زوجه لسبعه أيام (الجزء الثاني)

الجزء 10

فجأة .. سمعت صوت رحاب بتقولي علياااء اصحي ، عليااء ... 

( في جانب احمد ) 
*انت شايف شنو طيب ؟
_انا شايف تمشي البيت و تقعد مع الرجال ، اخير تكشفها قدام اهلها ولا تكشفها قدام خلق الله و السمعة بتلصق ..
*انا حاولتا بطريقتي اني اقنعها والدليل انه اي راجل في محلي كان عمل السبعة و ذمتا فيها بس انا اتعاملت بي منطق عشان ما اعمل ليها فضيحة ! هي ما خايفه من الفضيحه ، انا خايف
اكتر منها ، في النهاية اسمها ام ولدي ..
_ يعني مصمم نرفع قضية الحضانة ؟
*مصمم جداً و م ح اتراجع ..
_طيب نسبة نجاح الحضانة دي 50% ف النهاية القضية قضية حضان م قضية خيانة الا كان الادلة تغير مجرى القضية ، بس القانون احتمال كبير يديها الحضانة ، دا غير انك راجل يعني ما ملم بي تربية الاطفال ، و م عندك جو اسري خاص مهيأ ..
*لا في الوالدة ربنا يبارك فيهااا ، وانا م ح اخليهو محتاج لي زول ..
_بقصد اسرة خاصه بيك ما عندك زوجة تقول انها متكقلة بي تربية الولد و انه ما عندها مانع تربيهوو ..
*يعني شنو ؟
عمار : يعني دا كلامي زاتو ، تتزوج حتى لو زواج مؤقت ..
* اتزووج !
_ايوة تتزوج ، حتى لو وصلت انك تتفق معاها على الكلام الحأقولو ليك ..
*بس يا استاذ مافي مرة حتقبل تربي ولد ما ولدها خصوصاً لو عرفت عمايل رحاب ، ممكن تزلو بيها في اول غلطة ليهو ، لالالا الفكرة دي ما صح لالا ... 
عمار : انت عارف كويس منو القدر الموضوع دا و عمرها ما حتكون قليلة اخلاق للدرجة البتتكلم عنها دي !
*انت عارف الحاصل يا عنار خصوصاً في الفترة دي ..
عمار : لو ختيت الموضوع في عين الاعتبار ، بيحصل ...
_بتتكلمو عن منو ولا عن شنو ؟
عمار : عن زولة بت اصول ، متوقع بنسبه 80% انها حتسلعد احمد في القضية دي ..
_طيب انا عندي مواعيد ،كل الحاجات وضحتها ليكم ، بعد دا اتفاكرو و انا من راي تاني ترجع تحاول تتكلم مع الزولة دي بالمنطق و اذا مصممة انا حأرفع القضية و بعد ارجع من السفر نباشر فيها ..
*عديلة ، شكرا ليك ما بتقصر ...

