قبل فترة زوجي انتقل من بغداد و راح محافظات يداوم ... دوامه جان يروح اسبوعين و يرجع اسبوع للبيت .... تزوجنا اني وياه زواج معارف .. يعني لا قصة حب و لا تعارف (ما قبل الزواج) ... اهل زوجي عدهم معرفة بزوج خالتي و عن طريقه صارت الخطبة و الزواج ... بس زوجي شايفني مرة او مرتين من جنا نروح لبيت خالتي ... عالعموم .. اني حاليا ام لتلث اطفال ... الجبير صف ٢ متوسط و الوسطانية صف خامس ابتدائي و الاخيرة بعدها ممسجلة بالمدرسة ... من زوجي كام يروح لدوامة هالفترة الاخيرة صار عندي وقت فراغ جبير ... حاولت كلشي اسوي بس بقى وقت فراغ عندي ... و مثل مكلت وقت فراغ جبير ... قررت ادخل لمواقع التواصل الاجتماعي الي اصلا اني قبل جنت ما استخدمها هواي ... دخلت على كروب نسائي ... الموجودات بي كلهم بنات ... بقيت اتابع المواضيع الي يحجون بيها و السوالف ... جنت بالبداية مجرد متابعة لسوالفهم .. و بعدين شوية شوية تجرأت و كمت اكتب تعليقات و اتدخل ... اكو كم بنية عرفوني ... يعني صار عندي كلام وياهم و ضفتهم صارو صديقاتي ... وحدة من هالبنات صارت صديقة مقربة اليا .. جانت تكول هيه بيتهم بفلان منطقة ببغداد و اهلها كلش متشددين واصلا ميعرفون هيه تستخدم الفيس بوك و اذا يعرفون يكتلوها ... وجانت دائما تندب حظها انو هيه كبرت و متزوجت لان علساس اهلها مينطون لواحد غريب وعدهم مواصفات خاصة ... طبعا هالحجي اني جنت احجي وياها عن طريق الاتصال الصوتي .. وفد يوم كالت خلي اشوفج ... شغلت كامرة و شفتها و شافتني .. وهالشغلة تكررت هواي .. و طبعا بكل مرة اشغل الكامرة وياها نكعد نحجي ساعة و ساعة و نص ... والكامرة مفتوحة ... ومرات جنت اكون بدون حجاب و بملابس البيت .. و هيه هم نفس الحالة و اكثر من مرة حاولت اعزمها لبيتي تكلي ماكدر لان اهلي ميقبلون و هالسوالف ... (ها بالمناسبة اني زوجي يعرف بعلاقتي بالبنية وحاجيتله عنها) ... الحاصل ... فد يوم كعدت من الصبح كالعادة حتى اريك الجهال وادزهم للمدرسة ... لكيت رسايل جايتني من حساب صديقتي ... فتحت الرسايل لكيت فديواتي وي البنية بس مو الفديو نفسه ... يعني الفديو مغيرين صورة الشخص المقابيلي و مخلين فديو مال رجال و شايلين الصوت من الفديو ... علساس اني جنت احجي وي رجال ... بيومها كلبي لزمني و ماعرف شسوي لان هاي الفديوات اني بيها بدون حجاب و بملابس البيت زين اذا توصل لرجلي لو لأهلي شلون افهمهم و شلون اكلهم جذب ... الف و مليون فكرة جتي براسي بنفس الثانية و كمت ابجي و ارجف ... الي دز الفديوات كاتبلي اني هكر و اريد هيج مبلغ من المال ... لو انشر الفديوات بالانترنت و انتي تعرفين شلون العراقيين يحبون الفضايح ... و صح اني الفديوات ممسويه بيها شي بس بدون حجاب و بملابس البيت و داحجي وي رجال غريب ... يعني شيصير !! عالعموم ... الي دز الفديوات راد مبلغ من المال و المبلغ جان جبير ... اني ماعندي هالمبلغ و