في مقصورة القطار

بارت 2

- (بالعين الحمرا) ياكما صورتيني ؟
- ويلي على صورتك راني  فحمام رجال .. ياكما يسحابك راسك تا هو أردوغان ولا زين الدين زيدان .. (شيرت عليه بتيليفوني) هاك قرا وهنينا من بلابلا
- (بدا كيدور عينيه تاحوالو) أش هادشي .. سوق ماشي كروب .. شدي (شير عليا بيه تاني على شوية مايولي شقاف)
- هييي كنتي غاتهرسو والله تا تغرمو وتحط فلوسو كاش.. وانت باينة عليك ماتكساب ماتعلام .. مكحــــــط
- ياك عاد قلتي ليهم مفررركس
- تيقتي راسك راه غاكانزيد  فويخرات باش نزوقو الحالة ونديرو تشويق
- دايرة نقاب و فويخرات دابا تگرملي فوق منهم فجهنم
- أشـ أشنو؟ (مارضيتش) .. تشوى فوق منهم انت ان شاء الله .. مالي دايرة نقاب معصومة من الخطأ
- بعدا لسانك ماضي .. شفتي داك لسان عندك هو لي غايگلبك على الفويخرات 
- الأخ فقيه ولا داعية .. والله ينعل لي مايحشم المگرد لاخور غير لي جا يفتي فالدين .. ولا وتدخلو تا فالعقوبات أستغفر الله .. اللهم لا تحاسبنا بما فعله سفاء منا و اللهم لا تسلط علينا بذنوبنا من لا يخافك و لا يرحمنا
- آميــــن .. لا صرعتيني فهادي
- (بابتسامة نصر) ياك بعدا
- ايوا خليتيها انتِ الله ينعل لي مايحشم
- ( قصف جبهتي) تفووووو على گنس ... خويب وزدتيها بفعايلك
- طفرتيه انت زينة وزادك نور الأخلاق
- لا لا والله ماعرفت واش كنتعاير مع راجل ولا مع شويخة .. نوضي أختي نترايشو ونفرجو فينا عباد الله داكشي لي بقا 
- بزاف عليك ننزل لمستواك
- لا لا شيخة قليلة فحقك .. تستاهل درجة عونية ... والله الى هادي هي على مزويانتك ملي كنتي ساك
- هو : صافي تمت المهمة بنجاح
- كيفاش ؟؟؟؟
- كيف كنتي دايرة تحدي مع صحاباتك تا أنا كنت داير تحدي مع صحابي .. كما تدين تدان
- (بصدمة) لااااااا
- وباش يكون تحدي نزيه .. هاكي قراي كما عطيتيني نقرا
- مايمكنش
وفعلا كما درت أنا .. دار هو ... قاليهم بلي جالسة حداه واحد البنت زعرة وقوقا .. وبغات تهضر معاه هو مابغاش .. وهنا كان اقتراح صحابو أن تحدي يكون يخرج من داك البنت الجميلة الوحش لي ساكنها ويعصبني وينفرزني تا نخرج على طوعي .. للأسف هو نجح فتحدي فحين أنا فشلت .. رديت ليه تيليفونو بكل روح رياضية .. تفو على موقف لا يحسد عليه
- تفو رباعة شلاهبية بحالكم هما لي خرجو على البلاد .. فعوض ماتمشيو تستاغفرو مولاكم جالسين كضحكو على بنات  الناس
- شكون لي جبد لا خور ؟؟
- (بتمسكين) حنا العيالات غير كنقرقبو الناب .. أما انتوما رجال كاتنويوها فشكل .. مخكم ماصافيش
- بردي على راسك نجيب ليك شي عصير .. راحنا بحال بحال تخلقنا من طينة وحدة
- ماصدقتيش ... طلعتي برهوش .. جرحتي ليا كرامتي .. دابا أنا كن نجحت فتحدي صحاباتي كاعما يضحكو عليك ماينقص منك والو .. أما صحابك يكونو كايتزلعو عليا بالضحك .. جاب الله دايرة نقاب أما نمشي فيها بصوت وصورة
- هههه وصافي ماتزيديش فيه كنعتذر ألالة
- شغاندير باعتدارك بحال هداك لي كايغتاصب وحدة وكتحكم عليه المحكمة يتزوج بيها
- ودابا لاش هاد تشبيه؟؟؟
- قال رسول الله -صلى الله عليه و سلم- : ” رفقا بالقوارير ” وقال عليه أفضل الصلاة وسلام ما أكرمهن إلا كريم وما أهانهن إلا لئيــــــــــــم
- ودابا لاش كتجبدي على لئيـــــــــم
- حيت انت هو المقصود ... فينك أرسول الله يا حبيب الله جي تشوف حالتنا ربي لي عالم بينا قالك بغاوها سويدية الله يسود ليهم الوجه
- شفتك جمعتيني معاهم .. أنا راه بغيتها مغربية ومن غيرها والله لا تزوجت
- بصح يعطيك الستر .. بحالك هما لي هازين البلاد تخطاونا يهزنا الما ... سير الله يكتر من متالك ويعلي من مقامك ويحيد العديان من قدامك
- سبحان مبدل الأحوال عاد كنتي كاتعايري فيا
- آآآه نسيت سير الله يلگيها ليك