قالت لي عبير ، انتي كيف نايمة و قاعده وفي السرير يا علياء !
قلت ليها ما عارفع ، يلا نمشي نشوف حبوبة ، قالت لي قولي بسم الله ، و ننتظر لمن احمد يجي ، قلت ليها لا ما بنتظر ، انا بمشي من دربي دا ، قالت لي علياء في شنو قولي بسم الله على الاقل نفطر نشرب شاي و لا نشوف برنامجنا شنو يكون احمد جا، بعداك نمشي كلنا ،،، م رديت عليها ..
قمتا دهلتا الحمام ، و لبست عبايتي ، و نزلتا الصالة من غير ما زول يشوفني ، وصلتا الباب ، ماسكاهو بي يدي لقيتو اتفتح براهو ،، لقيتو احمد في وشي ! 
اتخلعتا ، و هو زاتو قالي علياء ! 
قلت ليهو زح لي ! قالي ماشه وين ؟ قلت ليهو لي حبوبة زح لي ! قالي اصبري كيف يعني تمشي براكي ! قلت ليهو انا ما صدقتا الواطه اصبحت خليني امشي حا اموت بي خوفي ، قالي لحظة بوصلك و انا اصلا كنت جاي اسوقكم ونمشي ، بس انا والله جعان ناكل بس اصبري ،، قلت ليهو خش اكل انا واقفه هنا منتظراك !
قالي هنا منتظراني ! جمب الباب ، قلت ليهو ايوااا ، امشي اكل ، قالي قولي بسم الله كيف تنتظريني واقفه جمب الباب لمن اكل !
قلت ليهو احمد ! اسي كان اكلتا وجيت ، عليك الله سرعه ! بقى محتار فيني ، قالي طيب تعالي اقعدي وانتي ما دايرة تاكلي ! قلت ليهو يا اااااااالله ...... قالي خلاص خلاص ... و مشى 
امه جات شافتني واقفه ، قالت لي مالك يا بت ؟ عبير جات قالت لي برضو حتعملي الفي راسك يعني يا علياء ! احمد قاليهم انا جعان داير اكل عشان اوديها ، عبير قالت ليهم هي زاتا ما دخلت لقمة في بطنها !
عاينو لي ! قلت اخير اجي اكل بس لانو م حيخلوني ... قعدتا معاهم لمن ختو الفطور ، و بقيت باكل معاهم ! 
سرعه سرعه لمن حسو بي ،بعاين ليهو ، شويه و عايزة اقوليهم كفاكم ! 
فجأة تلفون عبير ، رنّ ، طوالي شهقت و بطلت الاكل و قالت بصوت واطي ''غريبة" .. و زحت شويه و قالت ايوة يا معاذ ! 
و سكتت مسافه كانت بتسمع و سبحان الله كلنا ، كنا مترغبنها .. كانت ساكته مسافه و بتسمع بأنتباه ، قالت ليهو ما بيتأجل !
و تاني سكتت بقت تسمع ،و قالت ليهو انا عارفه بس ..... سكتت و قالت ليهو خلاص تمام .. قفلت الخط و جات رجعت قعدت معانا و ما معانا ..امها قالت ليها خير !
احمد قاليها حاصل حاجة ؟ 
سكتت مسافة و عاينت لي ، و قالت اهل معاذ قالو جاين الليله عشان يتكلمو في التفاصيل ، و معاذ كلمني اول امبارح انا نسيت مع الظروف الحصلت دي ، واخر شي قالي حيكلمك انه اهلو بيجو .. احمد قاليها اااي كلمني فعلاً بس والله راح من بالي ، بجو بعد المغرب صح ؟ 
قالت ليهو ايوة ، امهم قالت والله اليوم دا ما مناسب كلو كلو لازم نمشي المستشفى ، و عايزين نجهز البيت كمان .. قلت ليهم دا اهم م مشكله انا بقعد باقي اليوم دا في المستشفى ، احمد زاتو افضل يقعد يشوف طلباتكم شنو انا بركب المواصلات .. امهم قالت لي عيب الكلام دااا ، 
قلت ليها ما عيب ممكن تمشو لحبوبة يوم تاني اساساً هي مطولة و يكفي دعوة منكم من هنا

