#اومينيس6
: انا فعلا مبشوفهمش انا بسمعهم!!
سكت عشان لو رديت عليهم هيقولوا اتجننت بتكلم نفسها الا بابا هيشك فيا وش لانه سبق وسألني عنهم بس مقدرتش اقوله عنهم التزاما بالعهد اللي بيني وبينهم ايوه من بعد اجيال كتير قدرت اعمل عهد تاني بينا وبينهم العهد اللي اجتنبوا يعملوه اجدادي واعمامي وبابا كمان كله بس اعتقد فات الاوان بابا استحاله يقول خدام الصمديه مش هيتأخروا غير لو توصل معاهم لاتفاق معين ربنا يستر من اللي جاي
الشيخ ربيع : هو انت!!
=مش وقته يا شيخ ربيع اللي حصلان ده كلنا في كفه واحده ونفس الجانب مفيش وقت للتفصيل المهم مينفعش ننصرف عشوائي لازمنا خطه والا في ارواح هتضيع
اسلام اخويا فجأه بانت عليه ملامح الجد وده غالبا مش طبعه فجأه بص لبابا.. "طالما الموضوع خطر كده فلازم امي تروح عند خالتي نقولها تاخد ريتاج وتقعد يومين هناك عشان تستريح بحجة اننا هننضف البيت ونرقيه..
=ميين بيقول كده اسلاام اخويا حد يقرصني يمكن بحلم!
-وطالما هي هتروح ي بابا فلازم يكون معاها راجل مينفعش تروح هي وريتاج لوحدها وعامر صغير معاهم فاعتقد اني هروح معاهم لحد م تخلصوا انتو الحوار هنا ادوني رنه
-مناااااا بقوووول برضو والله لو م قولت كده كنت هشك انك اسلام برضو
: -تري والله اسلام اخوكي هذا دمه خفيف ايش العسل هذا يا زول
-دمه الخفيف ده هينفعنا بايه في المعركه داحنا داخليين علي ايام سووده يا جدع
>هتودووني في داهيه اسكتو انتو الاتنين
-م هي بتتكلم اشمعنا انا الله
>خلاااص يا نائل وانتي يا ميمونه ابووس ايديكم ابويا لو عرف حاجه عنكم هيعمل مني بتتس محمره اسكتو شويه خليني اركز معاهم ، و اه يا ميمونه فكك من اخويا هاه
=واييش فيني كمان المخلوق خوكي دمه خفيف ما زدت عن هيك
-اه وماله ده اللي ناقص م تكراشي عليه بالمره
>خلااااص يا اخرة صبري خلاااص
جتني فكره!!
-قول يا شيخ ربيع لعله خير
انا هجيب الشيخ ابراهيم صاحبي هو ليه خبره اكتر في التعامل معاهم وعلي علم بانواعهم وامكانيات كل نوع فيهم واكيد علي علم بنوع المارد اللي ظهر ده ويقدر يعرفلنا اسمه لان ببساطه لو عرفنا اسمه ف كده عرفنا نقطة ضعفه
هروح اجيبه انا تكونو انتو ظبطتوا دنيتكم هنا وجهزتوا المكان كويس شيل الاثاث كله ده من الصاله واي صور او براويز ومجسمات فضيهالنا خالص كده ولما اوصل هبعتلك رساله فيها شويه طلبات هاتها
-ماشي يا شيخ ربيع في انتظارك بس متتأخرش كل م كنا اسرع في التحرك كان ده لصالحنا
مشي الشيخ ربيع بس قبل م يمشي علي الباب بصلي وقالي " لو والدتك وريتاج هيروحوا عند خالتك فيستحسن خليكي انتي! "
مش مرتاحاالك مش مرتحااالك ..!!
- حاضر يا شيخ ربيع هستناك مع بابا واسلام هنا
بالفعل والدي راح يوصل ماما وريتاج لخالتي وعامر اصلا كان هناك قبلهم راح بعد الحصه بتاعته علي طول مفضلش غيري انا واسلام في البيت بدأنا نشيل الكراسي والسجاد واي حاجه في الصاله وننزل البراويز ونشيلها دخلت جوه عشان اشيل الحجات والصور في الدولاب لحد م فجأه سمعت صوت قزاز بيتكسر...
