني اكل وبعد ماادري شكد موتي
كعد يمي جوه ..كمش شعري ورفع راسي كال شكم واحد لزمج كش جسمي منه كتله وخر وخر اني محد لزمني گتله ابد ابد غيرك واحد لزمني ابد
ظل يباوع الي بنضرات ماافسرتها لليوم
شمرني بعيد عنه وكال طالع من ارجع انت ماكله
وطلع وسد الباب وقفله .. وين الي نفس للاكل ..
مرت نص تقريبا وانفتحت الباب .. من القفل اباوع هي امي حضنتها وبوستها كتلها مصدكتني كالت شون مااصدكج اني مصدكتج كالت هاج عبايه وفلوس وشحاطه وروحي انهزمي كرم نايم باللصاله لان البارحه كلنا مانمنه والمفاتيح ناسيهم على الطاوله .. بوستها من راسها .كالت بس وين ترحين كتلها لاياد اروح .هو كلي اذا تحتاجين شي تعاليلي وطلعت من الغرفه اتلفت ميته خوف باوعت على غرفة ريم اخخ شكد احمل قهر تمنيت اشوف ملوكه باوعت لامي بباب غرفة كرم كالت بهمس نايمين بيها قصدها على زيد وامه وتاشرلي روحي روحي .. علما نزلت الدرج على اطراف اصابعي .متت من الخوف كلبي اله شويه ويوكف . شفت ماكو احد
طلعت من باب المطبخ .. وكبل للشارع امشي واتلفت وراي .. واني وعباية امي وشحاطتها وادبج بيهن الى ان وصلت لمكان اشرت لتكسي وكتله على منطقة اياد الساكن بيها وماادري شون راح اكوله واحاجي لاياد على الموضوع راح يصدكني لو لا ميته خوف
وصلت نزلت ودكيت الباب . راسا هو طلع لان الوكت صبح وناس تروح لدواماتها شافني فتح عيونه ..
غرور شبيج شجابج هسه
فدوه اياد اني بورطه وماالي غيرك ابد والله
فوتي جوه فوتي ..
فتت جوه بالكراج واني ابجي ومنهاره
سولفت اله على كل شي من اول مااشتغلت وي ابو امجد الى ان كمشني كرم وحجيت السواه بيه كرم كله
ظل صافن اياد شويه ردت ادور وجهي واروح واستسلم الكرم واطلب منه يطلق عليه رصاصة الرحمه واخلص
طلعت ام اياد وكالت شكو وطبينا جوه وحجينه كل شي المراه ماقصرت عطفت عليه وشافت الورام البوجهي مال ضرب كرم .. يمكن هذا جان حظي هم موجودين .. كالت الصارلج موشويه صح انت غلطتي بس لازم اكو من يحتويج قبل الضياع لان انت بنيه ضعيفه والمجتمع مايرحم لتخافين احنه مراح نقصر وياج وماننسى انه انت تربطج بينه يوما ما علاقه
كتلها مقصرتي خاله .. اياد كال اني رايح للدوام اتاخرت ومن ارجع نشوف حل ..
راح اياد المره مقصرت ويايه انطتني ملابس وسوتلي اكل .. بقيت للظهر .. يمها
للعصر اجه اياد .. كال خابرتهم وجايين
اني متت خوف وحضنت امه كتلها خاله اني خايفه
اياد.. لتخافين اني راح اطلبج منهم ارجعج الي ..
غرور .. مااعرف شنو احساسي باوعتله كتله اياد انت ممجبور والله تتحمل اخطائي اني استاهل اني غبيه وماانتبه على تصرفاتي
اياد .. كل واحد منه يستاهل فرصه ثانيه ..
غرور .. متقصر اياد راح ابقه مديونه الك طول عمري
المهم مصار نص اندكت الباب ويه دكاته كلبي رجف وخفت رجليه ماعادت تحمل تشيلني ..
دخلوا بغرفة الخطار واني جنت بالهول يم ام اياد
اجه اياد صاح النه تعالوا .. جنت لازمه ايد امه ودخلنه مدنجه راسي ودموعي بعيوني رفعت راسي صار كبالي كرم وزيد .. من شافني كرم كام وكف وصم ايده واسنانه من الغضب .. كعده زيد وهدئه شفت امي رحت الها ركض وحصنتها ..
كعد اياد وامه واني يم امي مقابيل كرم وزيد
واباوع الكرم نضراته كلها تهديد ..
حجه اياد كال ياجماعه البنيه غلطت ومحد معصوم من الخطأ وهي مونهاية العالم واحنه لازم نسامحها واني مستعد اشيل الخطأ هذا واتزوجها على سنة الله ورسوله
كرم .. ماشي بس هي هسه عليها ان تختار وهي كدام عمتي يااماا تتزوج اياد وتنسى الهه ام واخ وبنت اخت يااما اني اتزوجها .. وبشروط والشروط راح تعرفها هي بعدين .. والاختيار الج
غرور .. اخر جمله كالها .. وهو يباوع الي متت خوف منه .. حضنت امي وامي تبجي وتطبطب عليه كالت باذني شهد راح ترجع الخميس وراح تصير مسؤؤله عن ملك واني تعبت يايمه مابيه على الطفله لااني ولاام زيد وانت بعد كيفج تردين راحتج هذا من حقج تردين راحة بنت اختج هم بكيفج
ممحتاجه تفكير كافي الصار لاهلي اذا مااشوف ملك طول حياتي راح اعيش بعذاب ويا كرم هم راح اعيش بعذاب الاثنين واحد
اللتفتت لاياد كتله انت رجال ونعم منك واللتفتت لامه خاله اني ماانسى فضلكم بس اني اختار اهلي كافي الصارلهم لحد هسه واني اتمنى الك كل خير
اياد .. بكيفج غرور محد يجبرج .. على شي
كرم خويه دير بالك عليها ..
