من اول خيط يعگد روحة
ع الشباج
لوشاله ضوه بسرداب...
وي الوجع عندي اعتاب
طفيت الحرگ بالروح
وشرعت العمر بستان
رچيته على طين الهور
ماشوفته صم تراب
وخميت السنين اللبستهن ثوب
وبيهن دورت عن جيب ما مفتوگ
ضميت النسيم الهاب
وماخليت شگ بباب
ومدري شلون طبت ريحة العطاب
وافتح باب وغلگ باب
واغلگ باب وافتح باب
والگي الروح كسرة خبز جوة الباب
امشي بواهس متيهين
مااعرف منيتي منين
بس ريحة دمع شميت فوگ الطين
لحگته ووچدت بالدرب خوش صواب
خليته بشليلي بليل والهث خوف
والگمرة وحش والنجم لمض انياب
والريح التعت بثيابي چف ثياب
وطگ ثيل بياض براس
چان من الحزن يحلم يلبسه غراب
بهذا الخوف والوهواس
بس ضنون تمشي وياي مامش ناس
لگيت الشجرة گبعت روحها من العيب
وگصايبها الخضر من خط عليها الشيب
شما رادت تضمها يگصها چف حطاب
وطحت كلمه غريبه
بلا شكل لا لون مدري بيا طواري انجاب
لا انة بكفرة السكران تالي الليل
ولا دعوة بفجر واطلع من المحراب
ولا ارهم شعر ويخطني شاعر شاب
ولا تيهت روحي بهيمة الچذاب
ولا بية عشگ وانحجي بخلوة شوگ
ولا غيبه نثايه بسالفه شياب
وضميت العمر جوه الضلع عصفور
من شفت السمة فرعت گبال الناس
والمطره جمر والغيم يحجي بواهس التنور
ومن شفت الوكت يسمع غنه الدفان
ويكسر حجل بنت الولاية الجان
فوگ خدودها يغني السمار
بطور احن من طور
ومن شفت الطفل مهزوم من العيد
ويسحل ورا ثيابه خويطرة المكسور
انه جافل قبل لابيه تندگ باب
وشلت خوفة نهيبه بعمر تسع شهور
التم ع الجرح شيلة بشعر مبخوت
وبانت من وراهة ضفيرة البلور
اطش عمري بوكت مالگة الطايح گاع
وماردت العمر بس من صرت مجبور
واصفن ع الصبا الخلصته دمعه بعين
وانشد علگ بيد المايحب يزور
انه بديرة وجع بس ماحضيت بناس
وانة دفنة ولف بس مالگيت گبور
رجف گلبي بوكت جانت الدنيا بخير
ثگيلة وبت مضيف ومو بطيش ادور
واعطش مثل نثية وفزت بكابوس
رغم نايم جنت وبحضني نايم هور
....ادهم عادل 💗🌺
