#في_طرفة_عين
بارت 17
نورا ناصر
*فرات*
بعد عركتنه اني وهديل راحت لأهلها وبيوم رجعت للبيت دخلت للغرفه شفتها راجعه.
غلست عليها وماحاجيتها تقربت من سرير عبود شفته نايم تلمست خده وبسته.
اتقربت مني هديل وخليت ايدها على كتفي كالت
يعني بس عبود الي يهمك ام عبود ابد ماالهه قيمه عندك ؟
اللتفتت الها كتلها ختشوف نفسها شنو سوت وبعدين تسأل هذا السؤال ؟
وخرت عنها ورحت اغير ملابسي
بدلت ورحت تمددت على السرير وهي اجت يمي.
تحسرت وكالت:
انت لو تدري اني شكد احبك وسويت المستحيل على مودك جان متعاملني ببرود هيج حس بيه فرات اني احبك.
تحبيني تتحمليني مثل مااني مو تهدديني بابوج مو ترحين تحجين عليه كدام ابويه وتقللين من قيمتي هذا كله نزلج من عيني.
ميخالف فرات فدوه ماتنعاد.
نطيتها ظهري وكعدت اكلب بالفون.
وهي تمسح على ظهري وكتفي وتتوسل بيه
فرات كافي تعاملني هيج اني غلطت بس ابقى مرتك وام ابنك.
جان اكو حجي اريد اكوله الها انت مرتي وبس ليش ماجاي احس بمشاعر اتجاهج ياترى شنو الي خلاني اكرهج لهالدرجه بس سكتت وماردت اجرح مشاعرها.
درت عليها وسحبتها يمي كتلها اريد انام ياريت كافي خلي نسد الموضووع ونبدي من جديد.
كالت ميخالف اهم شي تبقى الي.
ليش اني المن هسه هو اني الج انت وعبود ومن طلعت وتخلفت عن موعد عزيمة اهلج بدون قصد جنت ابيت نجم.
اي حبيبي هيج اريدك اني ومرايده شي غير هيج.
يلا هسه نامي واني هم لازم انام.
ليش شنو وراك باجر.
اريد اروح الغير طبيب يشوف عمليتي تعبت من النسيان اريد استعيد ذاكرتي اشو هذا الطبيب مدا اثق بي.
حبيبي انت هيج شبيك مبيك شي وبعدين الطبيب شيسويلك هذا تاثير الحادث.
ميخالف اني اريد هيج.
ماشي براحتك.
*نادين*
باالايام الي اروح بيها للشغل ياسر يبقى بالبيت واذا عدها ام بنين شغل او طلعه ابقى اني يمه او بين ما تطلع اجي على وكت.
جنت اصفن واحمد الله على وجودها بحياتي رغم كل شي اني محرومه منه الله رزقني صحبتها وصرنا اخوات واكثر رغم فارق السن بينا بس الصداقه متعرف عمر.
وبنفس الوقت الله ينطي شي وياخذ شي
اخذ مني الاهل والزوج ورزقني بيها
دائما جنت اكول حمدلله بعدها الدنيا بخير.
بعد العركه الصارت بالمكتب بين زياد و فرات
وقراري بأن احاجي الفرات بدون ميدري زياد.
رجعت للبيت واني مقرره ارجع ياسر لانهار
صح بعيد عني بس اهم شي يكون بأمان وايضا سعيد بين اخوانه وادعي الله يهدي غيث ويوافق.
دخلت للبيت شفته بالصاله ديلعب بالعابه
من يشوفني يبتسم ويجي يمي
هاا جيتي الله يساعدج.
هيج يكولي احس التعب والالم كله يروح ويتلاشى.
ابوسه على راسه واكوله اي حبيبي جيت وانطيته الي جايبته اله ويايه حلويات و ايس كريم لان يحبه.
