MAHAL MO O MAHAL NG MAGULANG MO?
LAKANDIWA
Isang masaganang araw sa lahat ng taong nasa harapan ko
Sa lahat ng Pilipinong nagdalo mula pa sa iba't-ibang sulok ng mundo
Ang inyong lingkod ngayo'y nakatanggap ng mensaheng nangangailangan
Ng sagot mula sa magkaibang pangangatuwiran.
Paksa ngayo'y ating hihimayin sa hapag-kainan ng katuwiran
Ay patungkol sa kung alin sa dalwa ang iyong pinapanigan:
"Hahayaan mo ba o hindi mo hahayaan
Na ang iyong magulang ang magdidikta kung sino ang dapat mong pakasalan?"
Halina't ating pakinggan ang dalawang panig na magpaparinigan
Mga kalahok nating malalayo pa ang pinanggalingan
Simulan na natin ang balagtasan
Sa isang masigabong palakpakan!
HAHAYAAN
Ang bawat magulang ay may pangarap
Magagandang hangarin para sa iyong hinaharap
Halimbawa ang taong sayo'y pinagpipilitan ay isang mayaman
Iisipin mo bang mga magulang mo'y pinagtripan ka lamang?
Kung ang kapalit naman ay lubos na yaman at kaginhawaan
Hindi mo pa ba papatulan?
Pagmamahal naman ay maaaring maramdaman at maranasan
Mula sa estrangherong ipinilit sa iyo na pakasalan.
Mukhang itong katalo ko ngayo'y may ibang katalo
Nakikipagtalo ka na ba sa sarili mo?
Namulat ang iyong mga mata sa katotohanan
Na dapat hayaan kung sino ang gusto ng magulang.
HINDI HAHAYAAN
Sandali lang kaibigan
Tila iyong nakalimutan
Na ang maaari lamang ikasal sa simbahan
Ay ang dalawang pusong tunay na nagmamahalan!
Para sa akin, ito'y hindi dapat hayaan
Magulang man o kung sino pa yan
Sa pagdating ba naman natin sa wastong gulang
Ang pagdedesisyon ay hahayaan pa rin sa magulang?
Anong meron sa yaman niyang taglay
Marahil ay nasilaw ka lang nang tunay
O maaari'y hindi mo pa nakikilala ang pag-ibig mong tunay
Kung kaya'y mga magulang mo'y hinahayaan mo na lang na magpakahusay.
LAKANDIWA
Umaapaw ang dalawang damdamin
Pati ang inyong lingkod ay nahihirapan rin
Sa kung sino sa dalawa ang dapat piliin
Ang mananalo'y sino kung iisipin.
Parehong magagaling sa paglahad ng saloobin
Mayroon na ba kayong pipiliin?
Sa ngayon, hayaan pa natin silang magparinigan ng panig
Upang malaman natin kung sino ang nararapat na manaig.
HAHAYAAN
Aking aaminin na ako'y kasal na
Walang iba kundi sa taong magulang ko ang naghusga.
Ngayon kami ay namumuhay nang sagana
At wala na akong hihilingin pa.
Ito lang ang masasabi ko sa iyo
Ika'y isang tao na tipong walang ulo.
Mas hangad mong maghirap kayong dalawa
E, kung pwede namang maghiwalay at humanap ng iba.
HINDI HAHAYAAN
May tanong akong matindi
Mahal mo ba ang taong sayo'y nakatali?
At teka, aba'y ano naman kung mahirap?
Sa luho lang ba nalalasap ang tunay na sarap?
Kung ako'y walang ulo, paano ka?
Isang taong wala na ngang desisyon para sa sarili'y sa bagito'y nakatali pa.
Pagpasya ng magulang ko'y aking nirerespeto nang lubusan
Ngunit pagdating sa ganitong bagay, iba na ang usapan.
LAKANDIWA
Ikinalulungkot kong sabihin, ang hatol ko'y wala pa rin
Kahit aking paulit-ulit na isipin
Ngayon, gusto ko'y kayo na ang humusga
Sino nga ba ang papanigan sa dalawa?
Hahayaan mo ba o hindi mo hahayaan
Na ang iyong magulang ang magdidikta kung sino ang dapat mong pakasalan?"
Maaari po ba akong humiling sa mga naririyan pa?
Isa namang palakpakan na masagana!
Sa kanilang pinagtaluna'y walang natumba
Kung kaya nama'y kayo na ang bahala
Pagpalain tayong lahat ng ating Diyos Ama!
Maraming salamat po at ako'y magpapaalam na!
