هيلووو للكل ...
اليوم راح نتناقش بموضوع كلش مهم ويحتاج فعلا الحديث بيه....
تاج الراس ...والخطوط الحمراء
مصطلحات استخدمت لاشخاص غلط اتخذهم البعض عباره عن اشخاص منزهين من الاخطاء واكيد راح يكون اكبر غلط بحياتك انك تكلمت عنهم بسوء حتى لو كان كلامك كله صحيح....
في 2014
بدأ تنضيم ارهابي وطاغي بتغلغل بمناطق من محافضات العراق مستحيل انذب اللوم على شخص معين الكل جان مسؤل عن التقصير واقصد باالكل الجهات المعنيه بها الموضوع ...بعد مصار كل هذا خرج الشعب وابناء البلد حتى يدافعون عن الوطن والحرمات ....صار هذا التجمع الشعبي عباره عن فصائل ومجموعات عرفت باالحشد الشعبي (المقدس)وصار لها التجمع قاده حتى يكون الهم تنضيم ويكون التدريب وطريقه الحرب كفيله باالانتصار .... بعد مخلصت الحرب طلعت لها القاده وجه جديد واثبتوا شئ واحد وهو الصراع على المناصب مو اكثر ومو مثل مكالوا انو كل همهم الدفاع عن البلد ....دمرونه باافعالهم وبتقصيرهم ...وبينو انو انته باالعراق انولدت حتى تموت بس همه راح يخيرونك بطريقه موتك ويكولون يااما تريد تموت بحرب او احنه نموتك عطش وجوع مثل مصار بأهل البصره احنه بالنسبه الهم ولا شي دخلوا شبابنا بسوح الحرب بدون تدريب مسبق ولا حتى خبره راحوا منهم الاألاف (بمجزره سبايكر)وللان متحاسب اي شخص بخصوص هاالشي اما الي بقوا استخدموهم كدروع بشريه ومثل الساتر بحجه ايقاف تمدد العدو ومو مشكلتهم
اذا استشهدوا لان هاالشي اخر همهم الشي الي سووه بهاالحاله انو يرحون لاهل الشهيد وياخذون وياهم صوره اول يوم وبعد ميدخلون بشي يبقون جوعانين عطشانين او يمكن الي استشهد هالشخص هو الوحيد الي يصرف على عايلته...
بس لا المهم همه ضهروا بوجه التعاطف ويه اهله وبينوا انهم مهتمين بعوائل الشهداء الي همه جانو سبب بموتهم .....بعدين يجي شخص ويكول اذا بيك خير صير مثلهم وروح حارب ويكولون جملتهم المستفزه(هذولي حامين اعراضكم)...وليش ...ليش ماالنه حق انعيش يعني الا نموت حتى نكون مهمين ويحترمونه ويصير صوتنه مسموع وبعد شنو يسمعونه لمن مايكون النه صوت وراح يستخدمون اسمائنه عباره عن سلم حتى يصعدون بيه لغايتهم مو اكثر
اكبر دليل على عدم الاهتمام هم المتضاهرين...
الشهداء الي راحوا بس علمود يبقى هذا البلد عامر اما الي للان بعدهم بالحرب طلعوا بس عمود يوفرون حياه بسيطه لاهاليهم مستحيل نكول حياه كريمه لان هاالشي بعيد كل البعد عن الحياه بالعراق ...
الجندي من يرجع لاهله شنو الي يريده...يريد بس مي صالح يشربه وكهرباء حتى يحتمي من حر الصيف الي يوصل لنصف درجه الغليان وخصوصا باالبصره وبعض المناطق الجنوبيه ويريد تعليم لابنه بس للاسف ولا مهتمين بأي شي من هذي الاشياء....
صارت مطالب العراقيين بسيطه ابساطه عيشتهم لدرجه صاروا يساومون على المي الي يشربونه وصاروا يكولون... احنه انطينه ولدنه انطونه ثمن الشي الي قدمناه وبعد كل هاالشي (الخطوط الحمراء وتاج الراس مثل ميسمونهم) طلعو بتصريحات ويكولون انو المتضاهرين الي طلعو مندسين ويريدون يزعزعون امن البلد ....بس لا كل الي طلعوا هم اخوان واصدقاء واهل الشهداء الي راحو بسبب اخطائكم وهاي بدل متلبون طلباتهم واجهتوهم باالقمع ورجعتوا مره ثانيه قتلتوهم وراحو شهداء وهم كله بسببكم ....
الي جانو باالحشد هم ولدنه وهمه الي حرروا البلد مو الي تاجروا بأسمائهم حتى ياخذون كراسي باالبرلمان ويكونون احزاب ....
يعني الى متى سويتو حرب طائفيه بينه وماتو الاالاف بينه حتى نحل هاالمشكله واحنه الي حليناها وسويتو حرب سياسيه واقتصاديه واحنه جنه الضحايه دخلتو داعش للعراق وهم ماتو الالاف حتى نخلص من هاالحرب يعني لشوكت انتم تغلطون واحنه الي ندفع الثمن ونحل المشاكل ..زين سؤال شكو لازمين البلد عوفوا واحنه نتكفل بكلشي بيه ..كلشي حليناه وكل حرب كدرنه ننتصر بيها وماتو هواي منه ...بقت بس على حكم البلد
*************
رئيكم باالشي الي كلته يهمني اكيد
ولو فكرت اسوي بارت ثاني من سياسيات شنو تحبون يكون الموضوعةالي نتناقش بيه
