في مقصورة القطار

بارت 3

حبسنا الهضرة حيت  غواتنا قلب طران خفنا غير نزيدو شوية يجرو سنسلة وينزلونا فنص طريق .. دازت نص ساعة من سكات وتخنزير وتصفار بحال لمشاش لي كايقلبو غير على الفرصة باش ينوضها ويتقامشو ... مهم جبدت القص مع من مفضلاتي فالحياة هو ناكل فطران ولكن مجاتنيش ناكل بلا ماندوق سيد لي حدايا .. مابغيتش يوقف عليا غدا قدام الله
- أنا : تاكل ؟؟؟
- لا
- تاااااكل ؟؟؟
- مابغيتش
- تااااكل ؟؟ تاكل جنابك... آخر مرة نقولها
- شنو داكشي ؟؟
- بيتزاااا ايطاليانو
- مدي (مديت ليه ) لا من شكل ماشي ايطاليانو بوركينافاصو .. أجي بعدا بانت ليا هاد البيتزا لاوية ..بايتة ؟؟
- بايتة عند خالتها .. ايوا الله يخليك بالخلا .. شفتك داير ليا فيها شاف موحا تا بلع وهنينا .. باز لهادي لي غادي تديك
- ديـــتها
- يديوك لتلت الخالي ويغبرو ليك شقف ... مزوجين ؟؟
- اه
- الله الله مسكينة ومعامن طاحت .. ترزات فحياتها الصكعة .. عندكم شي ولاد ؟؟
- لا مجابش الله
- إيوا الحمد لله عندها فين دارك الوضع .. ضرني راسي العيب فيك ولا فيها ؟؟
- الله يخليها قاعدة فيك ... زيدي ديري لونكيط جيبي لمينوط كتفي لي يدي
- ماتزيدش فيه راه غا مجرد فضول ... قول ليا علاش مدايرش الخاتم ؟؟ مراضيش بالزواج ولا مراتك مامعمراش ليك عينك ؟ باغي لي يخضرها ليك
- واش باغا لي يزرق ليك داك العين
- حرررررررررربش حتى تفكرفيها
- ايوا ديها فصحتك
- شحال فيك .. دابا راحنا تشاركنا طعام ديرني بحال ختك صغيرة.. دابا انا ماشي سوقي فيك علاش مدايرش الخاتم غير هو بغيت نعرف كيفاش كايفكرو رجال باش نعرف نتعامل مع راجلي المستقبلي صااافي أما مشاكلك الشخصية أنا غنية عنها
- واخا ألالة راجل فاش كايحيد الخاتم من يدو عرفي المرا لي جمعها بيه خرجات من قلبو
- ويلي أنا خطيبي ماعمرو دارو(درت يدي على فمي ) هييي 
- سيدة مخطوبة بعدا .. وكتهضر مع رجال بكل طلاقة
- وانت لي مزوج طفرتيه
- أنا بعد الى غانطلق اما انت مزال تا مقلتي بسم الله
- وقصتي أنا قصة .. وعلاش غاطلقو ؟؟ زعمة باش ما نوقعش فنفس الغلط ديالكم .. مساكن تقطعو للقلب عوينة وصابتكم أنا متأكدة .. كنتو كي حب الملوكة ماكاتفارقوش
- باش عرفتينا ؟؟
- حسيت بيكم
- هههه دابا هادي طريقة جديدة لجران لسان
- عاود ليا ماتعرف نفيدكم بشي حاجة راه كايقول المتل الناس لاتبوح بأسرارها للأصدقاء وإنما للغرباء في القطارات أو المقاهي العابرة، لأننا نجد في الغريب البعيد راحة لا نجدها في اقرب الاقرباء من حولنا. - بهاء طاه ..  نتافقو أخبرني سرك أولا ومن بعد نعاود ليك أنا .. أوكي
- هو : كنا كانبغيوا بعضياتنا قبل زواج .. وملي تزوجنا زدنا بغينا بعضياتنا كتر .. كانت علاقتنا قوية ومتينة حيت بكل بساطة مكانخليو حد يتدخل فينا .. ويطرا لي يطرا أسرارنا كاتبقى بيناتنا  .. دوزنا عام كلو حب وتفاهم رغم بعض الخلافات البسيطة لي كطرا عادي عندنا جوج ريوس فطبيعي يختلفو الأفكار .. هاد الخلافات ماقدراتش تأتر علينا ولكن القدر كان مخبي حاجة واخرى .. جاتني خدمة على برا البلاد .. كانت كاتبان ليا فرصة ماخصهاش تضيع ولا تكرر .. وكشاب طموح مافكرتش جوج مرات حيت بالنسبة ليا هاد الخدمة هي لي غاتحسن من وضعي المالي وتعيشنا فرفاهية ..  