انطاني مهلة ... اني بوقتها ماعندي احد اثق بي غير اختي ... كلت اكلها و شيصير خلي يصير ... حجيت لاختي كلشي و اختي كالت هاي مو سالفة هكر هذولة عصابة و البنية الظاهر وياهم وهاي طريقة جديدة يجمعون بيها فلوس ... لان الفديو شلون يسجلة الهكر و ليش البنية اصلا جانت توهمج انو هيه متكدر تطلع و ليش منطتج رقم تلفونها ... كلتلها بس اني مطلبت رقم تلفونها و الفيس بوك كافي .. كالت والله عصابة ذولة ... و كالت تريدين الصدك احجي لزوجج كلشي ... كلتلها يمه صخام لج غير يذبحني ... كالت زين خلي نفرض انتي انطيتي الفلوس لهل الهكر و هو حلفلج مسح الفديو و بعد فترة هم طلب فلوس و كالج جذب اني مماسحة شنو موقفج ؟؟ كلتلها مادري واني غركانة بدموعي ... كالت عيني كولي لرجلج كلشي .. لان هذولة نكسين والي يلعب هاللعبة ماعنده شرف اصلا و همه الظاهر استدرجوج بهل الطريقة و مية بالمية هسه غيرج كومة موكعيهن هيج ... قنعتني اختي و قررنا اني وياها نحجي هالشي لزوجي سوية لان بصراحة اخاف وحدي اكابله واحجيله ... و اجه زوجي و كابلنا و حجيناله كلشي ... و شوفته بعينة الرسايل مال الهكر و زوجي احمدالله واشكره تقبل الموضوع ... بيومها خابر صديقه ثقة كلش ... و حجاله كلشي و هو كام يتواصل وي الهكر علساس اني ... و اتفق وياه على طريقة تسليم الفلوس و المكان ... بأسمي علساس اني ... و رحنا اني وياه و صديقه .. رجلي نزلني من السياة بمكان بعيد شوية عن مكان تسليم الفلوس وبقى بالسيارة من بعيد يراقب و صديقة نزل بمكان ثاني يراقبني هم ... اجه الولد الي دياخذ الفلوس مني و كبل زوجي و صديقه ركضو عليه .. انهزم الولد بس لزمو ... و صدك كلام طلع اختي عصابة ... الولد نايم بالسجن و اعترافاته متسجلة كلها بالفديو و راح يطلعوه بالتلفزيون هالفترة و طلعو عصابة كاملة و مبتزين كومة بنات قبلي واني جنت ضحية من الضحايا الي مصوريهم .. و اكو كومة بنات من الخوف دافعين فلوس خطية ... و البنية الي يستخدموها طلعت اصلا مو بالعراق ساكنة .. بتركيا و مسجلة على الامم متحدة ... اسمها ريم ... العصابة مكونة من خمس اشخاص ... بيهم واحد مبرمج مال كمبيوترات و فوتوشوب و هيج سوالف ... و الباقين شغلتهم اخذ الفلوس من الضحايا .. بس اهم واحد بالعصابة هيه ريم ... لان هيه الي توكع البنات و عدها خمسين حساب عالفيس بوك ... زين .. اني الله رحمني .. و زوجي صدكني ... و الحمدلله جنت سبب بالقاء القبض على هالعصابة .. بس كم بنية و بنية صار وياها نفس الي صار وياي بس دفعت و الله يعلم شلون جابت الفلوس وشصار بيها ... عالعموم اني بعد لو رجلي نفسه يطلب مني افتحله كامرة ما افتح هههههه ورى الي صار بيا .. ياستار ياربي ما اريد اتذكر من فتحت الفديوات و شفت نفسي بملابس البيت و بدون حجاب و صورة رجال غريب كبالي علساس هو جان يحجي وياي ... الحمدلله طلعت منها سلامات ... بس اتمنى محد يوكع بالغلط مثلي ... (الانترنت)