توصلها ان شاءالله .. 
احمد قالي قومي يلااا ، و يا امي اكتبي لي طلباتك كلها و رسليها لي واتساب ، قالت ليهو طيب و يا علياء ترجعي ما تبيتي يا بتي المستشفى براك شايفه وضعها ما مهيأة ل قعاد ، اتطمني عليها وارجعي ... سكتا 
قالي يلاا خلينا نتحرك .... 
فعلاً طلعنا ، مشينا على العربية ، ركبت ورا ، ساكتين .. جاهو اتصال ، رد 
و كان بيقول للبتكلم معاهو : ما قالت اسمها ؟
طيب ولا قالت دايرة شنو ؟ حاجة
غريبة ، اهاااا ، خلاص بكرة انا اصلاً مداوم ان شاء الله ، بجي اشوف الحاصل شنوو .. اوكي سلام ، سلام ....
قلت ليها ممكن قبل المستشفى نمشي بيتي ؟
قالي : 
_ليه ؟
*عندي حاجات دايراها 
_مهمة يعني ؟
*ايوة ، مصاريف حبوبة 
_علياء ، لو سمحتي حاولي اسي تفكر في صحة حبوبة وبس ..
*دا ليهو علاقة بي صحة حبوبة درضو انت ليه ما دايرني اتصرف 
_عشلن انا اتصرفتا و عارف لو قلتا كدا ممكن تزعلي ولا تحصل مشكله ..
*طبيعي انه تحصل مشكلة ،بصفتك منو انت تدفع المصار يف دي؟
_ايوا ، تمام 
*شنو هو التمام ، وريني دفعت كم ؟
_ممكن تتكلمي براحه ؟
*اسفه ، وريني دفعت كم ؟
_ليه عايزة ترديهو لي ؟
*ايوةة
_تمام انا كمان عايزك ترديتو ليهو 
*كم ؟
_ما قروش !
*طيب شنو ؟
_بعد حبوبة تتحسن بوريكي !
*وريني اسي ..!
_اسي م بينفع كلها كم يوم .. شيلي الصبر ..
*اهم شي ارد ليك الدين ..
_بترديهو يا علياء م تخافي ... بس ف النهاية كلو برجع ليكي اذا حابة ترديهو ولالا بس بتختلف الطريقه ..
*ما فهمتك 
_بفهمك بس في وقتو .. انزلي 
*طيب ... 
نزلنا قدام المستشفى ، مشينا دغري نفس الغرف الفاتت محل العناية ، احمد كان بيسأل وانا ماشة معاهو بس ، يمين ، يمين ، شمال شمال .. وصلنا الغرفه الكانت مرقدة فيها ، بقى فيها نفرين تاني ، و برضو ما بدخلو زول ، و قالو حالتها زي ما هي واسي م حتفوق والله اعلم تقوم منها متين بس لازم تكون ف المستشفى طبعاً ،انا والله ما بكيت ولا زعلت بس بقيت حمدلله حمدلله ، احساس اني امشي و القاها حية دي نعمة ، والله نعمة ... 
احمد قالي نرجع !
قلت ليهو حابة اقعد حولين الغرفة شوية ، قالي خلاص خليكي ، امي اصلاً رسلت لي طلباتها ، بجيبهم و بجي ارجعك ، قلت ليهو تمام ... بعد مشى خطوتين اتلفت علي ، قالي معاكي تلفونك ؟
قلت ليهو لا ،م عارفاهو وين زاتو ..
قالي كنتا ح ارن عليكي تطلعي طوالي ،قلت ليهو للاسف م معاي .. و مشى ..

( في جانب احمد )
*ايواااا ،، لالا قببل وريتك بلغيهم الليله ما بقدر اجي لظروف عائلية 
......
*هي دي منو اصلااا ، بغض النظر ، المهم اديها مواعيد ليوم تاني حتى بكرة احتمال م اقدر اجي ....
*استغفر الله ، في شنو هو ،شنو الشي الضروري البتتكلم عنه دا و انا اصلاً ما عارف هي منو ! 
*انا حالياً عندي مشاوير ما عندي طريقه ...
*ياتو مجموعه !
*اوووووف، طيب ، خليها تنتظرني ...عشر دقايق و اوصل ... ... 

بقيت رايحة جاية قدام الغرفه 
بحس بي انفاس حبوبة قريبة مني ، بحس بوروحها ، بفكر هي قدر شنو عانت و هي شبه انها جليسه ، حياتها في السرير ، مهما كنت انا قريبه ليها و بعمل ليها احتياجاتها على اكمل وجه ، ف النهايه هي انسانه و راحتها ف انها تسوي حاجاتها براها ... 
قاطع تفكير دكتور ولا ممرض ما بعرفو ، بس وقف قدامي ، انا اترعبتاا لمن بقيت برجف ، خايفه يقول حاجة ما حلوة .. قالي عندك مريض هنا ؟ قلت ليهو ايوة ف الغرفة دي ، عندي حبوبتي ، قالي عرفتها ، قلت ليهو هي بخير ؟ 
سكت ، قالي شفتيها ؟ قلت ليهو قالو انتو مانعين الدخول و كان دخلتا وانا معقمة ممكن اللوث و ازيد عليها عياها .. ابتسم كدا