#العشق والشيخ
البارت التاسع عشر
ل ورد العامري
دنجت شلت لجنسيه فدوه حته بجنسيه هيبه هههههههه درتها ليش مادري بس درتها ورجعتهه بسرعه ع وجهه بس كان خطف بعيني كلمه متز ..رجعت درتها اتأكد ل3حروف لقريتها تهيأت لوصح نصدمت بان بالفعل مكتوب متزوج وجوه متزوج اسماءثنين كمت اغمض عيني وافتحهه اغمضها حيل وارجع افتحهه اقره من جديد بلكن اطلع ده اتوهم نفسي احسه ضاق ثنين صار10 شهور اني مخدوعه الدنيه احسها فرتني فره سريعه وشمرتني عيوني مثبته ع جنسيه اديرهه اقره اسمهه افرك بعيني اشوف صورته اي هوه وارجع اديرها اقره متزوج دقايق بس كان سنين من الساعات فاتت بيهن سمعته صاح ناي بس صوته موطبيعي رفعت راسي عليه كال اسف اخر شي سمعته هذا حسيت الشمس الي بعيني سودت اذني احس بيهه هوه والكاع تفرني فره قويه صورته مو واضحه اريد اركز بشي ماكدر ماعرف شصار بس حسيت عليه شالني عيوني رؤيا مو واضحه ماعرف شكد فات من الوقت اوشصار بس من فتحت عيني كانت اضويه شمعات بيض فوكايه وسرى واكفه يمي ايدي بيهه مغذي
سرى :حبيبتي خوفتيني عليج
ناي: اني وين
-بالمستشفى حبي شصار ليش وكعتي قيصر تخب….
-لجيبين سيرته فكي هذا وطلعيني
-شصار ناي فهميني
-ده اكولج فكي اريد اطلع
-ولج لمغذي مخلصان بعده شبيج. ولج ايدج عزه بعينج
-جريت الكانونه من ايدي بقوه سرى طلعت تصيح دكتور طب قيصر كان موذاك العشق والفرحه الي بداخلي من اشوفه
اطلع بره
قيصر: بس خل افهمج
اطلع برررره
دخل دكتور ويه سرى
ثبرني انت وانت ضغطك مرتفع انت مايصير تعصب اني اعصابي نار سدو لمغذي حطو بلاستر ع مكان الكانونه كمت بس احس بدوران صلبت نفسي ووكفت سرى وكفت يمي لزمتني طب محمد
محمد: ها ناي حتطلعون
-ناي :محمد انت واخوك بعدو عن طريقي
سرى: اي غير تفهميني الي صار
محمد: ناي لازم تسمعين عذره
ناي: اي عذر صار10شهور اني نزوه تضيعه وقت
محمد: ناي احنه بالمستشفى خل نوصل الفندق ونتفاهم
ناي: اي تفاهم ماكو بينه سرى خبصتني شكو وشكو طلعت صار بوجهي عفته ومشيت محمد كال اني اوصلكم
لا اخذ تكسي سرى خل تروح وياج
سرى: ماروح ويه احد وياج اني فهميني شصاير وكفنه تكسي اطيته اسم لفندق صعدنه لغرفتنه ويانه بنات ثنين ماكو يمكن بعدهم مراجعين او طلعو لان همه جايين 3ايام
طبيت لميت غراضي وسرى مستمره تحجي
سرى:ولج فهميني شصاير شكو تحارش بيج سوالج شي
ناي: لج شتحارش ولج مزوج مزوج ثنين مو وحده ثنين
سرى: عزه منو لمزوج
ناي :ولج زفت الطين قيصر مزوج ثنين صار10 شهور اني مخدوعه
سرى: هههههههه منو كذب عليج
ناي: اكولها مزوج ثنين تكولي كذب عليج ولج شفت جنسيته بعيني
سرى: عزه بعينه اذا صدك
ناي: فضيها تجين وياي لو انزل وحدي لبغداد
سرى: لاعيني وين ابقه اجي وياج بس شلون نرجع
ناي :شلون يعني من الكراج نركب بغداد
بهل اثناءاندكت لباب فتحتها سرى محمد
سرى: شجابك انت اكيد هسه تطلع مثل اخوك
محمد: شدتسون انتو
سرى: معليك ميخصك يله اطلع
محمد :ناي لازم تسمعين عذره
ناي: اي عذر صار10شهور اني نزوه تضيعه وقت
محمد :ناي لاتحكمين بسرعه
سرى: هاي شوكت تحكم لعد حته لو حامل جان جابت هسه واخوك ساكت ويلعب ع البنيه
ناي: يله سرى
محمد: وين يمعوده ساعه 5بعد شويه تضلم شيرجعكم انتضروني اني اوصلكم
ناي :لا موبحاجت احد رجاءابعد عن طريقي
محمد: ناي مو كل. شي ينأخذ بتهور اطينه مجال نحجي سرى وين رايحه انتي الخ لازم تعقليها لوتخبليها
سرى :شمدريني اني يجوز انت هم مزوج وجاي تلعب عليه
ناي: عفتهم طلعت جنطتي فتحت لباب صار بوجهي قيصر رجعت طبيت اجيب جنطه الايد دخل ورايه محمد يشوف جنسيته لسرى حته تتأكد انه ممزوج