جريت اشوف في ايه لقيت اسلام ماشي ناحيه الشباك ماشي بيشوط اي حاجه قدامه كأنه مش شايف كأنه.. مغيب!!
ببص ناحيه الشباك اتفزعت من المنظر ،مييييين دي ؟؟؟
: غيمه كبيره علي هيئة واحده شعرها طوووويل قواام ممشووق ولبس حرير في حرير مديانا ضهرها مش شايفه وشها من ضهرها وهي بالحلاوه دي اومال وشها عامل ازااي!
=اوعي الشبح عبرنا يا مدمرنا
ميين دي يا نائل واسلام ماله مغيب كده لييه وماشي ناحيتها زي العروسه اللعبه كده ليييه ؟؟
=لا مفيش دي واحده من بنات الخناس شيطانه يعني بتيجي علي هيئة بشريه فاتنه الجمال وبتقتل اي حد بتظهرله وتقريبا كده اخوكي هينط من الشباك
-الله يخربيتك وبتقولي كده دلوقت ببرود اعصاااب
اسلاااااااااااااااااام
اول م ندهت اسلام ولا كأنه سمعني ولا كأني بصرخ وبنده عليه في دنيا تاني خالص بس فجأه بصتلي وشها م زي م توقعت خااالص ايه البشاعه دي كميه سوااد وشعر وعنين حمرااا جلد مجعد سنان صفرااا وانياب سودااا شكلها دب الرعب في قلبي اتفزعت ورجعت لورا هو ازاي اسلام شايفها كده وبرضو ماشي ناحيتها يا اسلااام حاااسب الشباك يا اسلااااام يا اسلاااام فوووق
=لانه هو ما شايفها بنفس الهيئه ياللي انتي شايفتيها هو شايفها ملكة جمال وفاتنه مغيب وعقله في وادي ثاني نااائل ساعدني ما فيني اعمل حلقه سينجال وحدي
-فوراا متقلقيش يا راندا هنحبسه فيها الحلقه دي انا وميمونه بس ممكن بسهوله تكسرها هي مش ساهله بنات الخناس من اخبث الشيطانات واعتاهم حاولي تقري ايات الحرق عشان تضعفيها او تلهيها
وبالفعل بدأت رياح كبيره تهز المكان كان نائل وميمونه بيشكلوا الحلقه عشان اسلام يدخل فيها فجأه الشيطانه دي حجمها بدأ يكبر كأنها بدأت تعرف هما بيعملوا ايه وهتهاجم فورا بدأت اقرا ايات الحرق واعلي صوتي واتجنب ابصلها عشان مضعفش بمجرد م بدأت القرايه شكلها اتحول تماما واسلام شكله فاق ووقف تماما شافهاا وصرررخ بدأ يرجع لورا ويقول انا كنت رايح فين واييه دي اومال فين ال.. اول م بصلها " لا سوري والله كان نفسي بس للاسف انا مرتبط وبكراش علي منار بتاعة حصه العربي تعرفيها! طب استأذن انا بقي "
اسلام يرجع لورا وهي حجمها يكبر ومنظرها يزداد بشاعه لحد م الحلقه اتشكلت وشملته جواها وانا بدأ صوتي يعلي ويعلي.. " وقل رب اعوذ بك من همزات الشياطين واعوذ بك ربي أن يحضرون "
"يرسل عليكما شواظ من نار ونحاس فلا تنتصران فبأي الاء ربكما تكذبان "
بدأت صرخاتها تعلي وتعلي كأنها في وادي بعيد وصدي صوتها مؤذي لحد كبير صوتي يعلي وصرخاتها تزيد كأنها بتصطلي في الجحيم.. الرياخ بتزيد قوه وقعت في مكاني وكأن الشقه هتتهد علينا كلنا مبطلتش قرايه لحد م قربت مني جامد وبكل برود ضحكت "لم ينتهي الامر بعد!! "
فجأه المكان كله سكن مفيش صوت غير انفاسي انا واسلام بننهج م التعب الحلقه اختفت اسلام وقع ع الارض.. " اااادي اللي واخدينه من صنف الحريم " جريت عليه قولتله انت كويس!
