#ألحان_مغتصبة24🎶
#بقلم_شيماءعثمان🎶
عادل جوا لجنة الامتحان .... فجأة قلبو انقبض و شعر بالدنيا وقعت فوق راسو لما يدو ارتعشت القلم منها وقع ...
نغم بتحاول تفتح عيونها لكن جفونها تقيل ... بتحركو بصعوبة ... فتحت عينها نص ... دخل شعاع قوي سبب ليها ألم ... تاني حاولت تفتح عيونها.... شايفة طشاش ....و تدريجيا الرؤية رجعت ... لقت نفسها على سرير في غرفة كبيرة ... الظاهر عليها مستشفى رفعت يدها اليمين ... موصل فيها درب ... و التانية ماقدرت تحركها كان فيها جبس .... شاعرة بصداع شديد ... اتحسست راسها .. كان مربوط بشاش بقت تحرك عينها تتفقد للموجودين .... امها واقفة جنب السرير بتبكي ... ابوها كمان كان واقف جنبها ... بمسح دموعو و بعاين ليها ... عادل واقف قصادها و ملامح وشو كلها حزن ... سامر بالجهة التانية بتكلم لكن صوتو بعيد ... في نهاية الغرفة كلهم موجودين ... رؤى ... ربى ... نور امهم و طارق ... سامعة اصوات ما مفهومة .... طنين جهاز تخطيط القلب عامل ليها ارتباك ... امها بتقول ليها بنتي انتي كويسة ... اتكلمي معاي .... قولي حاجة ... انتي سامعاني ...طيب شايفاني ردي علي يابتي ماتوجعي قلبي عليك.
نغم في حالة ذهول بتحاول تستجمع الصور عشان تفهم البحصل ... بصوت مرتعش و حروف متقطعة قالت ليها ... م م ما ماما أ أنا وين
عفاف بتمسح دموعها حضنتها .... واااي يابنتي انتي كويسة
نغم : حصل شنو
عفاف : حادث بسيط و بتبقي كويسة
فجأة الصور و الاحداث اتجمعت و نغم اتذكرت .... قالت ليهم انا نطيت من العمارة
جا الدكتور داخل معاه ممرضة ... ياجماعة ماصح كده المريضة لازم ترتاح ... ارجوكم اطلعو من الغرفة و الزيارة بمواعيد
عفاف : انا مابخلي بنتي
الدكتور : يامدام ماتصعبي الامور ... إلتفتت ل عادل قال ليو .. يادكتور انت عارف الاجراءات و كل التجاوزات دي عشانك ... لكن كمان ماممكن نسمح للعدد دا في العناية المكثفة
عادل : ان شالله
نور : ياجماعة كلنا نطلع نخلي الدكتور يشوف شغلو
عفاف : انا ما بطلع
مجدي : قولي خير
عادل : مامشكلة ياعمي خليها براحتها
بعد ما طلعو ... عفاف قاعدة جنب نغم ... عادل و الدكتور ماسكين التقارير واقفين في طرف الغرفة وبتكلمو ... و نغم تايهه ما عارفة شنو البحصل قدامها ... جا الدكتور و بدا يسألها ... شايفة كم اصبع قدامك ... سامعاني بوضوح ... اسمك منو ... بتدرسي شنو .... ساكنة وين .... عارفة الاشخاص ديل ... و بقى يهظر معاها ..2×2 كم .... ما اطول نهر في العالم .... طيب من رئيس امريكا ... هي بتجاوب على الاسئلة و عندها سؤال محيرها .... منتظراه يخلص ... قال ليها حاسة بألم في يدك ... ردت عليه يدي شاعرة بيها محجرة .
الدكتور : عشان الجبس ... ماتخافي
نغم : و الصداع كسر راسي
الدكتور : لأن الضربة كانت قوية .... بكتب ليك مسكنات و الممرضة تجيبهم ليك
نغم : دكتور في حاجة غربية
الدكتور عاين ل عادل الواقف مربع يدينو و منزل عينو على الارض .... قالت ليو ...ما حاسة برجليني خالص ... كأنهم ما موجودات ....