كرم .. بعيني بعيني ادير بالي عليها يلا مشينه ..
غرور .. يحجي وهو يهز راسه مستهزء الله يعلم شضام الي بعد. ..
طلعوا قبلنا .. بقينه اني وامي ..
بوست ام سحر .. وودعت اياد محط عينه بعيني انقهرت عليه .. حييل حسيته جان يريدني
بس اني مااستاهله يستاهل الاحسن مني
طلعنا .. من البيت جنت مستعده لاي شي يسوي كرم بس ابقى قريبه لاهلي ..
اول ماوصلت اريد اصعد بالسياره لزم ايدي قوي وكال عاجبج السويتي مو تنهرمين من البيت انت ماتستاهلين فرصه ثانيه انت تستاهلين الموت اجه زيد بعده عني كله كافي كرم كافي البنيه موافقه على شروط ليكدام بعد شبيك كافي فضها
اجه اياد .. كال كرم لازم تتعهد هسه هنا متاذيها
كرم .. هي صارت الي هسه ومااحد اله علاقه بعد طبي ولج يله
غرور .. طبيت بالسياره ودموعي تجري اني وامي كعدنا وره وحرك زيد السياره وكرم كاعد يمه
اسمعه يخابر يكوله خالو راح اخذهه للشيخ حتى نعقد
اني بس ساكته .. وامي تطبطب عليه ولسه مااعرف شنو هي شروطه ..
وصلنه لبيت الشيخ وهناك عقدنه واني بداخلي فاضي من اي مشاعر لافرحانه ولاضايجه ..
كملنه العقد واخذونا للبيت اول وكفت بالسياره بالكراج مال بيتهم .. نزل هو بسرعه اني جنت قبل امي كاعده فتحلي الباب وطل عليه كال نزلي اباوعله بخوف مرعوبه مااعرف شراح يسوي .. ماانزلت خفت الروح عزيزه وخايفه لايأذيني سحبني من ايدي قوي وجعني كلش وامي تكوله لايمه على كيفك وياهه ميصير هيج تره .. كللها وهو لازمني عمه متستاهل هي مال ذبح ذبح ولج وينج وين المخدرات تشتغلين بيها .. وين الليالي الحمره والسهر والعربده تفوو عليج سحبني سحب ودخلني للبيت وللغرفه الجوه .. طببني وسد الباب .. اني اريد مكان اختل بي ماكو
لزكت بالحايط اجه يمي صرت بينه وبين الحايط كلبي طبل من الخوف وجسمي كله يرجف وعيوني ماصبت دمع نشف الدمع على وجنتي كال باعي شهد الخميس ترجع واني زواجي بعد شهر .. فتحت عيوني بقلبي كلت لعد واني هو حس بيه تاثرت كال اي راح اتزوج وئام نفسهه الي خربتي بيني وبينهه رجعتلي بدون مااستقتل عليها رجعتلي بملئ
ارادتها لان تحبني وتموت عليه .. اماانت زواجي وياج ينتهي عند العقد تعرفين شون يعني زواج على ورق وئام مراح تعرف اقل خطأ منج راح اشمرج يم عمامج انت هنا وجودج بس لخدمة ملك وانما لا للبيت كله
مفهوم .. مشاكل ماريد لساناتج متطلعيهه تبلعيهه اني مجرد ابن خالج وياج بالبيت وبس ولج لو حده غيرج مسويه هالشي مااهتم بس مو انت .. ولج لاخر لحظه جنت احبج بيها ادوس على كلبي واذيج اريدج تحسين بيه بس انت صنم ولاتحسين بيه ابد وكملتيها ورحتي لخطيبج السابق وانهزمتي مني
جر حسره وسكت واني وي كلامه جرت دموعي وكرهت نفسي اتمنيت اكله احبك وارجعلي بس مااكدرت كبريائي . وعزة نفسي ماتسمحلي عافني وطلع
بقيت لوحدي ابجي .. واندب حضي شبيه مااعيش مثل باقي البنات شبيه ..
مرت الايام عليه سوده وكل الوجع بيه وجع جسمي وروحي .غرفة كرم هي صارت غرفتي هو راد هيج ونقل غراضه كلهم جوه سوا اله سويت كامل كلما اطب بيها ينعصر قلبي احسها سبب دماري من الي سواه الي كرم
وبعد فوك القهر . والاسوء جية شهد للبيت وهي رافعه خشمها واني اكرب بالبيت بعدها رضا جابو يمنه بعد مااسوه العمليه .. وهو كاعد على كرسي متحرك ميمشي والاضرب ميباوع بوجهي معصب مني وكارهني ..كرم وزيد هم الي يعتنون بي وامي هم
بس اني يكرهني .. هالشي مؤلم بعد مااجان مو بس اخ حتى صديق
صرت احس احنه عاله عليهم واسمع تذمرات ام زيد وشهد وانقهر تفتحي فت
وحتى شوفة ملك تالمني وتذكرني بريم ..
لو كرم ونضراته القاسيه
زيد حالته تحسنت وشهد تدلع كدامي وتدلعه
