ما كل من يركب على الخيل خيال
ولا كلّ خيل تعجبك هي أصيله
ولا كلّ من يعجبك هرجه برجال
بعض العرب ملسون وايده بخيله
الكل يلبس ثوب وشماغ وعقال
وعند اللزوم أفعالهم هي قليلة
الرجل تثبت له أقاويل بأفعال
لاقال شئ ونفذه هو دليله
والرجل لا شفته مع القيل والقال
ابعد عنه هذا صفاته عليلة
والكذب خلّه عنك ما فاد لو طال
قول الصدق يا صاح غنم وجميله
وخلك شجاع وذي صفات للأبطال
اللي كما سيوف تبارق سليله
واللي شراك اشريه لو كان بالمال
خلك معه وإن مال دور بديله
واصبر ترى الدنيا تبدل بها أحوال
وما كل شيء صافي تشوفه تجيله
وبعد الكدر تشرب صفا عذب وزلال
هذا الزمن فيه استقامة وميلة
وصاحب خليل لو جفا الوقت ما مال
ترى الرجل يعرف بقيمة خليله
واقفل على سرك بكتمان وأقفال
بعض العرب يسمع وينوي بحيله
وخلك أمين إذا توليت الأعمال
من خان في يوم الحشر يا حليله
خل التواضع فيك واضح بالأفعال
ترى الكبر يردي بيوم وليلة
ولا تحسد اللي عنده أموال وعيال
وش ينفعك لو كان حسدك يزيله
ولا تزور تقلب الزين بطال
الله عليم بالنوايا الدخيلة
وخلك رزين ترى المخفه للأطفال
واصفح عن المخطي ولو زاد قيله
واحمل همومك لو تزن وزن الأثقال
بكره تروح وتنجلي لو ثقيله
وصلي الفروض ولا تنسيك
الأشغال محدن في الدنيا درى وش بقي له
وزور الأقارب للرحم كون وصّال
وخلك عظيم الشان وسط القبيلة
وصلاة ربي عد ما هل همال
على النبي اللي صفاته جليلة......❤
عليه افضل الصلاة واتم التسليم
