#مدللتـي
الحـلقـه التامنـه عشـر
محسن شايرله على عيونه : و اغلى من عيوني يا عمي
______________________
بعد مرور ساعة 🌹
كنا مقعمزين في حوش عيت محسن عشان يرحبوا بيا و زعميتك فرحانين برجعتي بس كنت انجامل فيهم مجاملة 😒
غمزلي محسن و اني فهمت عليه و نضت طول 😍
طلعنا مع بعضنا و ركبنا شقتنا
اول ماخشينا تفاجأت ؛ لقيته مزين الحوش كله بالورد الاحمر و مجهز أجواء رومانسية على ضوء الشموع
اني ضحكت و حطيت ايدي على فمي : محسن !
محسن سكر باب الشقة و جاء من وراي ، مسكني من عند خصري و حط راسه ف رقبتي
و تكلم : نعم يا قليب محسن
اني حطيت ايديا فوق ايديه و نبحت ف طاولة العشاء اللي مجهزها
اني : شنو الحاجات السمحة هذي
محسن بصوت هادي من وراي : عجباتك المفاجأة أميرتي ؟
اني قلبي يدق : اكيد بدون ماتسأل .. بس شن اللي ضمنلك اني حنرجع معاك عشان تجهز هضا كله
محسن : حتى لو ماكنتيش حتجي انا كنت ناوي نخطفك و نجيبك بالغصب
اني ضحكت
و محسن برمني ليه : مش وعدتك ان كل شي حيتصلح ؟
اني مبتسمة : اها
محسن : حانعوضك ياقليبي عن كل اللي راح و ان شاء الله ربي يقدرني اني نسعدك و نهنيك و مانقصر معاك
اني نبحت فيه و نسمع ف دقات قلبه العالية لدرجة خلّا قلبي يدق معاه بسرعة
محسن مسك ايدي و حطها على قلبه : انتي قليبي اللي ينبض يا أميرتي والله مانحب خاطيك ولا نبي خاطيك ، لما طلعتي من الحوش و مشيتي خديتي روحي معاك ، طلعتي و خليتيني جسد بلا روح خليتيني عايش من قلة الموت
و ابتسم ابتسامة خفيفة اللي ذوبتني معاه : لكن الحمد لله ربي استجاب لدعواتي ان تحنني قلبك عليا و ترجعيلي و مستعد نضحي بروحي عشانك ولا تغيبي عليا يوم
اني حطيت ايدي التانية على لحيته : حـبـيـــــتك و عشقتك بكل مافيا ، حبيت كل شي فيك .. عشقتك بطبعك هذا و حنيتك ، رجوليتك وصوتك وضحكتك ؛ ريحتك ومشيتك و وقفتك حتى من قساوتك عشقتهااا
محسن ابتسم و قرب مني و باسني بوسة طويلة خلتني نذوب و نرتخىٰ بين ايديه
محسن وخر خدا نفس و شالني : المفاجأة مازال ماتمت
اني ضحكت : ياسلااام
خش بيا لدار النوم و نزلني ؛ لقيته شاري عرم ارواب و حاطهم ع السرير
اني بديت نمسك نشوف فيهم بالواحد : ههههه شن خطرهم عليك
محسن ساكت
و بحتت على طرف السرير لقيت جوان بتاع قفطان جيت فتحته لقيته قفطان ابيض قصير بلا كمام
حطيته على روحي و صبيت قدام المراية نشوف فيه عليا و فرحانة الفرحة مش سايعاني
اني : واجد عليااا هكي يا محسن
محسن واقف مربع ايديه و مبتسم : مش واجد عليك الدنيا كلها يا عمري انتي غر اطلبي و ادللي يا #مدللتـي .. نبيك تلبسيلي الأبيض و نعوضوا الليلة اللي راحت علينا
اني سكتت و قعدت نبحت ف القفطان
محسن : هئحم .. اني مابيتش نشري فيلو و نقعد حاصل فيه في كبره قلت هضا اسهلي و اريحلي
و عض فمه و غمزلي
اني ضحكت و جيت حضنته بقوة و دفنت راسي بصدره : نحبك نحبك نحبك
محسن لف ايديه عليا بقوة : و انتي الحب اللي في قلبي كله لك يا أميرتي
اني خنقتني العبرة في حضنه و بديت نبكي تلقائيا ماعرفتش هل هو بكاء فرح ام حب ام اشتياق بس اللي نعرفه اني اسعد وحدة ف الدنيا و انا بين ايديه
محسن ضحك : كنه حبيبي نا ؟
اني نبكي و العبرة ماسكتني مش قادرة نرد عليه
محسن رفعلي راسي و مسحلي دموعي : من اليوم مافيش دموع ولا جروح ولا جفاء .. من اليوم حنكونو مع بعضنا و لبعضنا طول العمر
و باس على راسي