قيصر: اسف
ناي: اكو كلاص ع الميز جان شلته وكل قوتي شمرته بالكاع كتله كوله اسف بلكن يتصلح عفته وطلعت ورايه سرى الي تتعارك ويه محمد
محمد: اني جاي وياكم
ناي: ماكو داعي
محمد: ناي مااعوفكم ترحون وحدكم وماكتلج ارجعكم بسياره قيصر راح ارجع حالي حالكم نفرات وصلنه لكراج ماكو سيارات بغداد اكو شهربان صعدنه بيهن ومناك نصعد بغداد سمعت محمد يحجي بتلفون يكول اني وياهم لالاماعوفهم انت لاتنسه غراضي يمعود وعله كيفك سوق وصلنه شهربان وصعدنه سيارات بغداد الطريق كله كان عباره عن وجع بداخلي ليش حياتي صدمات من الي احبهم اذكرت ابويه الي رحتله واني مراهقه بعد مسمعت بيه ازوج وخلف رحتله اكوله احنه هم جهالج اريدك عله راسنه جان جوابه دروحو انعل يوم لشفت امكم بي اخذت فلوسي جنت اشتغل وهيه كل يوم تريد لبس وطلعه
رجعت بعد ماائيست هذا اول سند انكسر بااكثر من مره اروحله وانطرد
السند الثاني اخويه الي نسه كلشي وحته بيته ماندله
واخر سند ماكسر ضهري كسر كلبي وجع روحي بينت هواي امال عليه تهدمت كلها فوك راسي ليش هيج صار اذكرت كل مااسئله ع زواج يتهرب واخرشي يكولي لحب اتأخر ياحب هذا حب نفسه لو حب نزوه زين شنو جان يريد مني اذا هوه ايدي ملمسها اني الي حطيت ايدي بيده واكثر من هذا مصار ليش الطريق كله تلفون محمد مسكت وسرى ومحمد يتعاركون بصوت ناصي واني احس كانو مرسوم دائره وكالولي اكو فتحه بهاي الدائره افتري لحد متلكيها افتر افتر وارجع لنفس النقطه اعترف امام نفسي اني حبيته لدرجه حسيت بيها انه لكيت ابويه من جان يسئل عني وينصحني وحسيت لكيت اخويه بغيرته عليه حبيته من عيونه الي جانت تفرح باابتسامته برزانته بثكله بنقاشه بكل شي بي بس هوه اني بنسبه اله شنو وحده شافهه تسوق وتلبس كال خلص هاي سهله شافني ضحكت وطلعت وكال اقضي وقت بس اني بحياتي مطالعه ويه احد ومطلعت وياه غير لمكان عام اني شنو منو اني اني ناي لمحاميه الي مايهمه احد لوناي الي كل يوم الها وجع وكسر جديد طبينه بغداد واخذنه تكسسي للبيت جان الوقت تقريبا 4الصبح صعدنه ويه واحد اضاهر سكران ماعرف متيهه بس سياقته طبيعيه جان مشغل اغنيه مساكين اول مره اسمعهه
مساكين مساكين من يومنه تعبانين من زمن مامرتاحين
محد يساعدنه حته الزمن ضدنه
نضحك ولو مجروحين مساكين
حبيناهم متصورين همه مثلنه طيبين
تالي طلعنه مخدوعين وتسمينه مساكين
واحنه فعلا مساكين
مساكين القلب خالي نرخص بالوفه الغالي
رغم ك
رغم كلشي تجملنه لجل خاطر حبايبنه
حته نحسهم فرحانين مساكين
احس دموعي نزلت ويه كل كلمه نزلنه للبيت محمد وصلنه للباب مفاتيح عدنه طبينه صارت بوجهنه عمتي مالي حيل احجي شي طبيت للغرفه واسمع سرى تكولها احنه وكم طالب رجعنه معجبنه الجو هوسه وعمتي تكولها من لبدايه اني مااريدجن ترحن بس انتي لحيتي ذبيت هدومي وكفت كدام لمرايه عله لساني كلمه ليش ليش كلشي اكول الي يطيني غدر ويروح ليش،كل مااكول لكيت احد يكون الي بدنيتي ايحسسني اني مو وحيده اطلع منه وايدي صفر ليش
شتردين ناي اريد امي اريد احضنها وابجي بحضنها
منو امج امج الي كل مترحين متلهفه لشبكه لو لتمسيد راس تلكيهه هايمه بعالمه وحته شلونج متكولج
تردين تبجين هاي امج مخدتج الي ليالي وايام بس هيه شافت دموعج وعاشتها وياج شمرت روحي ع مخده كتمت انفاسي بيهه واصرخ بكل قوتي واحس دموعي تنزل نار عله خدي كل الي صار ويايه جان يقهرني ويحز بكلبي بس ليوم كلبي يوجعني الم مختلف شي اول مره احس بيه حركه نار الم بكلبي لايطاق
