خذني اليك

الجزء الثالث
صابرين مدلل
وليد: شو يا صبية ممكن نحكي كلمتين ...
تقى : نعم شو بدك ...
وليد: بدي نحكي كلمتين تجي اعزمك على شي مكان ...
تقى: عفوا ابعد عني احسنلك ...
وليد: الله يسامحك انا جد معجب فيكي وبدي بس نتعرف على بعض ...
تقى: طيب خلص امشي ...
وليد سحب كرتو ومدو لتقى : بعرفك وليد الباش محامي وعندي مكتبي الخاص ... انا بشتغل هون قبالكم واشر عالجهة التانيه مقابلهم ...فاهلا وسهلا فيكي باي وقت وهي رقم تلفوني اذا بتحبي تسألي عني وغمزها ...
تقى اخذت الكرت بتردد وكانها مسلوبه الاراده : اهلا وسهلا ..
ومشت لما اختفت عن ناظر وليد ..
: يا الله انا شو عملت كيف وقفت معو واخذت الكرت وليش قلبي بدق هيك ...

مرت ثلاث ايام عالكل ناس ملتهية وناس بتجاهد بالحياه وناس تعبانه وناس بتفكر بحالها وغيرها بتفكر بلي بخصها الحياه بتمر عالكل وكل حدا عندو قصة وحكايه ....
كان خالد وامو قاعدين على السطح وعم يشربوا شاي ...
خالد: يسلملي ايديكي يا امي على هالشايات ...
ام خالد: صحتين يا ابني هو في اغلى منك ومن خواتك عندي الله يريح بالك يا خالد ويفرحني فيك ...
رؤى عم تمشي اتجاههم : بس خالد يعني واحنا ما بدك تفرحي فينا ...
ام خالد: وانتو كلكم افرح فيكم يا رب...
خالد: وين تقى ..
رؤى ؛ نعسانه بدها تنام ..
ام خالد: انداري عنها مقضيه يومها كلو يا نوم يا بدها تطلع ...
خالد: خليها يا امي تدلل على مين يعني بدها تدلل هيك.....
تقى كانت بغرفتها بتفكر بموضوع وليد اليوم اجاها عالمعهد من بعيد واشرلها انو ترنلو ... عم تطلع على التلفون الي جنبها هالتلفون الها ولرؤى فكرت تاخذوا وترن على وليد بس متردده كتير مدت ايدها وسحبت التلفون اتأكدت انو اهلها سهرانين برا وملتهين فتحتو وصارت تضغط بالارقام وقبل لا يرن طفتو بسرعه ومسحت الرقم وحطت التلفون جنبها : شو بتعملي مجنونه انتي ...
دارت وجهها مشان تنام بس في جاذبية عم تخليها ترجع للتلفون ؛ شو يعني شو بصير ما كل البنات بحبو...
ضغطت الارقام مره تانيه واتصلت التلفون عم يرن ...
الو ...
ضلت ساكته مو عارفه ترد ...
وليد : الو مين معي ...
تقى : ااا انا
وليد: مين ..
تقى : انا تقى ...
وليد: يا اهلا يا اهلا واخيرا حنيتي علي ...
تقى : وليد انا والله اول مره بحكي مع حدا بس ....
قاطعها وليد: لا تخافي بعرف بعرف انتي شو انا صارلي فتره مراقبك وعجبتيني بصراحه...
تقى : بدي احكيلك لا ترن على هاد الرقم الا لما ارنلك انا ... لانو هاد التلفون الي ولاختي ....
وليد: ولا يهمك بس لا تتاخري علي ماشي وخليني بكرى اشوفك ....
تقى : لا لا ما بقدر اختي معي ...
وليد: طيب من بعيد راح اكون موجود.....
تقى : ماشي ماشي سلام هلا ليجي حدا ....

مر شهر وحلا مشغولة بالصفقة لكبيرة الي عم تشتغل عليها من فتره والمشاكل الي بتزيد بينها وبين اختها وامها والحال الي مو فاهمة منو شي ....
خالد مشغول بشغلو وكيف يأمن متطلبات اهلو ....ومو عارف وين صاحبة الخاتم وخايف عالامانه تضل عندو وبدو يرجعها ....
رؤى خلصت دروس خياطه وهيك قررت تصير تخيط بالبيت شوية قطع وتبيعهم ....
اما تقى ... تقى ووليد علاقتهم عم تقوى كل يوم عن يلي قبلو وخصوصي انو صارت تروح على حصص لخياطة لحالها ... صارت تطلع معو بالسياره يروحوا يتغدوا ويلفوا بالسياره وما كانت تحضر دروس الخياطه ... وخصوصي انو وليد عرف كيف وضعها كامل لهيك كان يغريها بالهداية والطلعات وغير هيك البنت طبيعتها رومنسية وحساسه وكلمتين حلوات بأثرو فيها ...