عفاف ختت يدها على فمها و قعدت تبكي بصوت مخنوق عادل طلع النظارة غطى وشو و لف ناحية الحيطة بمسح دموعو و بحاول يحبسها
الدكتور شال حديدة صغيرة أشبة بالمطرقة بدا ... بضرب رجلها و يسألها ... هنا شاعرة بحاجة ... ردت عليه لا
الدكتور : طيب و هنا
نغم : برضو لا
الدكتور : المره دي بضربك بقوة ... شاعرة بألم
نغم : مافي حاجة يادكتور ... قول لي في شنو .... التفتت ل عادل ... قول لي انت في شنو ... لي مابتتكلم معاي ... من قبيل ساكت .... دكتور انا ماقادرة احس برجليني .... حبيبي رد علي ... ماما انتي اتكلمي ... في شنو
الدكتور : اهدي يا انسة مافي شي ... دكتور عادل المفروض تجي تتكلم مع خطيبتك
عادل مسح دموعو لبس النظارة و جا وقف جنبها ... حياتي الموضوع بسيط كلها عمليه صغيرة و ترجعي كويسة
نغم : عملية شنو
عادل : الوقعة أثرت على العمود الفقري ... لكن بسيطة ماتخافي
نغم : اثرت كيف يعني ... قول لي الحاصل و ماتكذب علي ... في شنو ... لي ما قادرة احس برجليني ولا قادرة أحركهم ...... عادول قوووووول اي حاجة ماتخليني كده
عادل مسك يدها ... حبيبتي اهدي الموضوع بسيط
نغم انفعلت و بقت تحاول تحرك نفسها .... انا ماقادرة اتحرك ياماما ... اتكلمي انتي قولي في شنو ..عفاف بتبكي قالت ليها ... اهدي يابتي حرام عليك
الدكتور : ياجماعة ماينفع كده .... نغم اهدي شويه
نغم لسا بتتحرك و عادل مثبتها من اكتافها ... روحي ماتعملي كده بتأذي نفسك اهدي ارجوك ... صرخت فيه .... انا مالي يا عادل ... عاين ليها غمض عينو و دار وشو الناحية التانية
الدكتور قرب منها.... العمود الفقري اتضرر بسبب الحادث و الاطراف السفلية اصابتها حالة شلل
بقت تكورك .... شلل ... شلل ... قلت شنو ... يعني انا بقيت مشلولة ... لا ... لاااا ... لاااااااااا
عادل مسك يدها بقول ليها كفاية حبيبتي ... عفاف حضنتها و بتبكي
نغم : ياماما انا بقيت مشلولة
عفاف : قولي لا إله إلا الله يابنتي حرام عليك كده
نغم بقت تبكي و تصرخ بطريقة هستيرية لحد ما الدكتور طلب من الممرضة ابرة مهدئة ... ادوها الحقنة بصعوبة .... هدأت شوية ... نامت و هي في حضن أمها ...
صحت من النوم مفزوعة شايفة امها جنبها قالت ليها ... ماما انا شفت كابوس مخيف .. حاولت أحرك رجليني ماقدرت ... كان كابوس بشع ياماما
عفاف حابسة دمعتها بتقول ليها ... اهدي حبيبتي
نغم : عايزة اقوم من السرير دا كرهتو .... بتحاول ترفع رجلها ماقدرت ... تاني حاولت لكن بدون فايدة .. صرخت يأعلى صوتها ... لااااا ما قادرة امشي ياماما ما كان كابوس
باب الغرفة انفتح ... دخل ابوها وعادل مخلوعين ... عفاف بتقول ليهم .. ألحق بنتنا يامجدي بنتي بتضيع .... ابوها قرب منها حضنها قال ليها ... نغم حبيبتي طولي بالك ... رفعت راسها بتعاين لعيونو الكلها دموع .... بوجع قالت ليو .... يا بابا ماقادرة أحرك رجلي
مجدي : ماتخافي ياعيوني انا حعمل اي حاجة عشان ترجعي لينا زي زمان .... لو اديك قطعة من قلبي بس اشوفك تضحكي
ختت راسها على صدر ابوها وقعدت تبكي بأنين ... و هو بمسح شعرها وبهديها ... قعد يقرأ عليها قرآن ... لحد ما سكتت و آهاتها خفت شوية .
