رواية "جزء من الذاكرة " باللهجة الليبية 💖

رواية "جزء من الذاكرة "

هل الحب يدوم ..ام الصداقه ؟؟
((معا الى رحلة النسيان ))
_______
الحلقة 1
انا : اوووف لو بنقعد على الحال هذا كيف بننجح في الإنجليزي؟؟😫
جهينه: أنا قتلك من الاول تعالي أقري معاي عند الابلة .
انا: حتى أنا فكرت بنقرا معاكم ،نشوف ماما قبل!!
جهينة: اليوم عندنا كورس .. لكن تعالي بالوشاح 😂
انا: متقوليش يقروا معاكم ولاد 🤤((بنظرة صدمه))
جهينة: 😂😂مش هلبا غير تعالي تو تشوفي😍
انا: هههه تمام نتلاقوا

                  *  *  *
عند ماما في الحوش ""
ماما: ذكرى _ ذكرى!!
انا: نعم ماماا..
ماما: صكري من تلفون وتعالي ساعديني في الغذاء .
انا: حاضر .
(( مشيت لماماا وفي لحظه صمت وانا نفكر كيف بنقنع ماماا على الحصة ..لو بنحكيلها ان فيه ولاد احتمال تقتلني 😅))

انا: ماماا ...
ماما: احكي شن عندك بلا مقدمات
انا: نبي نطلب منك طلب لكن متردنيش
ماما: وانا نقول خيرك من بكري تسمعي ف الكلام.
انا: انت تعرفي درجاتي في الانجليزي كيف ضعاف.
ماما: باه والمطلوب ؟؟
انا : نبي نمشي الحصه اليوم مع جهينه.
ماما: انت تو جايه تسألي فيا  ؟ولا تعطي ف علم ؟
انا : ازوز😅
ماما :______
انا : ماما ارجوك
ماما : عارفتني ما نرفضلكش طلب
انا : 😘اممواا ياأحلى ام ف الدنيا.

_______
نعرفكم على ماما 💖💖
(( ماما صغيرة في العمر عصبية شوية لكن حنونة اسمها سعاد وزي ما عرفتوا متحبش ترفضلي طلب كوني أنا بنتها الوحيدة ))
                     * * *
مشيت نجري لداري وفتحت  الدولاب قعدت ندور شن نلبس ...ملقيتش حاجه نلبسها بالوشاح .
كوني انا قعدة مش متحجبة .
قعدت سرحانه في الدولاب وقلبت الدار كلها وعلى رنة التلفون ...

انا : الوو جهينه.
جهينه : شن صار معاك ؟؟
انا : كلمت ماماا وقالت اوك.
جهينة : خلاص وتي روحكك نفوت عليكك عندك خمسة دقائق.
انا : خمسة دقائق شن😲؟؟
جهينه : زي ماسمعتي .طوووط طوووط
انا : الو الووو .
((سكرت الخط ف وجهي مش اول مرة ديرها .))
نعرفكم على صديقتي جهينه
"" جهينه صديقتي من الطفولة وأكثر من أي حد نحبها ،اسراري كلها عندها ،هيا بنت وحدة وباقي خوتها ولاد ، بنت طيوبه ، وحلوة ، شخصيتها قوية ،لكن لسانها ديما متبري منها ""😁
______
مشيت جري بسرعه البرق لبست على السريع سروال اكحل وجاكيت بيجي وشاح اسود حسيت روحي مش راضية ع اللبسة ، حايسة ف روحي ابصر كيف !

                   * * *
نعرفكم على نفسي""
((اسمي ذكرى مواليد 2001 , يقولون انا حلوة 😁
شخصيتي عفوية ، وحشومية هلبا ، وحساسه نتأثر بأي شي،  اكيد مع باقي الحلقات تستغربوا ف لبسي ع الاسود ديما ،، انا حياتي اللون هذا 🖤
طبعا انا بنت مااما وبابا وحيدة  دلوعه بعض الشيء
بابا يخدم في السفارة ، حكم ديما مسافر ، حياتي كلها بين حوشنا وحوش خوالي ، مع اني معنديش خوات لكن صحباتي معوضين المكان بالزايد
(جهينه _ اميرة _ رنا ) تو تتعرفوا عليهم مع باقي الحلقات )).

                 * * *
عند جهينة وخوها "بدر"
بدر : انا مش فاضي بيك ، تسحابيني سواق بوك
جهينه : ليسمع 24 ساعه تدهور بينا .
بدر : امتا بتتعلمي الاحترام وتسكتي .
جهينه : تعلمته منك الاحترام خونا ، تبي ترفني ولا؟
بدر : امشي قدام تو يجيك كف ، وانت ديما لسانك اطول منك .
جهينه : بنظرة براءة 😇 بنفوت على ذكرى بتمشي معاي .
بدر : ياااعن .... مرة تانية دوري من يرفعك .
جهينه : غمزتله هدي صاحبتي ذكرى لقتلك عليها .
بدر : هدا لفالحه فيه ((اللسان وقلة الإحسان ))
امشي قوليلها هيا
جهينه : حبيبة القلب😍
بدر : 😡😡"فنص فيها " اقلبي وجهك

             * * *
نزلت جهينه لحوش ذكرى .
كيف حالك عمتي سعاد ان شاءالله باهي ، ناديلي على ذكرى خوي يستنى البرا .
_______
ذكرى : متقوليش خوك بدر بيرفعنا
جهينه : تو حتى يهودي يلي هو .
ذكرى : عارفتني منطيقش فيه خوك ، دمه رزين .
جهينه : هههههه صدقتي فيهاا ، هيا خير مايقلبها علينا .

"ركبنا السيارة وطول طريق ف صمت ،ماتسمعي كان صوت النفس ، لعند ماوصلنا للحصة .."
____
يتبع
للكاتبة :الاء العكش

#نحبكم😘