ما وراء القدر

part 2

ما وراء القدر
بقلمي ..

ردت اطلع من القسم صار بوجهي عباس ووياه البنيه ابتسمتله ومشيت ما ردت ابينله شي هو اجه وراي يصيح مها مها
-هاا
-شنو ها اشو لا سلام لا شي شنو زعلانه
-لا عبالي مشغول
-يا شغل هذا بعدين ليش ماكتيلي تداومين هنا
-ماصار وقت يلا البنات ينتظرني اكدر اروح
-براحتج

ابتسمتله هو مثل الضاج وباوعلي بنضره ومشه رجعت للقسم كل تفكيري بي وبالبنية الي وياه كلت ما معقوله هاي حبيبته هو جان يدرسها اهوو هسه جان حبيبته او زميلته اني شدخلني بلا دوخة راس صفنت اني صوجي جيت لهنا المن لو رايحة لجامعة الكوفة يمنه عاد لو رايحة لبغداد المن جيت هنا للضيم اووف يا ضيم هذا هاي لان شفته ويه بنيه بس اني احبه مثل اخوي شعليه بي هسه وبقيت ع هالحالة لمن اجتي نور صديقتي كتلها

-وين جنتي
-بالكلية وين يعني انتي ليش طالعة من وكت
-هيج مليت
-مليتي شنو لج تعاي تعاي شفتي هذا الحلو الي اسمه عصام
-شلحكتي تشوفين اشو ما بقينه بالقسم هواي
-لج هذا الاسمراني ابو لحية وغمازة الكاعد بصف مريم
-مريم منو
-استغفر الله لج مريم الي تعرفنه عليها اليوم
-هاا اي اي
-لشوكت تبقين بهالثول
-هههههه من شفته انثولت بس تعاي تعاي منين عرفتي اسمه عصام
-صارحته غير
-جذذذب
-كبر اي والله مصدكه صارحته بس صاحله صديقه ولكفت اسمه
-ولج هاي انتي داهيه من اول يوم حطيتي عينج عله واحد
-شنسوي رزقنه هذا
-اضن اذا كلج احبج كبل توافقين
-يبوو اموعن اذوبن
-هههههه لا هاي هيه ربحت الشركه

