#الرعناء_والاشيب الفصل الاول
انتباه
حوارات الشخصيات و ما يختلج بداخلهم مبنية على الاحداث وعلى اطارها يتم تخمين ما يدور بينهم من كلام .... القصة تنقل الي من اخت البطلة وليست من البطلة شخصيا كونها بعيده كل البعد عن قرأة القصص ، من نزلت الكم طلب قبل اسبوعين اتراسلوني بقصصكم هي رسلت الي من ضمن نخبة قصص اختاريتها تتلائم مع عنواني حيل اما بقية القصص عذرا مكررة والبعض منها عقلي ما استوعبها واجريت اتصالات قبل اسبوع مع البنت و تطمنت اني ما اكذب عليكم وانها حقيقية وبعد الله اعلم..وشكرا لناقلة وعلى سعة صدرها معي ....كلمة منها قبل البدأ بالقصة
السلام عليكم ...
رسلت قصة اختي وطلبت من الكاتبة تغيير الاسماء والتلاعب بالاعمار و السكن واعمال اخوتي و الشهادات لتضليل من كان له معرفة بنا ، لا يوجد لدي غرض معين من نشرها غير هو انذار للامهات و الاخوات ايضا و زوجات الاباء الي تتواجد لديهم بنت مثل شخصية اختي .. نشري للأفادة ..
نبدأ الصراع الاول
ملامة تتبع ملامة شد اعصاب وجوه غاضبة وجوه متعاطفة ضرب على المتن المزرق ، من كثر اللطمات وجهي ما احس غير بحرارة تطلع منه تنذرني بليلة وجع راح تصدر من كدماته الحمرة بالحقيقة ما اعرف اذا حمرة او لا بس خمنت او خيالي صورلي من الحرارة الي تطلع منها تخيلتها كأن جلدي منقشع وية ضربة اوتي سلخ جلدي عن وجهي وصارت حمرة!
ابوية كفاه ضربي و لزم رضوان عني ابعده .. اجت مرته اخذتني من ايدي
صرخت صرخة خاوية من التعب خلتها اتكول
-شنو ايدج مخلوعة؟
سؤال مو بمحلة عجزت عن الاجابة عنه بسبب صوتي المبحوح من الصراخ والخوف
رجع رضوان عليه وركلني برجلة او طفر و ضربني وكعني على الارض مرة لخ . وابوية و علي بعدوه وبابا صرخ
-وخريها منا .. طلعيها تمارة ابسرعه
اخذتني لغرفتها و سدتها اجيت اكعد على الارض اخذتني وكعدتني على سريرها
-ليش هيج نيوفر ليش طيحتي حظج وحظ اهلج
الملامة توجعني اكثر من جروح جسمي و الندبات الي بوجهي اكثر حتى من خلع ايدي طلعت .. واني ما اعرف شسوي لجسمي ويهدأ انام اظل كاعده ... كمت الووب من الاوجاع من بطلوا ضربي الا هاجت كلش عليه ..عقلي توقف عن العمل والتفكير من سمعت اصوات عمامي . و اصواتهم ما عرفت اشخصها لأي واحد ييهم واحد يكول نكتلها . والثاني يهدي ويذكرهم بالله .. رجع صوت رضوان زلزني من صاح اكتلها ورب الكون اكتلها .. وصارت ربدة .. و انضربت باب الغرفة حيل خلتني اضم وجهي بحضني . وكلت هاي ساعة موتي . رجعت الاصوات ابتعدت عني . دخلت تمارة
قدمت الماي الي
-اشربي ، عمج رابح و اخوج رضوان يردون هدر دمج واجه رضوان ينفذة لو لا حلم ابوج وعمامج ابو عامر و ابو منال وخروه عنج ليش هيج يا يمة سويتي بنفسج هيج ؟ ليش مدللة اشحلاتج ضيعتي شبابج وسمعتج وسمعة اخوانج راحت .
كعدت يمي تندب وتبجي
