#أهدتني_عاراً
بارت 7
نورا ناصر
جهاد*
سحبت باكيت الجكاير وطلعت بالبلكون انصدمت من شفت عيونها اني شون مباوعتلهه عدل
هي راح تصير عليه نقمه كلما اباوع الها اتذكرني برؤى.
نزعت الستره ورخيت الربطه وشعلت الجكاره وبديت ادخن
اريد ارتاح مجاي ارتاح معقوله الهالدرجه اني حظي ردي زين شون راح اعيش وياها واني كل نظره من نظراتها راح اتذكرني بذيج يعني راح ابقى طول عمري ضايع وممرتاح.
تفكير يجيبني ويوديني احس متشرد ومهجول انتبهت على صوت الباب تندك لا مره ولا مرتين
دخلت للغرفه شفتها ممده نص جسمها ع السرير ورجليها منزلتهم منه هي والبدله مطفيه ونايمه
ثواني تأملت ملامحها مغمضه عيونها ومخليه ايدهه جوه خدهه اريد اشوف رؤى بيهه بس متشبها ابد
رؤى وجهه سمين وعدهه خدود
هي ضعيفه
ذيج شعرها اسود ومتغير لونه دائما تكول حتى يبرز لون عيوني اكثر جانت مغروره ودائما تتباهى بلون عيونها.
شفتهه فتحت عيونها ببطئ وهي نعسانه صرفت نظري منها
واتجهت للباب.
فتحته شفت كواكب
هاا شجابج ؟؟
كواكب بارتباك. ..مبروك عيني جهاد .مبروك منك المال ومنها العيال
جهاد بملل... شكرا يوم الالج
خير جايه مناك ليجاي بس تباركين؟؟
كواكب .. ..لا ابوك كال شوفوا جهاد شوو طول مااريده يصير اغم.
جهاد بعصبيه..هييي شنوو اغم
كواكب بعصبيه.. اني شعليه ابوك كال شوفي جهاد خلص شغلته
جهاد بهدوء..ولج والله اعرف مو ابويه دزاج انتي عندج الفضول قاتل
كواكب ..لا ابوك كال شوفوا جهاد شوو طول مااريده يصير اغم
جهاد ... اوك هسه اخابره
كواكب بخووف..لا لا لاتخابره عليمن متسوه هسه اني اكل لامك بعده
جهاد..شوفي ادري بي مكايل بس هلمره سماح وبعد لا تجين مفهوم ورجاءا شيلي الحمار المدد براسج تره خبلتيني اعيد وماتفتهمين لج الئ متئ اضلين هييج راح تخبليني انتي ويامن راضعه شنوو الفضول هذا.
كواكب ... اووي شعليه اني درووح ولاعندك احترام.
جهاد *
طبكت الباب ورجعت للغرفه باوعتلها بعدها نايمه
العروس مطفيه وبسابع نومه وكواكب تريد نيشان تهي بهي.
رحت بدلت ملابسي وخابرت اختي تجيب عشا
كلش جوعاان.
كالت دقايق والعشا يمك.
سديته منها
وكفت قريب منها واني اباوع الها نايمه جنها طفله.
تقربت خليت اطراف اصابعي على زندها وضغطت اريد اصحيها تكوم تبدل.
ماكو ماكعدت طالعه كبل ورايحه بسابع نومه ومبين نومها كلش ثكيل.
كعدت بصفها وشلتهه من اكتافها واني اصحي بيها
كعدت مرعوبه.
* جنه
بعد ماتركني وطلع استغربت ردة فعله شبي هذا
اذا هي البدايه هيج يتعامل ويايه شلون بعدين يلا خفه وراحه هم زين طلع حتى انزع البدله
حاولت افتحها مكدرت مالوحها القيطان بظهري
واني كلش تعبانه شفته طول بره
رحت ذبيت روحي ع الجربايه ونمت ومااحسيت اله
هو يكعد بيه.
جنه ... يممممه
جهاد ...بس صارت عيوني بعيونها خزرتها شبيج شايفه جني ؟؟
جنه ... ليش تخزرني تره عيونك تخوووف
جهاد. .. كمت من يمها كتلهه يلا كومي بدلي راح يجيبون العشا وتعلمي لا تراددين خوش.
جنه ... سكتت عنه هذا شبي اووي هسه انه بشنو رديت
شون راح انزع البدله انه سامعه العريس يساعد العروس تنزعها بس لو اموت مااكله ينزعنياهه.
وكفت يم ميز التواليت اريد انزعها مااكدر
هو كاعد ع السرير ويباوع الي بخزر اي هسه ليش تخزر.
حتى اخاف ارفع عيوني بعيونه.
