بارت 10
مساء العسل عليكم متابعيني الغوالي 😘😘
التفاعل مو مثل قبل . الظاهر معجبتكم القصه ..☹️☹️....البارت العاشر....
{#مازلت_طفلة}
#بقلم_الكاتبة_شمسالحجيه . يايمه يارضا . هذا راس الطفل .
لمي روحج بسرعه وغراضج طلعيهن .خلي اگعد رضا وناخذج .الالم ماينحمل وبحياتي ماشايفه هيج .. احس روحي تريد تطلع . شلون الي يذبحون بي بسجينه مثلومه وهو يتجوع . لاهو المذبوح ومرتاح وميت ولاهو العايش ..
گمت اصيح بلا وعي . حسيت هاي نهاية الدنيا وخلص بعد راح اموت .
صارت روحي يم امي .اريد امي . جيبولي امي .
الحجيه .. ولج يمه وين مخليه غراضج . صار ساعه ادور خبلتيني .اشرتلها بالمجر مصفطتهن .هي على اساس عود امي تجهزلي . بس لان اني بالسابع ماتوقعت هيج بسرعه خطيه .
وهمزين الحجيه مشتريتلي كم قطعه وغراض للطفل .طلعت علاگة وخلت الغراض بيها . واجت لزمتني لبستني العبايه على راسي .
بين مابدل الحجي ونزل .من شافني تخبل . التفتت على امه .
يمه شبيها راح تموت .الحجيه . يمه شبيك ماشايف وحده تطلگ .
دمشي يله وخلينا نمر على وفاء ناخذها ويانا .الطريق كله . وابجي واصيح اريد امي . جيبولي امي .الحجيه تگول ولج يمه خطيه نهبطه هسا نايمه . تطلع الشمس واني اجيبها تگعد يمج .
هدى . ما اخذوني الها اريدها .
الحجي . هاي شلون سالفه . هسا دجيبي وگومي بالسلامه والله كريم . يسوق ويحجي .
منا لمن وصلنا للمستشفى احس بطني تملخت . واريد اتقيأ نفسي گامت تلعب .
وگام يوگع عليه ماي . واني عبالي سويتها على نفسي .استحيت وگمت ابجي واصيح بالزايد .تالي الحجيه . گالت يمه يارضا بسرعه دخلوها طگ راس الهادي .
دخلوني لصاله الولاده . والخوف والرجفه اخذتني .
ماقبلو احد يدخل وياي .
تالي الحجي انطاهن فلوس قبلن بس باجي تدخل .
واني خايفه وابجي واگلها باجي راح اموت مو .وهي تهدئ بيه .
الدكتوره . شگد عليها هسا.
وفاء . هذا السابع دكتوره .الدكتوره . يعني ولاده مبكره .
فحصتني . گالت هذا راس الطفل . بس ساعدينا حبابه .
ادفعي بقوه .اني مااعرف شتقصد . گمت بس اصيح .
الوجع كاتلني وهاي تگول . يمه الوكاحه شنو هذا الصوت ساعدينا حتى تخلصين بسرعه .وفاء . شنو وكاحه ماتشوفيها طفله وماتعرف. الوجع كتلها شمفهمها .
الدكتوره . لعد اذا طفله لويش استعجلتوا وزوجتوها .سكتت باجي . واني احس روحي راحت وراح يغمى عليه
وهي تگول .
ولج خنگتيه للطفل ساعديني .
اني احاول اسوي الي تگول عليه بس مااگدر من الوجع .
منا لمن حسيت شي طلع مني وارتاحيت . اخذت نفس وشهگت وماحسيت على روحي .
يگولون انگطع نفسي واغمى عليه .
وخلوني تحت المراقبه . والطفل خلوه بالخدج لان طلع تعبان وصغير .
كلما اتذكر ذاك اليوم . احس بنفس الالم .