في البدايه احب أعزي كل أم شهيد جيش وشرطه
واحب اشكر كل فرد في الجيش وكل فرد في الشرطه
احنا فعلا من غيركم ولا حاجه ربنا يحفظكم ويحميكم من كل شر،، انتم اولادنا واخواتنا وابائنا لكم مني كل الاحترام والتقدير
القصة : رومانسيات بنوته وظبوطه
الكاتبه: ابتسام محمود
الحلقة الاولى
ع السفره ام قاعده و تبص ل ابنها بغيظ
مصطفى يعدل هدومه و يبص ليها و يقول بتأفف : ماما لو سمحتي مش عايز افطر
داليا بعصبيه : مافيش حاجه اسمها مش عايز افطر
مصطفى بضيق يرفع ايده اليمين ع شعره و الشمال في وسطه و يقول بتأفف: والله ماليش نفس افطر ، سيبيني انزل بقى هتأخر على المدرسه
داليا بتحبط معنوياته عشان ياكل : طول ما انت مش بتاكل عمرك ما هتوصل للي انت عايزه. لازم تاكل ولازم تلعب رياضه اكتر من كده
مصطفى يبصلها بضيق : والله عارف ، بس مش قادر اكل، ولو على الرياضه انا بحاول اعمل اللي اقدر عليه
داليا تمسكه من ايده و تسحب عند مرايه و تقول بعصبيه : بص لنفسك كده، دا منظر واحد ينفع يبقى ظابط ده حتى ولا ينفع تبقى ظابط على نفسك ، مصطفى افهم انا بحبك وخايفه عليك تتصدم ويرفضوك في الكليه وزنك قليل اوي مع طولك ده كله
مصطفي باس ايد مامته وقال و بنبرة حزن : والله فاهم يا ست الكل بس ادعيلى انتي وكل حاجه هتبقى تمام
(مصطفي طوله 185 سم و وزنه 60 كيلو)
نزل و فضل ماشي حاطط ايده في جيبه
و مجموعة بنات كانوا وراه
ميس : ما تكلميه بدل ما كل يوم تجبينا من الطريق ده و نقعد نستنى تحت الشجره لحد ما ينزل و نمشي وراه
رهف بهيام : لا احسن يكسفني
ميس بصتلها : ايه يا بت المياصه دي اتعدلي يا ماما داخلين ع المدرسه
ضحى بهدوء : بس يا ميس متبرديش عليها
ميس بضحك : انتو الاتنين هتشلوني ( تشاور ع رهف طب هي و بتحب و انتي عايمه مع التيار و هيمانه ليه ؟
ضحى : بمووت في العشاق
ميس بغيظ تكب عليهم مايه و تجري
ضحى و رهف جريو وراها
رهف خبطت في مصطفى بصتله ثواني
ميس رجعتلها لحقت الموقف و شدتها : سوري يا كابتن و اخدت رهف و مشيو
ميس: من اولها هتفضحينا يالهوووي ع البنات اجمدى يا بت شويه
رهف بهيام و صوت واطى : شوفتى بصلي ازاي يالهووي عيونه تسحر
ضحى بتبصلها و مبتسمه
ميس تضرب كف ع كف : انتو فعلا هتشلوني و دخلو المدرسه الاعداديه بنات
وهو دخل مدرسته الثانويه بنين
قضى مصطفى اليوم في المدرسه لحد ما اليوم الدراسي خلص
و هو خارج من المدرسة قابل نفس البنات وفيهم واحده بتعيط جامد، فضوله شده وراح لحد عندهم
مصطفي بجديه : فيه ايه يا انسه، مالك؟
ضحى بتوتر: لا مافيش
مصطفي بإحراج : انا اسف لو ضايقتكم ، بس لو فيه حاجه ممكن اعملها مش هتأخر
محدش رد عليه مشى
ميس بصوتها المسرسع : كابتن كابتن ثواني
رهف وهي بتعيط تبصلها : بس يا ميس
ميس تميل عليها : بس ليه؟ هو ممكن يساعدنا و تبقى فرصه نصاحبه و تغمزلها و تقوم تبصله
مصطفى يقف مكانه و يبصلهم : اتفضلي قولي يا انسه
ميس تتكلم بسرعه جدا : في واحد خطف السلسله بتاعت رهف وجري ودخل المدرسه بتاعت الثانوي
مصطفى بقلق و يبص ل رهف : انتي كويسه
ميس : اه الحمدلله
مصطفى قرب ليهم : تعرفي توصفي شكله
ضحى : انا اعرف شكله اووي
مصطفي بجديه : اوصفيلي شكله ولابس ايه
ضحى : هو طويل واسمر ولابس تيشرت بنك وبنطلون جينس فاتح مقطع
ميس تبتسم ل ضحى و تصفرلها : اووووو كل ده عرفتيه من بصه واحده ، ده احنا شكلنا دايبين خالص
ضحى بكسوف : انتي بتقولي ايه يا بارده و تضربها ع كتفها
ميس تبعد عنها و تضحك
مصطفى بص ل رهف : هدخل اشوفه
رهف بخوف عليه : كابتن انت هتعمل ايه؟ ، بلاش تكلم الاشكال ده خلاص منه لله
مصطفى يرفع حاجبه و ابتسم : بلاش ليه؟ على فكره انا لاعب كونغ فو
ميس بصت على جسمه : يا سبحان الله ،، مش باين خالص
مصطفى بضحك : ميغركيش جسمي انا رفيع اه بس المهم العصب ، بس ادعيلي جسمي يتظبط ، هدخل اشوفه جوه وعموما المدرسه دلوقتي مش مليانه يعني هيبان بسرعه
(دخل مصطفى المدرسه )
ميس تبص ل رهف و تقلدها بتريقه : كابتن انت هتعمل ايه ، بلاش تكلم الاشكال دى خلاص منه لله، هههه ايه يا قطه ما صدقتي الواد كلمك اتقلي يا بنتي
رهف وشها احمر و تخفي كسوفها تقوم تضربها ع كتفها بهزار : تفتكري اخد باله من حاجه
ميس بضحك : ده كان شويه و عصافير الحب جاتلك تطير قدام عينك و فوق راسك
رهف بكسوف و تخبي وشها و تبتسم
