Bejalai Betungkat Ke Adat..Tinduk Bepangal kePengingat

Duduk Ngiga Runding Jalai Pengidup

Sambung ba tusun ke 3

Udah luyer tipun ngagai aku sarinya,pagi siti aku nurun mai semua dokumin surat sakit aku enggau surat pemati Niang Kalina. Aku pagi nya lalu terus nganjung nya ngagai upis luyer enda lama, pulai ari upis luyer aku alu kerja ngagai endur aku gawa. Udah nya aku gawa seari- ari lalu terus aku ot sampai pukul 7 lemai serumba ke malam. Baru aku pulai ke rumah Datai ba rumah aku pan lalu mandi makai, sida ibuk aku benung bepeda ke tv ba bilik besai. Aku lalu terus galik ba atas bangku,bendar aku berunding bekira ke kes tua Niang Kalina nya. Bakani enda kes tu ila, taja pia aku tetap nerus ke kes tu. Aku enggai pemati Niang Kalina baka pemati uduk enggau manuk. Biar aku tusah laban nya, aku tetap nerus ke kes nya. Nadai ngawa aku enda beduit. Amat meh pemati Niang Kalina bisi reti. Meda aku tak diau aja ba bangku,dia indai tiri aku lalu nanya aku nama ga aku tak diau diri baka ke bisi utai di kelalai ke aku ba ati aku. Aku madah ke indai tiri aku, aku nadai utai dipelalai ari sida iya Aku enggai madah ke sida iya laban aku enggai ngenusah ke bala sida iya.

Enyau ke puas aku berundi, enda berasai mata aku ngantuk terus aku telelap ba atas bangku dia. Sida indai tiri aku udah meda tv pulai ngGai bilik tinduk. Aku semalam malam tinduk ba Bilik besai atas bangku. Tumu pagi aku dani sekali aku meda, aku telelap ba bilik besai,atas bangku. Aku pan lalu angkat laban ke chelap. Aku pan lalu bebungkul enggau pua baru, laban ke jam bedau chukup ke alai aku dani tinduk. Laban mata agi ka tinduk. Bedau lama aku kelelap, pending lalu bedau bengar endar. Dia aku lalu ngambi Kalina mimpi. Dalam mimpi aku, kalina datai lalu nuju aku ke benung duduk dedunga ba ruai sida iya. Atiku gaga meda kalina datai lalu nuduk ke diri ngerembai aku. Tang meh kalina enda ngayan ke mua iya ngagai aku. Kalina duduk melakang ke aku, aku majak deka nilik mua kalina ke benung melakang ke aku. Meda aku keran deka meda mua Niang kalina. Dia kalina lalu bejaku. Kalina enda ngasuh aku meda mua iya. Kalina madah mua iya jai anang malik ngagai mua iya. Aku alu nyaut kalina, aku laki nuan kalina. Nama salah aku enda meda mua nuan, jai bakani mua nuan. Aku tetap sayau ke nuan,laban aku nemu suba aku enda sedar diri ketegal aku sakit hilang ingatan. Diatu aku sayang udah gerai baka aku suba. Mati idup tua tetap begulai. Anang nuan ningal ke aku agi. Kebendar ya aku enda nemu kalina udah mati ba alam mimpi aku. Asai ke amat amat meh tua kalina berandau alam mimpi.

Kalina alu nyaut jaku aku tadi. Joe..!! Aku arap ke nuan,nyaga diri enggau manah Joe,sinu aku ngenang nuan Joe.Jaga meh pengerai nuan sereta jaga meh sida Apak enggau Emak aku,pia meh enggau bala kita sebilik. Nuan Joe anang ngenusah diri tinggal aku udah pergi. Aku pergi enda pulai agi, nuan ba menua Joe anang enda ingat ke jaku aku. Aku deka meda nuan nyambung pelajar nuan baru. Ti kitai alang alang pemandai Joe,tusah kitai deka ngiga keja baka ke diatu. Uji nuan meda ba jemari tua dia Joe. Bisi bup bank enggau kad aku kedia. Dalam bup aku dia nadai mayuh duit tang meh bisi ke pukok kena nuan beridup, Ngambi ila nuan enda suntuk.
Lalu siti agi pesan aku Joe... Ti nuan ila udah bisi pengawa, anang nuan enggai meda orang ke miskin minta makai ba nuan. Ari orang bakanya meh kitai Joe bulih berkat sampi ari sida iya.

Enda nya aja ila Joe, baka bala kaban nuan ke bisi suntuk. Pan nuan anang enggai nulong sida iya. Sida pan baka kitai sama bila tusah... Ari ke tusah kitai tau nyadi senang. Ari nya kitai enda tau meda orang ke merinsa baka sampah, sida pan mensia meh baka kitai. Kita idup ba dunya nyata, manah agu kitai begulai baka diri menyadie. Laban kitai idup baka dunya nyata mina sementara aja. Buai ati dengki enggau dendam kitai,badu kitai betatie ke agi. Utai udah badu ngenang, ampun meh penyalah orang ngagai kitai. Baka petara ngampun ke penyalah kitai. Ngambi ila pengidup kitai lantang,meruan sampai ke seput kitai padam. Petara tetap enggau kitai Joe. Lalu pia meh ga Joe. Nuan deka ngadu ke kes silam tua suba. Nadai salah nuan deka ngadu ke nya. Tang ti lebuh bicara ila. Nuan mesti deka chukup bukti ngambi nuan ulih menang. Udah kes nya ila selesai. Nuan mesti belajar baru nya peminta aku ke penudi ba nuan joe. Aku mupuk dulu Joe. Jaga manah bala tua ba menua, anang ngasuh sida iya tusah ati ba menua. Apak Emak enggau bala bukai udah kiruh amat ke nuan......

Kalina pan lalu mupuk bejalai ke puting setak kin. Sekejap mata aku meda kalina bejalai,peda aku... Kalina lalu nadai peda aku agi. Ninga jaku kalina munyi nya,enda berasai aku nyabak sesikuk lalu terus datai ba menua. Aku lalu tedani ninga nyawa aku empu ke nyabak. Sekali aku sedar nemu nya mimpi aku ba pagi hari jam pukul 4 pagi. Sekumbang aku udah gerai, aku nadai kekala ngambi kalina mimpi. Baru ya meh tudah aku ngambi kalina mimpi. Dini ati aku enda beraie ngenang nasib tua kalina begulai enda lama,besai amai penguji petara ngagai aku sekumbang aku idup ba dunya nyata. Udah aku ngambi kalina mimpi,mata enyau enggai pejam-pejam ke tinduk. Aku angkat duduk ba tilam aja nyandar ke belakang ba bantal. Baru aku teringat ke Jaku kalina ngagai aku, iya bisi nyimpan bup bank iya ba Jemari. Teringat ke nya aku lalu angkat terus masang api. Aku terus ngiga utai dalam Jemari tua kalina. Katas bebaruh utai ba Jemari dia abis ditilik aku nadai ga temu aku. Enyau puas aku nilik utai dia. Aku merunsai ke garik tua Kalina dia. Sekali perunsai ke aku Kain kalina ke bedau 9 lambar ke dalam jemari dia. Peda aku bup bank enggau kad kalina labuh ari lipat kain ya ke suruk dalam lipat kain dia

Sambung ba tusun ke 4