رواية "جزء من الذاكرة " باللهجة الليبية 💖

رواية "جزء من الذاكرة "

الحلقة 2
وصلنا للحصة كان مكان صغير كيف الدار كنت متحشمة كوني جديدة عليهم سلمت على الابلة كان اسمها ((اسماء)) باين عليها صغيرة في العمر
وكان فيه اثنين ولاد وحد اسمه احمد والتاني محمد .
                          * * *
انا جهينه نبي نعرفكم على شخصيات احمد ومحمد .
طبعا محمد واحمد ، اصدقاء الطفولة قاريين مع بعض من الابتدائي ، شخصية محمد حلوه وقوية جو رسميات وحركات 😎وعصبي لما يكون طايرتله لكن طيب ، طويل شوية ،واسمر فيه شوية من الغرور وهذا لزاد تعلقي فيه اكثر .
اما بالنسبة لأحمد هو شخص عنده كل الناس طيبة وشخص فكاهي يحب يبصر ديما ، ويشبهه ل ذكرى هلبا كأنهم خووت. (سبحان الله)..
ولكن مع كل الفرق في شخصيات الا انهم تجمعهم صلة كبيرة ببعض (صغار العم ).
لدرجه انهم مشهورين بالتوأم المختلف 😅
_________
نرجعوا وين كنا فالحصة **
ابلة اسماء: جتكم طالبة جديدة وفكوني من تلقيحاتكم باش نكمل الدرس بكري اليوم .سمعت يااحمد.
احمد: خيرك ناويتني اليوم .
ابلة اسماء:____
احمد: باهي شن متبيش تقوللنا اسمها !!
ابلة اسماء: بدينا عاد ف الجو الحلو .
احمد: قلت حاجه غلط ....
ابلة اسماء: قوليلهم شن اسمك ،هذا تو معاش يسكت
انا : اسمي ذكرى (بصوت هادئ رقيق 😇)
احمد: شن اسمك ؟؟.. ذكار النخل 😂
محمد: حتى من خطها بالوات هههههه
جهينه : هههههه
انا حسيت روحي كان نلقى نرد عليهم ونسكتهم لكن في شيء يمنعني ،مش متعودة ع وضعهم .
ابلةاسماء: هههه احمد !!بطل تلقيح .
انا بصوت خافض شن من اولها تلقيح !!😒
جهينة: هههه من اليوم تعودي على الوضع .
احمد: يااابلة شوفيهم كيف يضحكوا ، بعدين قولي احمد بطل ، هذاكا انا الله غالب عليا .
ابلة اسماء: حشمتونا مع البنت ، قصدي شن نوقف على الدرس ولا كيف !
محمد: كملي الدرس ابلة.
*"جهينة طبعا في عالم ثاني مركزة في كل حرف يقوله محمد" ((احببتك لدرجة اني هنا وقلبي حيث انت)).
واستمرت الحصة على الوضع هذا ،لعند ماتم وقت الحصة 5:30م
انا: هيا امتا بنروحوا عندنا امتحان ؟
جهينة: امتحان شن !
انا: إمتحان رياضيات ياحلوه
جهينه: معنديش نيه نقرا بكل اووف .
انا: اصلا جوك يوم مش عاجبني خيرك ؟
جهينة: حاسة روحي تعبانه شوية.
انا: متأكدة مافيش حاجة تانية ؟
جهينة: تعبانه من قلة النوم مش راقدة .
((مالم يحكي يبكي💔...من باب الواقعية لاحياة تخلو من الهموم ))
انا: شن صار كلمتي بوك؟يروح بينا
جهينة: كلمت بدر من بكري😁
انا: بالحق ولاتبصري !
جهينة: اعصابك مرت خوي المستقبلية
انا: بعيد السوء عليا.
جهينة: حصلتي زيه ،شن ناقصه خوي ماشاءالله عليه😍
انا: احممم معرفتكش الصراحه .
تعالو نحكيلكم علاش بدر منحباشي انا عندي طبع شخص من اول مانشوفه نحكم عليه زي ما يقولوا ناس زمان ((ربيع من فم الباب يبان))، مع انه شخص كويس ماشفت منه شي ، لكن دمه رزين ماينهضمش.😁
______
(( اصعب شعور عندما ترى صديقك في قمة الوجع ولا تعرف ماذا تفعل..!! سلاما على قلبك صديقتي))
قعدنا نهدرزوا انا وجهينة وضحكنا وكأن اول مرة نضكحوا فيها مع اني حاسة انه جهينة مش على بعضها ومع هذا حاولت نغيرلها جوها، لصاير معاها صاعب مع اني ماعمريش جربته الشعور لكن حسيت بها حاولت نفهمها لكن جهينة غامضة تحاول انها تكون قوية ولما تشوفه تضعف قدامه ، انا ماعمريش عشت او جربت تجربة الحب من قبل لكن هكا يقولوا((هذا هو الحب الاعمى))
وهذا مايسمى الحب من طرف واحد، تظل تحبس هذا الحب والالم في قلبها الصغير ❤
______
*اصعب شعور انك تكتم جرح كبير فيه حب عميق*

* ومثل ماتعدي الايام بتعدي المشاعر والاحزان وبتعدي كل الفترات اللي اوجعت قلبك *

*لكل قلب حكاية ليس بشرط ان يكون لكل القلوب نفس الشعور احدهما في قمة السعادة والاخر في قمة الالم 💔*
_______
ماذا يحدث لصديقتنا جهينة؟؟
وماذا عن احمد الذي أخذت قلبه ذكرى من اول نظرة ؟؟