بقينه نسولف اني ونور للمغرب وكتلها الا اسميج عصام بالتلفون وصدك سميتها وهيه تكولي حطي يمه قلب احمر كتلها صار واني ميته ضحك عليها صليت خابرت ماما وبابا وتعشيت وحظرت ملابسي وغراضي ونمت واني افكر بباجر شراح اسوي وشراح احجي
ثاني يوم كعدت بدلت وتريكت وطلعنه اني وصديقاتي ورحنه للكلية واخذنه كتب باوعت كل كتاب شكبره وكله بالانكلش كلت يلا تهون هي هاي دراسة الطب وطول اليوم واني ماريد التقي بعباس جنه طالعين اني ونور ومريم بالنادي نشرب عصير دخلوا جماعة ولد للنادي انتبهت وياهم عباس هو ماشافني كملنه العصير وطلعنه واني بالباب كلت خلي اندار اشوفه شيسوي انداريت صارت عيني بعينه رأسا طلعت وسويت نفسي مو منتبهه بعدنه بالباب اجه عصام ونور كامت تكرص بيه عود شوفي هو باوعلنه وابتسم وسلم ودخل للنادي اني رجعت باوعت لعباس شفته مدنك وساند ايديه ع راسه بقينه عله هذا الروتين بنهاية الاسبوع رجعنه لاهالينه وحجيت ويه اهلي بخصوص الجامعه وكتلهم اريد اسوي نقل استضافه اي شي المهم اريد هنا قريب بابا كال انشالله للاسبوع الوراه ومشه بابا ويايه وكالو نقل ماكو بس استضافه انتظروا هم ما سوينه شي استمريت بالدوام وعباس معليه بي بس ع كد السلام مر شهر ع الدوام بابا كال خليها ع السنه الجايه اني انقلج كتله اوك مرة من المرات يوم خميس واخير محاظرة منتظرين تخلص حته نروح لاهلنه تناقشت ويه الاستاذ وساعة السودة الحجيت بيها خلصت المحاظرة الاستاذ كالي ابقي هنا اريد احاجيج الطلاب طلعوا صديقاتي بقو منتظريني لمن كتلهم روحو لا تتأخرون يا الله صارت ساعة 4 والجامعة شبه فارغة رحت ادور ع الاستاذ لكيته يتغده وكالي روحي ماعندي شي صدك ضوجني عود هذا عقاب لان ناقشته لو شنو طلعت ماكو بشر بالكلية ودنيا باردة لان شتاء وبيها غيم شويه يعني رعب بالنسبة الي اخذت تلفوني ادك عله احد اجه ببالي عباس لان بيتهم هنا دكيت عله زينب اخته طلعلي رصيد موقف ردت اسوي تمديد انطفه التلفون من الشحن استغفرت ربي ودكات كلبي بالالف كلت اروح لبيت جدو بس بعيد عن الكلية طلعت من الجامعة كلت اروح لبيت عمتي ام عباس بس ما اندل وين خررب اخذت تكسي رجال جبير وانطيته العنوان وهو يندل الدنيا صارت ظلمه من الغيم ومطرت مطر بحيث ماكو بعد حته سيارات ماكو نزلنه براس الفرع كالي اوصلج للباب كتله لا شكرا عمو وانطيته كروة ونزلت جاي اتمشى وشفت ولد يباوعلي بنظرات خفت صرت امشي سريع وكل شويه اريد ازلك وتنكعت من المطر وكتبي جوه ايدي حاطتهن بحافظة نايلون وياهن التلفون الحمد لله مايلوحهن مي وصلت لباب البيت بقيت ادك ادك محد يسمع سمعت صوت خطوات كلت ايي يا الله واني عيوني مدمعه انفتحت الباب اشوف عباس كبالي باوعتله واني ارجف وعيوني مدمعه هو رأسا كالي دخلي دخلي دخلت للأستقبال باااارد
-تعاي للصالة ادفى
-وين عمتي وزينب
-نايمات فوك
-بيش ساعه
-ب5 .ذبي عباتج شوفي شلون كلها مي
-لا خليها
استحيت اذب العبايه لان ملابسي منكعة مي هو هم فهمني
-راح اروح اجيبلج ملابس من زينب
-لا خاف نايمه خطيه
راح واجه وره شويه بيده ملابس اخذتهن ورحت للحمام سبحت بمي دافي حته البرودة تروح وبدلت وطلعت ولافه شعري بخاولي وفوكاه شال تلكتني زينب وسين وجيم كالها عباس بعدين عوفيها هسه اخذتني لغرفتها وشغلتلي الصوبه وراحت غسلت ملابسي واني مكابله الصوبه وارجف شويه واجت جايبتلي اكل كلت شويه وصار وقت صلاة المغرب صليت سمعت صوت عمتي نزلت تريد تصلي وره شويه جابتلي زينب بطانيه نمت بدون مادري كعدت ساعة 9 تذكرت اهلي وتلفوني وين حطيت شال عله راسي وطفرت لكيت عباس كاعد بالصالة
اخذت الحافظة ادور ع التلفون ماكو خاف واكع
-تدورين عله تلفونج
-اي ماكو يمكن واكع
-هذاك ع الشحن خلته زينب
-هاا شكرا
-لتخافين اني اتصلت بأبوج وطمنته كتله مطر وماكدرت تجي
-شكرا

رحت ع التلفون فتحته بي رمز اني حاطتله صاحلي عباس
-تعاي ادخلج رمز الواي فاي
-اوك
فتحت القفل وانطيته التلفون 
اباوعله وجهه تغيرت معالمه انطاني التلفون وراح باوعت ع التلفون رسائل فايبر من فاطمه اختي تسأل ورسائل من نور فتحت حلكي مترتين اني مسميتها عصام وبصفه قلب احمر دور شكاتبه هي كاتبه
ها حبيبتي
طمنيني وصلتي ؟
والله خفت عليج ليش ماتردين حته جهازج مغلق
هففف وين صرتي
من توصلين خابريني زين

عرفت ليش عباس تنرفز اجتي زينب كالتلي
-تعاي نامي يمي
-عمتي تدري اني هنا
-اي واجتي تسلم عليج بس انتي نايمه جنتي
-يا سودة عليه هسه هيه وين
-نايمه بغرفتها .العشه بالمطبخ خاف جوعانه اكلي وتعاي نامي بغرفتي
-لا مو جايني نوم بعدين
-براحتج

راحت زينب لغرفتها وبقيت اسولف ع التلفون ويه اختي ونور شويه ونزل عباس كعد كبالي عيونه حمر مدري اني اشوفهن هيج ماعرف وفجأة سحب التلفون من ايدي ...................

يتبع

مشاهدة ممتعة 🌸