اول نبضات العشك
🌷يارا (غرور الصبا)
#الجزء الخامس
مساءكم ورد وكيك شونكم اخباركم
............
صفي نيتك كبل لاتبدي #الهــــوى
ناوي ترحل لو تريد انضل #ســـــوه
كلبي مايحمل بعد #لحضــــــه وداع
وانه كلبي من #العشـــك حيل انجوه
.................................................
سجى:بعد كلام ايوب بقيت مصره على الفسخ لان استعجلت وبابا اتصل بيهم واعتذر منهم وحاول يوضحلهم ان الزواج قسمه ونصيب واتفقوا على اليوم الثاني تروح للسيد نفسخ مرت الليله مولمه عليه ليله بيها دموعي وروحي تتعذب وكمت صليت وذكرت الله وبالفعل صبح الصبح ومارحت للدوام منا للعصر رحنا للسيد وفسخت شفت الشاب ضايج ومبين علي الانزعاج بس كلت انفصل عن احسن ماابقى وي وكلبي عند ايوب لان ماراح اكدر اسعد بعد ماطلكت حسيت بنبضي وحسيت براحه لان قراري خطا على الاقل اخلي جرحي يطيب يله اقبل وانخطب الحمد الله صححت غلطي قبل لانتزوج مرت الايام وماكو لااتصال. ولا شي من ايوب واج العيد وكالت امي خلي نروح للزيارة طبعا عيد الاضحى ورحنا للزيارة وهناك دخلت للحضرة ودموعي تصب حتى الموجودات فتحلي مجال متت من البجي لان مخنوكه وكلام الناس عليه وتفكيري بايوب تعبت حيل بفراك وبقينا يومين ورجعنا من رجعنا دوامت واني اشتغل اسمع صديق لايوب ويانه يحجي وي اصدقاء ويكلهم ايوب قدم على الدراسات بماليزي مثل الشي ووكع على كلبي اختنكت اذ سافر معناه بحياتي كلها بعد مااجتمع بي لو ضاربيني طلقه ولا سامعه بهالخبر كملت شغلي بيه مابيه و روحي تتعذب ورجعت للبيت بطريقي شفت حجار كلت بقلبي يا ربي لو خالقني حجر مااحس بشي ولا هالقهر لقلبي اول ما رجعت للبيت فكرت انتحر واخلص ولزمت الحبوب بيدي بس اتعوذت الشيطان وشمرتهن وكمت غسلت وتوضيت كلت اكو ناس عيشتهم اصعب ومتحملين واني انتحر واحصل حرام استغفر الله يا ربي نمت. ومن كعدت طلعت للحديقه واسمع ابن جيران بسيارة مشغل اغنيه صلاح حسن
تروح وبلا سبب تعوفني بسكوت مافكرت من رحت
اخاف من اعوفه يمووت )لوحدهن دموعي نزلن كنت اتصلت على ايووب واتصل بس ما يرد ردت بس اتوسل بي مايسافر نسيت كرامتي وكلشي ردت بهالدنيا بس يصير الي واكون ملك الى اتصل ماكو
صار الليل بقيت ابجي وادعي رب العالمين واتنخ بالزهراء(ع ) ونمت واني على السجاده مالت الصلاة وبالحلم جان اشوف روحي بحضره ومره من بعيد
لابسه اسوود وصاحتني جان وجه نورر وجان تكلي لا تخافين اني ماناسيتج الزهرة ماتنسى احد كومي صلي والفرج قريب فزيت بس جنت حيل مرتاحه مثل الي نشال كل هم من روحي واسمع اذان الفجر توضيت وصليت واتريكت وطلعت للدوام بالسيارة اتذكرت ناسيه موبايلي كملت دوامي ورجعت للبيت غسلت وسالت عن موبايلي ماما كالت اي بالميز بغرفتج حطيت صعدت وجان اشوف مكالمتين من ايوووب بقيت اكمز بغرفتي واضحك طرت من الفرح بعد اشهر من الفراك ولا اتصال ولاخبر رجعت خابرت ماكو رجعت خابرت مره ثانيه رد عليه كلتله شلونك ايوب .
ايوب :بخير انتي شلونج اخبارج سجى .
سجى:مو زينه اخباري يمك ايوب الله يخليك لا تسافر مااكدر بدونك انتهي والله اني احبك انطينا فرصه ثانيه ..
أنت تقرأ
اول نبضات العشك
Romanceيصفن بعيني العشك من اشتهيك وارسم بشفتك الف بوسه خجل ينحبس شوكي ويواسيني الخيال وتشتهي عيوني تغنيلك غزل 💕💕 قصه اول نبضات العشك للكاتبه يارا (غرور الصبا) حقيقيه 100\100 لااحلل اخذها ونشرها من دون ذكر اسمي عليها.