= بجانب اني كان هيتعمل مني بوفتيك دلوقت الا ان انا كويس الحمدلله
فجأه قومت لطشته بالقلم اوماااال عاملي فيها الف شبح في بعض ياخي جتك نيله
-ع مهلك عليه راندا اي انسي مكانه راح يعمل اكتر من هيك
بقولك ايييه متدافعيش عنه هـ..
=بتكلمي مين انتي اتجنيتي بتكلمي نفسك ؟
-ايه ؟ بـ ..بــ كلمك انت بقولك متدافعش عن نفسك اديني بقولك اهو!!
هو انا نطقت اصلاااا!
طب رووح روووح اغسل وشك لبابا يجي يشوفك جايب الوان يقول اتلبست ولا حاجه وتحكيلهوش عن حاجه حفاظا علي برستيجك بس
دخل اسلام يغسل وشه وعمال يتمتم ويسب ويلعن ف سره مش عارفه بيشتمني ولا بيشتم مين بس هو بيشتم انا عارفه
= بنت خناس بصحيح لكن فرسه
-اخراااس يا وجه البرص انت
ما اغباك يا نائل ايش ياخي هذا جايبينك فاظه يا عييب الشوم عليك
- ده علي اساس ان قريني هو اللي عمل معاكي الحلقه يعني
الباب خبط.. مش عايزه نفس خاالص اكيد ده بابا
: الشيخ ربيع اهلا يا شيخ اتفضل..
دخل الشيخ وهو ساكت تماما مش ناطق
-معلش يا شيخ احنا شيلنا كل حتجه زي م قولت ف مفيش حاجه تقعد عليها بس بابا عامه جاي في الطريق متقلقش..
الشيخ ربيع بكل هدوء الدنيا في وشه ابتسم وقال " هو مش قرب هو وصل فعلا "
الباب خبط واسلام فتح ده بابا يا جماعه جه ،بصيت للشيخ وانا مبحلقه ابتسم وودي وشه الناحيه التانيه فجأه سمعت نائب بيقول -شكله مش غريب عليا كأني اعرفه قبل كده يا ميمونه ركزي كده
نائل بيقول كده ليه مع ان الشيخ ربيع عارفه من الاول خالص
بابا دخل وسلم ع الشيخ ربيع وقاله كل حاجه تمام مش فاضل غير الخطه ابتسم الشيخ ربيع وقاله بنفس ذات الهدوء المريب بتاعه " والخطه جاهزه يا ابا عامر متقلقش وجند الله هم الغالبون "
بابا هز راسه بيأمن علي كلامه " لعله خير ان شاء الله يا شيخ لعله خير "
فجأه فون بابا رن اشعار رساله
-موبايلي جوه يا راندا ناسيه في الاوضه هاتيهولي معلش
بالفعل روحت اجيبه من جوه فضولي كان اقوي مني وغصب عني فتحت الرساله اول م قريتها شهقت حطيت ايدي علي بوقي عشان محدش يسمعني... " ادي قائمة الطلبات هاتها وانا جاي اديني في السكه ..الشيخ ربيع!! "
لو دي رساله من الشيخ ربيع وهو لسه جاي في الطريق اومال اللي بره ده واقف معانا يبقي مين ؟!؟؟؟!!؟؟
يتبع
أنت تقرأ
اومينيس
Horrorقد يؤدي الفضول احيانا إلي ما لا يحمد عقباه ! فتاه عشرينيه تتسبب باتحاد العالمين معا "الانس والجن " لتمنع كارثه تهدد كلا عالميهم فهل يا تري ستكون الحرب لصالح من ؟!
