اني اسمي سرمد مواليد1992
احجيلكم قصة حياتي..
احنا من عائلة مدللة طفولتنا كلش حلووة الي نريدة يصير ويجي ابوية رجال صاحب معامل وخير من الله عدنا اذكر جنا نلعب دعابل وطيارات وختيلان وهواي العاب نلعب الصبح لحد الظهر نتغدة ونام ونكعد العصر نلعب لحد ماننبسط😂
استمرت حالتنا واخذنا بيت بسنة2001 جنا ايجار
وضعنا كلة تماام وباافضل حال الى ان اجة يوم سقوط بغداد
2003
جان عمري 11 سنة بين الزعطوط والطفل والمراهق
خلال ايام الحرب نباكت المعامل والمحلات اهل الحواسم اخذوها واذا تروح اطالب بحاجتك يكتلوك ابوية من النوع الجبان خواف حييل
جنت كل مااحجي مايسمعني ويكلي اسكت معليك....
2004
اجتي اياام خلال الحرب ودخلو الامريكان اغلب المصالح توقفت ناس تخاف من ناس وناس تاكل ناس جانت عدنا كم فلس وخلصن وابوية مايكدر يشتغل يخاف يطلع ومتعلم يكعد بمكتب ويدير الشغل
سمعتة يحجي وية امي ويتعاركون لان رادت كيلو طماطة على مود تسوي غدة النا
وكاللها ماعندي ولافلس بس 10 الف ويمج سوي مال البارحة اني شبعان
عرفت الوضع تعب عدنا
رحت على امي كتلها انطيني 10 اشتغل بيها باوعت علية صفح ورادت تكتلني لان اخر 10 بالبيت جانت
نّــِامت الضهر ب1
رحت اخذتها من المجر وطلعت بعز الضهر ورحت اشتريت نص تكة جكاير غمدان ونص سومر
وفرحان بوكتها ابو المحل رزلني كلي هاي الك
كتلاا لااعمو اريد ابيعهن !!
كال لعد خلي احسبها الك بالجملة
شايل الجكاير بتكة مستطيلة وامشي واروح لم الكبار واصيح جكاير جكاير وصدك فرحان العصريات صارت ومابعت شي
صارت المغرب كلت خلي اروح لمكان مابي محلات وناس
رحت وشفت امريكان يتمشون راجلاً تفتيش
شافني المترجم كلي بيش الباكيت
فكرت كلت ذولة امريكان وخلي اقفص عليهم
كتلة ب5$
ضحك المترجم ولحد هسة الضحكة براسي
كلي ترى عراقي اني
ابتسمت كتلة يلا ب 1500
كمشني من راسي وانطاني 15 الف مال كل الجكاير
اله وللامريكان
اعضم واحلاا فرحة جانت بحياتي بستة وخليتهن بجيبي وكل نهاية فرع اطلعهن احسبهن وارجعهم وايدي بجيبي
صار الليل رجعت 10 بمكانها ونكتلت لان متاخر كتلهم جنت العب برى وضميت 5 الف حتى افكر باجر شنوو اسوي!!!!
يتبع..