عادل طول الوقت قاعد جنب رجلينها بعاين ليها و دموعو ما عايزة تقيف ... طلع من الغرفة غلبو يستحمل أكتر مشى للدكتور المتابع حالتها في مكتبو
عادل : حددتو العملية ولا لسا
الدكتور : انا مقدر وضعك تماما يادكتور و الفترة العصيبة البتمر بيها لكن انت سيد العارفين ... مامفروض نستعجل عشان اي خطأ بقطع كل حبال الامل ... تانيا ما اخبي عليك نسبة النجاح ضعيفة .. انت شفت صور الاشعة و التحاليل
عادل : يعني شنو
الدكتور : في البداية المريضة لازم تتقبل حياتها على كرسي متحرك و ننتظر مده لحد مانجهزها للعملية .. انت جراح مخ واعصاب دا شغلك و انت ادرى مني في طرق العلاج
عادل : طيب ... متشكر
الدكتور : مامحتاج اذكرك ان الحالة النفسية مهمة جدا
عادل : اكيد ... عن اذنك
لما طلع من مكتب الدكتور صادف طارق في الممر
طارق : طمنا يادكتور
عادل : ما عارف اقول ليك شنو ... لأول مره احس بروحي عاجز
طارق : خير ان شالله ... هسي لازم نمشي القسم
عادل : في جديد
طارق : الظابط ضرب لي .. اعتقد تلفونك مغلق ... مفروض نمشي عشان التحقيق و عشان البواب في الحراسة من يوم الحادث
عادل : عايز اعرف منو السبب و الحصل شنو عشان أولع فيهم كلهم
طارق : طول بالك ... نهائي مابنرحهم ... لو نغم تهدأ شويه عشان نفهم منها ... كلام شهد و الشهود متناقض .
في غرفة نغم .... سامر قاعد جنب اختو ماسك يدها بقول ليها ... ماتبكي نغمة ... كفاية عليك الله
نغم : انا بقيت عاجزة ياسامر
سامر : ماتقولي كده بكره ترجعي لينا زي زمان و تبقي كويسة
شهد جات من برا بتبكي ... مسكت نغم حضنتها .. قالت ليها اعفي لي يانغم ...تنقطع يدي لو كنت عارفه بحصل كده ياريتني ما اديتك الرسالة .. انا السبب و عمري ما اسامح نفسي
نغم : انتي ماعندك ذنب
شهد : ذنبي اني صدقت كذبة سارة و ذنبي اني وصلت الرسالة ... ذنبك في رقبتي ليوم الدين
بعد شوية جا عادل داخل معاه طارق و ظابط ...الظابط قال ليهم ممكن ياجماعة تطلعو انا عايز المريضة عشان التحقيق .. كلهم طلعو .. نغم إلتفتت على عادل قال ليها ما تخافي بفضل معاك
قعدت تحكي للظابط كل الحصل
الظابط : سارة و ابوها اختفو و من يوم الحادث بيتهم مقفول لكن التحريات شغالة وقربيا بتمسكهم هم والاسمو هاشم
طلع الظابط فضلو عادل و نغم لوحدهم ... جر الكرسي و قعد جنبها بنظرات حزينة بعاين ليها ... نزلت راسها و درات وشها الناحية التانيه
عادل : مالك حبيبتي
نغم : حبيبتك خلاص انتهت
عادل : ما عايز اسمع كلمات جبانه زي دي ...انتي قوية و حاجة زي دي مابتهدك
نغم : انا اتهديت وخلاص .... كسروني شالو بقايا الفرح .. طيرو الاحلام مع الهوا ... خلصو القصة قبل ما تبدأ
عادل : خلي ايمانك بالله كبير و ثقتك ماليها حدود ... خليك متفائلة ان بكرة احلى
نغم ابتسمت بسخرية قالت ليو ... بكرة بقى عاجز و الاحلام اصبحت مشلولة على كرسي بعجلات ( ألحان مغتصبة بقلم شيماء عثمان)
بعد اسبوع ... حالتها اتحسنت نوعا ما و الدكتور كتب ليها خروج ... جابو الكرسي المتحرك و الممرضلت ساعدوها قعدت عليه ...مغطية وشها بيدينها بتبكي و كل شوية تعاين لأرجلها العاجزين ... ركبوها العربية ... ماقادرة ترفع عينها تشوف الناس ... وصلو البيت ... ابوها و اخوها بصلحو الكرسي عايزين يقعدوها عليه ... نغم عينها جات على شباك يحيى ... دموعها نزلو شلال .. قالت لنفسها شفت الحصل لي .... فرحتي كانت كبيرة وجعتهم .... سلبوني حياتي سجنوني على كرسي متحرك سرقو مني الحلم .
لنا لقاء أخر ....
أنت تقرأ
ألحان مغتصبة
Romanceأنت َ.... الذي جئت مختلفاً لست صديقاً و لا حبيباً .... لكنك حياة . أنتِ .... كقعطة موسيقى تضخ في وتيني .