اندكت الباب واني بصف الباب جيت افتحها
اجه بسرعه لزمني من ايدي گال
هيييه شنو تردين تفتحين الباب هيج وانت عريانه بالله احد يشوفج هيج
سحبت ايدي منه
كال روحي مناك يلله
عوجت حلكي ورحت بعيد عن الباب
فتح الباب دخلت اخته بيدها صينية الاكل
كللها فوتي ضمياء
دخلت تباوعلي مبتسمه خلت صينية الاكل واجت بتجاهي كالت
حبيبتي الف مبروك اني ضمياء اخت جهاد الصغيره
مساع اجيت يمج ملتهيه جنت
جنه .. هلا بيج عمري وبوستها
همست الها ممكن تفتحين الي قيطان البدله
ضمياء باوعت لجهاد وكالت ...هاا تدللين
وفتحت الي قياطين البدله وطلعت
كوه امشي بيها بالغرفه اخذت ملابس ودخلت للحمام
نزعتها وفتحت التسريحه ومسحت المكياج
اصلا من البجي سايح على خدي
الجو حار فتحت المي وسبحت كلي فد نوب
لبست بجامه ورديه لفيت شعري بالخاولي وطلعت
باوعت شفته نايم على ظهره ومخلي اثنين ادي جوه راسه لابس كيمونه سوده مبينه كل تقاسيم جسمه رياضي بامتياز.
و تراكسوت اسود حتى بنومته ثگيل.
مبين راح نكضيها الليله واحد ينام والثاني يكعد.
باوعت صينية الاكل وانه ميته جووع
بس استحي اكل
يلا مدام هو نايم خلي اسحك
تشكلت وكعدت اكل انواع المشاوي وسحك سحك
اخلي لكمه بحلكي واباوعله خاف يكعد ويشوفني
خلصت بس شون اطلع الصينيه استحي
خليتهه على جهه ورحت غسلت.
نعسانه وين انام اباوع الجربايه جبيره خلي انام بطرفها هو نايم وممتغطي واني متعوده اتغطى والغرفه كولشي مااندل بيها
خلي انام شلون ماجان.
نمت بطرف السرير وانطيته ظهري.
بسرعه غفيت.
وكعدت الصبح مالكيته يمي.
دخلت للحمام غسلت وطلعت بعد نعسانه تمددت ع السرير.
اندكت الباب ودخلوا امي وام جهاد وعلا وعذراء باركولي وبوسوني.
طلعت امه وبقينه بس احنه
تقربت مني امي وظلت تهمس بأذني
هاا شنو صار البارحه
مصار شي يمه
شنو يعني ولج
ا....ي ماكو هو نام شسويله اني قابل اوعي اكعد اخذني.
الام ...ششش سكتي ولج لاتسمع عذراء اذا سالت كليلهه كل شي تمام.
جنه ... خوش
الام .. اكلج يعني مو انت ماخليتي هو مااراد
جنه .. اي والله يمه طلعت من الحمام هو نايم.
بعدها طلعولي ملابس لبست كلبيه بيضه وبيهه نقشه كرستال ابيض وذهبي ع الصدر.
ورتبوني وعذراء خلتلي مكياج.
طلعوا بقيت اعدل ع المكياج ودخلت وحده يمي
مبين عمرها بنص الاربعينات او نهايتها ضعيفه كلش وسمرا ولابسه كلبيه عريضه يدخلون وياهه اثنين من العرض.
كواكب ... مبتسمه بمكر ... اني كواكب عمته الجهاد
جنه ... ضحكتلهه هلا بيج
وكفت يمي
كالت اي شلونكم البارحه
ظليت اباوع عليها مستغربه ضحكت كتلهه زينين
كالت جهاد يحبج ؟؟
حرجتني بسؤالها هو هذا هم سؤال واني هم مااعرفت ارد عليها شي.
توترت كلش.
دخل جهاد نقذ الموقف وهي توترت اشو هذا يخزر بيها مدري بيه امره عجيب كلش.
طلعت بسرعه وبقينه وحدنه.
اجه تقرب يمي سويت نفسي اعدل بشعري.
كال شنو جنتوا تحجون ؟؟
ابتسمت بوجهه بس هو عاكد حواجبه
كتله ماجنه نحجي شي
متقنعيني كتلج شنو جاي تحجون
على. بالي ينقذن الموقف اثاري صخمه
شون راح اكوله على اسالتها استحيت وخفت كتله ....ماكو شي مهم سالتني على عمري وشمخلصه مدرسه.
...همممم باعي خل اكولج شي يفيدج مااريدج تضمين عليه شي ماحب التضمضم وثنين هي بالذات اريدج تبتعدين عنها وماتخالطينها.يحجي وياشر ع الباب.
...ليش
....احسن مو صاحيه
وعافني ودار ظهره
....يعني انت الصاحي حركت شفايفي
اللتفت كال
....كلتي شي
متت خوف ياعزا سمعني
هزيت راسي بمعنى لٱ
كال
.....جييد
وطلع من الغرفه.
جريت نفس كلت شبيهم ذووول كلهم مو صاحيين يعني.
احس ممرتاحه كللش اختنكت سحبت التليفون ورمشت لعلا تجي يمي.
دقايق واجت
دخلتها وطبكت الباب
.... علا شوكت تروحون ؟؟
... بعد شويه يوصلونه ليش ؟؟
... ولج اروح وياكم مااريده يخووف.
... شبيج جنه انت مو جاهله.
... ولج يعاملني عبالك .. عبالك اني شرطي وهو ضابط ميعاملني زين ماابقى هنا انه اروح ارجع وياكم
... سكتي جنه تردين الناس تحجي علينه تكول ذاك موتي وهذا انهزمتي منه اكعدي وصيري ادميه ولاتحجين هالحجي كدام امي تظل قلقه عليج مابي شي رجلج جنه العافيه هي لان بالبدايه بعدين يصير محبس بايدج بس انت تصرفي عدل.