قبلت العرض ديال الخدمة ومراتي فلول كانت مترددة ولكن قدام حماسي مكانت تقدر دير والو .. مشيت ودوزت عامين فالغربة الحمدلله استقريت ماديا ومعنويا وحسيت بلي حياتي بدات كتاخد المنحى صحيح ولكن من بعد اكتاشفت بلي حياتي زوجية بدات كتاخد منحى معاكس .. رجعت لبلادي كونجي وكلي أمل ندي مراتي معايا ونعيشو فالغربة .. ولكن الحقيقة حنا بيناتنا ولينا غرباء .. عامين ديال الفراق حسيت بيها دارت فراغ كبير فعلاقتنا .. بحالا عشرين عام ماشي عاميين .. مابقيناش كنتفاهمو على أبسط الحوايج وأهمها أن مابغاتش تمشي معايا .. بحجج صراحة بنسبة ما قدرتش نتقبلهم .. أولا مابغاتش تبدا حياتها من صفر .. تانيا ماتقدرش تفارق على ناسها وحبابها .. تالتا الى كلنا خوينا البلاد شكون غايخدمها .. رابعا ولادنا بغات تكبرهم فبلادنا وفلجو فاش تربينا حنا وزيد وزيد واخا تفهمت أو حاولت نتفهم  الوضع  .. ودازت 3 سنين 4 سنين 5 سنين هاد العام سادس وحنا على نفس الوضع هي فبلاد وأنا فبلاد .. وهاد الولاد لي دارت بيهم السبب كاعما تزادو .. مابقيتش قادر نزيد نتحمل .. ديما كنشوف صحابي مع عائلتهم وولادهم .. وأنا بوحدي .. شهر واحد فالعام فاش كنكون مع مراتي وسط العائلة ..بعد 7 سنين ديال زواج العمر كايدوز والبعد كيزيد اكتاشفنا أننا غير مزوجين باش نتسماوا مزوجين وصاف .. وأن طلاق هو الحل باش مانبقاوش موقفين حياة بعضياتنا
- طلقتو ولا مزال ؟؟
- مزال
- عرفتي مشكلتكم فين كاينة لا انتَ لا هي قادرين ضحيوا على بعضياتكم .. وتفاهم باش خصو يكون .. خص يكونو ضروري تنازلات .. أش فيها إلى رجعتي انت لبلادك
- ولكن راه خدمتي تما ومستقبلي كلو تما
- مراتك ولا خدمتك ؟؟ مراتك هنا وتاهنا كاينين الخدامي ..بصح مغاتكونش بحال لهيه ولكن تاحاجة ماكاملة ضروري ماخص الحاجة تكون ناقصة باش تقلب تكملها وهاكا كاتستمر الحياة
- بصح .. ولكن عندي هدف والخدمة فالمغرب مغاتحققوش ليا .. راكي عارفة بريفي كايبغيو يحرتو غا على بنادم .. وانا بغيت نجمع فليسات ونجي ندير مشروع هنا نستافد منو ونفيد بيه ناس
- واخا تطلق .. طلق المرأة لي كنتي كاتبغي وكانت أحلامك كلها معها ..وتزوج بمرأة واخرى كاتناسب مع أحلامك جديدة .. طلق المرأة لي كانت كاتسناك لمدة 6 سنين باش تشوفك شهر .. وهاد شهر ماشي معاها بوحدها ولكن ديما وسط عائلتك .. عرفتي شنو ماشي بوحدك لي كنتي كاتعاني تاهي كانت كاتعاني من بعدك من ناس لي ديما كايسولوها فين هو راجلك كاتعاني من لولاد لي كاتشوفهم فحضن صحاباتها وهي راجلها ياربي غير تشوفو وتكحل بيه عويناتها ..كن مكانتش كاتبغيك أنا متأكدة من العام تاني طلب منك طلاق .. وما دام هي صبرات على هاد الحالة الا وراها كاتبغيك
- تا أنا كنت كانبغيها ومزال كنبغيها
- ولكن كاتبغي راسك كتر
- أنا هادشي بديت كانديرو غير على ودها باش نعيشها حياة مريحة و مانخصصها من تاحاجة
- خصصتيها منك انت ..  وكن سولتيها قبل كن قالت ليك أهم حاجة فحياتها هي انت .. واش عمرك سولتي راسك واش نقدر نكون أنا لي ظالم وفعوض ماتفكر هي لي ظالمة .. أنت لي ماباغيش ضحي فعوض هي لي معكسة
- ولكن اش فيها الى ضحات هي .. كاع العيالات كايمشيو مع رجالهم
- حيت هي ماشي بحال كاع لعيالات وكنظن هادشي لي بغيتيه فيها نهار لول
- بصح
- نعطيك واحد الحل .. عطيني نهضر معاها
- واش تسطيتي ؟؟
- ياك نتوما غاطلقو مناش خايف هه ماتعرف نقدر ندير أنا داكشي لي ماقدرتيش ديرو انت