#في_طرفة_عين
نورا ناصر
بارت 5
في طرفة عين
صرت اكره الموت واكره أسمع احد مات رغم البلد جان بحاله يخلي الناس متتعجب من اي احد مات بسبب كثرة الانفجارات والحروب ..
اول يوم الفاتحه .. اجه ابويه ومريم من شافتني تفاجئت .. سلمت عليها ..
-كالت هي شنو ولج متغيره ضعفانه صايره ينطلع بيج
- اي لعد شعبالج خو ماابقى جكمه حتى تعيبين عليه
- هاا شنو شسويتي وهي شنو مسويه بأسنانج
- خليت تقويم عندج مانع
- اي بس تره ابوج خطيه هم متأذي بشغله مو بس تشتغلين وتصرفين على روحج
- اني ادري وين اودي فلوسي تره ادري بيج جبتيني هنا حتى ذليني بس الله بعد عيني افشل كل مخططاتج ..
- يمه يمه منج ام لسان وهسه راح تبقين هنا لو ترجعين ويانه ..؟
سمعتها الحجيه واشرت النه رحت الها
هاا حجيه كولي
ابقي هنا حبيبه لاترحين
ان شاءالله حجيه
راحت مريم وابويه واني بقيت يم الحجيه وبهالفتره خطيه تعبت ولزمت عده
بعد ايام رنا رجعت لصالون ولازم احد يبقى يم الحجيه فبقيت اني يمهه وهي تعلقت بيه حيل اكثر من قبل .. وفلوس تنطيني على طول
بنات رنا يبقن يمي ابوهم دائما مشغول يشتغل وي احد الاحزاب السياسيه ..
مرات جنت اروح للصالون واشتغل بمكان رنا اذا عدهه طلعه او سفره
دائما يسافرون يتونسون ولأن صرت خبره بشغل الصالون .. ظلت تعتمد عليه الزم مكانها اني وام بنين
مره كاعدين مخلصين شغل ...
ظلت تباوعلي ام بنين غمزتلها كتلهه ها شكو مضيعه شي بوجهي
ولج شكد فرق شكلج صاير عن اول يوم شفتج بي
اي هههه وهسه شتردين
ولج بعد اكو شي لازم يتغير بوجهج
شنوه بعد اريد اجمع فلوس كافي اصرفه ع التجميل
بعد يرادلج تشيلين هي الشامه مخربتج
كمت اباوع الوجهي بالمرايه .. ورجعت اللتفتت لأم بنين گتلهه اشيلها وانعل سلفه سلفاهه اذا مخربه وجهي ..
اشوفلج طبيب جلديه زين يشيلهه اسأل صديقاتي
اي بس شون راح يشيلهه خو مايصير مكانها مو حلو خوب ابقى عليهه احسن
لا ولج صديقاتي على جم وحده يشيلن الشامه وبعدين الدكتور هو يقرر يشيلهه بالجراحه او بالليزر.
اي اشيلهه ليش لا ..
وشلت الشامه واستمريت بالرجيم تركت كل الاكل الي يضر بصحتي ويزيد وزني وصرت رشيقه نزلت من الـ85كيلو لل65 بس مو بسرعه لذلك ماترهل جسمي وصرت اللبس براحتي .
رسمت حواجبي وسرحت شعري .. تعلمت من رنا أسوق سياره وتعلمت بس مجان عندي سياره مرات اخذ سيارتها ومرات اروح مشي للصالون .
وكرهت الماضي وكرهت ندى وقررت اغير اسمي وغيرته الى نادين ..
كل هذا صار بسنوات بس معبالك سنوات ولا وكانما صار كله بطرفة عين
جنت كلما اباوع للمرايه واشوف شكد تغيرت اتمنى عمار يشوفني ..وهسه اللتقيت
من اشوفه احس اكو حنين للماضي خاتل جوايه يشدني للسنين الي مضت يفتش بذاكرتي ع شغلات ناسيتها او تناسيتها تجبرني على ان احيي الذكريات حتى لو كانت مؤلمه اباوع لأبنه احسه أبني الي مات وشكد حاولت انساه يمكن متناسيته انما نسيته لا
يمكن لو الله لو معوضني بطفل جان يمكن كدرت اكول نسيت شويه مثل هوايه نسوان الله عوضهم باطفال بعد مافقدوا اطفالهم انما اني لا ..
سألني عمار تزوجتي
جان ابالي اكوله هووووايه حجي بس مكدرت
اكتفيت بقول اي تزوجت وسحبت ايدي منه بقلبي گلت واي زواج تزوجت .
ثواني ودك تليفوني شلته ام بنين جاوبتهه كالت مري للصالون اكو فد شغله تعاي شوفيهه كتلهه ماشي .
وصلنه للصالون جان عدنه اعمال بالطابق الفوك جنت اريد اوسعه واسوي مركز تجميل متكامل بالاضافه الى ساونا وجم ..
كلت العمار اني هسه أجي .. نزلت جيكت الشغل ورجعت للسياره
تأخرت عليكم أسفه
لا عادي شنو انت تشتغلين هنا
جنت اشتغل بس هسه زوجي اشتراه الي وخليت بمكاني من يشتغل عني
اهاا مبين رجلج احواله توب
اي الحمدلله
تستاهلين انتِ ندى طيبه وحبابه
شكرا ..
احسه يحجي بقهر
حركت السياره ... ومشيت وصلنه للبيت نزلنه كال هذا بيتج يعني بيت رجلج
لا مو بيت رجلي هذا
اها لعد شون انت مو عايشين سوه لأن كلتي ابوج يمج
اي عايشين سوه بس هو شغل اغلب الوقت واني دائما هنا يم ابويه
لعد مريم وين ؟
طلعت لجوء ويا اخوها للسويد من سنه تقريبا بعد ماتمرض أبويه ..
اها
يلا ندخل ..
دخلته رأسا لغرفة أبويه سلم عليه وماعرفه كتله هو تمرض ووصل الهالحال ميعرف احد ولا يتذكر شي .
