تصلي لـ الله من غبشه وتشتم بالضهر جارك
وتگلي الدين حب وخير وتدگ بعيوني بسمارك
تذبح ناس ع القبله لان مارضت بأفكارك
ناس بكيفك يطبون للجنة وتضن النار هم نارك
مرتد وجهنم ثوب تگعدّلة
اليحب الله اعله گد عقله
البنيه التحط كحله
كلمن گال لتخافون
ترا بنص الگبور العيشه هم سهله
كلمن رافض الدم وتراثه وحيرته وٱصله
اليبدل خشب تابوت بالرحله
والترفض حجاب يصد هوا الگذله
للنار وجهنم تسمن اعليهم
تشرع للسماء بكيفك
وبراسي سجد سيفك
بشتاك اندك مثل بسمار بالحيطان
وتمردني غصن رمان لمن تعطش بصيفك
شسويلك
يالعندك حرام انشم عطر للناس
بس تتمنى تشربني بمناديلك
تخاف تلم گصايب جانت معرسات
بس عادي تلم الروس بشليلك
من تخاف من ضلمة شتا الايام
تدور ناس تحرگها وتضويلك
تگلي الدين حر وطير للأقرب غيم
وبعدها بضهري تحفر دم زناجيلك....
ادهم عادل 🌺
