صفحات كتاب عمري

بارت 2

تجاهلت الامر و گعدنة ~جلسنة~ على الغدة بعد ما صبت هناء الاكل

كان الاكل سمك مشوي مشهورين بي اهالي البصرة و دجاج مشوي و سلطات گعدنة ناكل و بدو بابا وائل و امي يحجون عن اخواني و همة صغار و صرنة نضحك عليهم

ام مصطفى ما كانت تغار من امي على بابا وائل لان هنة كانن مثل الخوات 

الكل كان يضحك الا يونس الي كان مكتفي بس ياكل و يسمع

خلصنة اكل وگمنة ~نهضنا~ نغسل انا اتعثرت و طحت ~سقطت~ لكن لحسن حضي كان يونس وراية ~خلفي~

فلزمني من ياخة قميصي قبل لا اطيح 

#لزمني = مسكني

باوعتلة فبادلني النظرات و ابتسم ابتسامة خفيفة و حچة بصوت هادي " شبيج غير تنتبهين لو طايحة جا هسة تكسرتي "

#حچة = تكلم

رفعت راسي لان كان هو كلش طويل انا كنت اصل لسرتة تقريبا هو كلش طويل و انا قصيرة

#كلش = جدا

تقريبا طولة 191سم

باوعتلة و ضحكت گتلة " شكرا "

خلص اليوم و همة موجودين  بيبيتي كانت ضايجة من وائل وما تحبه لان جانت اكو هواي مشاكل من جانت امي على ذمة وائل و ذيچ المشاكل كانت سبب انفصالهم

#ضايجة = مزعوجة

#هواي = كثير

ترخصو لان تأخر الوقت وصار لازم يرحون لبيتهم ودعناهم وراحو يتمشون لان بيتهم ما كان بعيد عن بيت مهند

رحنة ننام بحدود ال9:00 ضليت افكر و انا على مخدتي افكر شلون قضينة اليوم ضحك و سوالف وية اقاربنة كان شي غريب علي لان چنة عايشين بغربة و اليوم جربت احساس جديد وسط اهلنة بين الفرح و الضحك جان شعور غريب بس حلو كان حلمنة انا و اخوي غسان يكون عدنة اقارب نزورهم و يزورونة و اليوم تحقق هاذ الحلم

اجة بالي طيحتي و ضحكت على نفسي و فجأة اجة يونس على بالي كونة اليوم كلة كان منطوي على نفسة يسمع و ما يحجي هل معقولة متضايق من وجودي بسبب انو انا مو اختة

لا ما معقولة امة و ابو حبوني لدرجة ابو ما يقبل اصيحلة بشي غير بابا وائل نفضت هاذي الافكار من راسي و نمت

#اصيحلة = انادي

مرت ايام على جيتنة للبصرة و بهاي الايام ما انقطعنة على بيت بابا وائل احنة نروح الهم او همة يجونة

#جيتنة = قدومنة

فد يوم من الايام اجو عائلة بابا وائل كلهم

بابا وائل و ام مصطفى و ابنهم الكبير مصطفى و يونس و اخوهم عدنان و امال و فاطمة

الكل گاعد بالصالة وية امي و بيبيتي يسولفون ما عدى ام مصطفى و هناء كانن بالمطبخ يسون عشة

كانت فاطمة بمثل عمري بس ما كانت لا تلعب و لا تحچي وياي و ولد اخوية يلعبون وياهة و هامليني ف حسيت نفسي منبوذة بيناتهم ف قررت اگوم للمطبخ اساعد هناء و ام مصطفى

و قبل لا ادخل للمطبخ سمعتهن يحجن

صوت هناء گال " موتوني بس ياكلون و يشربون و ما يساعدوني و هي بس تسمعني حچي "

ام مصطفى ردت " ميخالف هي عمتج و همة اخوان رجلج "

هناء حجت "  الحجية بس تحچي و تنگنك و ما يعجبهة العجب "

#تنگنك = تثرثر

ام مصطفى " اي ميخالف غير بيبيتة و هي مرة جبيرة و همة ما صارلهم فترة جايين شبسرعة تضايقتي منهم "

ردت هناء " والله يا عمة اني ما كنت هيج ضانة كان ضني راح تبيع ورثهة من رجلهة و نوسع البيت و نعزل عنهم "

ام مصطفى حچت " اي ميخالف تحملي و بعدين انا ما اشوف ام مهند صعبة هيج هية كانت شريچتي و ما كانت تضايقني "

#شريچتي = ضرتي-زوجة زوجي

بلعت ريگي و انا مصدومة من الحچي السمعتة  دخلت للمطبخ بحجة اريد اشرب ماي

اشرب و احس بغصة بچي و هنة ضلن يباوعنلي خايفات سمعت حچيهن تجاهلتهن و اخذت صندوق كتاكيتي و طلعت رحت للغرفة ابجي بصدمة من الي سمعتة .

هسة فتهمت ليش امي كانت رافضة تجي

ضليت حايرة احچي الأمي لو لا

اخاف اگلهة و تتعارك وياهن و انا مثلي مثل اي طفل يخاف من يشوف اهلة يتعاركون

و نمت و انا مقررة ما راح احچي شي

نمت على اصوات ضحكهم و سوالفهم الي صرت احس انو هية كلهة كذب و مجاملات....

{ احيانا...نؤجل الحقيقة...و نخفيها عنهم...
لأنها تؤلمنا نحن وليس هم }