كرونيك: 😍😍بداية الحب😍😍

🤔البارت 05🤔

🤔 الحلقة 5 🤔
بداو ارشو عليا في الماء انا فايقة بصح مبغيتش نحل عينيا خايفة من الي يستنا فيا خايفة من الدنيا الي ديما تدي وتجيب فيا خايفة وخايفة عل اختي خايفة نقولها نخسرها ومتصدقنيش خايفة اذا قلتلها نفسدلها فرحتها بالدنيا خايفة من بزاف حوايج سمعت راجلها اقولها حبيبي ندخل ندوش ونخرج ضرك تفيق متتخلعيش بالاك من الستراس نتاع الطيارة ولا العيا برك هو دخل وانا زدت شوي وحليت عينيا ضحكت اختي وحضنتني بقوة وفرحة قلتلها بزربة وريني بيتي قاتلي استناي يخرج سهيل ونتعشاو قلتلها لالا عزيزتي تعبت ندخل نرقد الصباح نحكيو بستها ودخلت كنت متمنية نخبيها في حضني نحميها نهرب بيها بصح الهدرة ساهلة والفعل صعيب دخلت لبيتي متولهتش مامبا اذا مليحة حطيت راسي على لمخدة وانا حايرة قلت في بالؤ هاذ المشكل غلبهم كامل قالهم ارقدو خممت في الف حل كل واحد اصعب من خوه ياربي فرج عليا غير انت الي عالم بلي في بالي عييت اجيني النعاس خايفة من المصير المجهول الي يستناني خايفة نفيق نلقى اختي ماكانش والله ماخممت في روحي خاطر حياتي اصلا معندهاش قيمة اصلا نضت الصباح فتحت لباب بالعقل رحا نحوس على الدوش جيت ندخل لقيتو خارج قالي صباح الخير صفاء قتلو صباح النور وفتت نرعش خرجت لقيت اختي وجدت لفطور قعدت عييت نهز راسي فيه قالها اختك حشامة مهيش زيك ههههه قاتلو هاكامن صغرها ضحك وقال بصحتكم انا نروح للخدمة وانت بيبي قاتلو لالا اليوم جاتني اختي نحب انح منها الوحش قالها اوكي باسها وراح انا تنهدت قلتلها واش يخدم قاتلي طبيب اولاد صغار قلتلها كيفاه هاذا قاتلي واش علاه حايرة قلتلها والو ميبانش حنين قاتلي متعرفيهش راهو مصنع نتاع عاطفة وحنان قلت ياربي الامور ماشية وتصعب عليا اكثر. ....قاطعتني اختي احكيلي على روحك من لي تفارقنا بديت نحكي وهي تبكي على يما والي داراتو فيا وفي روحها قاتلي لازم نحوسو عليها ونعرفو بلاصتها ويني مهما كان هاذي امنا قادر تكون محتاجتنا ومطايشة
قاتلي اختي لازم نخرجك تشوفي لبلاد وتتحي على قلبك لبست روبة حمراء سانتري وخمار اكحل وصباط اكحل وصاك احمر و خرجنا لحقنا البرة قاتلي اختي ياااا نسيت التلفون نرجع نجيبو ونجي جيت هابطة في لي زيسكالي اتعكلت جيت راح نطيح احكمني واحد من لوور هزيت عيني ياريتني ماهزيتها شاب طويل عينيه مارون يسحرو بقيت نتفرج فيه بلا ما نحس بروحي بلي مرقتها فيقني صوتي قالي باردون جبدت روحي وهو راح مزادش كلمة ادا قلبي وعقلي وكلش وراه قلت واش بيك ياصفاء اول مرة تشوفي راجل هاي فيقي بالاك مراحش تزيدي تشوفيه اصلا فرنسا كبيرة امبعد فقت علاه كان هنا ودار اختي مبحذاها حتى دار اخرى لاه اختي عيطت صفاء واشبيك من قبيل نعيط تلفون والو اطلعي قالي سهيل ضرك نجي انا نهبطكم قلتلها لا بيبتي باغية نمشيو وحدنا قاتلي اوكي نشاورو خرجنا مشينا وراتني بزاف بلايص شابين حوسنا وفرحنا استكثرت الفرحة على روحي حسيتها بزاف علي اول مرة نفرح هاك بغيت نبقى غير انا وياها مبغيتش نرجعو لهاذيك الدار هذاك المجرم خفت ياذي اختي رحنا تغدينا شراتلي بزاف صوالح شابين ورجعنا للدار لقينا راجلها يستنى فينا قال واش ا الشابات روحتو هبطت راسي ودخلت لبيتي جاتني اختي قاتلي واشبيك معجبكش سهيل راهو زعف منك وقالي اذا وجودي مقلقها نروح نريح عند دارنا قلتلها لالا الدار دارو مقلقني ماوالو حشمت منو برك قاتلي هكاك قتلو مبغاش يامن قالي حسيتها خايفة ونظرة كره في وجهها سكتت خرجت اختي قفلت الباب وانا ادخلت ندوش وخرجت لبست بيجامة نتاعي ودخلت في فراشي وسييت نرقد جات تصويرة هاذاك الجون في بالي ابدا قلبي يخبط في الميتين هههه سمعت الدقديق في الباب حسبت اختي قلتلها فوتي حبوبة اتحل الباب هزيت راسي لقيتو سهيل اتخلعت