“ANG NAKATAGONG KAYAMANAN”
Isang matandang babae ang walang kaalam-alam na nanalo sya sa lotto ng PHP 50 lillion. Ang problema ng kanyang mga kasambahay ay paano nila sasabihin sa kanya sa kadahilanang may sakit siya sa puso at matanda na! Naisip nilang imbitahan ang kanilang Paroko dahil kaibigang matalik ito ng kanilang lola at sya na ang magbalita sa maingat na paraan. Gayun na nga ang kanilang ginawa, isang gabi ay dumalaw ang pari sa bahat at kinausap ang matanda: “Lola, kamusta na ang lagay ninyo? “.. “Mabuti naman po padre..”- Sagot ng matanda. AT nagkwentuhan sila ng matagal. Nang mapansin ng pari na nalilibang na at relax na ang matanda ay tinanung niya ito: “Lola kung sakaling manalo kayo ng Php 50 million sa lotto … anung gagawin ninyo sa pera? “Aba padre…” sabi ni Lola . “kung ako ang mananalo ng 50 million sa lotto ay ibibigay ko ang kalahati sa simbahan .” nang marinig ito ng pari ay inatake siya sa puso at namatay! Hehe… sino nga ba ang hindi hihimatayin sa gayong kalaking kayamanan, hinuhukay, sinisisid, nilalakbay ng malayo. Ngayon siguro mas madali: tumaya ka lang sa lotto, sumali sa contest ng eat bulaga o showtime, tumaya sa sugal…. Instant yaman ka na! Ang talinhaga ng nakatagong kayamanan at mamahaling perlas ay nagsasabi sa atin na dapat ay handa nating isakripisyo ang lahat mapasa atin lamang ang kayamanang nais nating makamtan. Hinalintulad ito ni Jesus sa “kaharian ng Diyos”. Kung kaya nating magsakripisyo para sa kayamanang makamundo at nabubulok at nasisira ay dapat gayun din sa mga bagay na espiritwal. Ang “kaharian ng Diyos” ay ang pagharian tayo ng kanyang biyaya at mabuhay bilang mga tapat niyang anak. Dapat ay matuto tayong magpahalaga sa mga bagay na dapat unahin sa ating buhay. Kapag ang pagsisimba ay ipinagpapalit mo sa “mga lakad” mo sa araw ng Linggo ay hindi ka pa handang PAGHARIAN NYA. Kapag sinasabi mong wala akong oras magdasal o gumawa ng mabuti sa iba ay hindi mo pinahahalagahan ang Kaharian ng Diyos. Kpag mas mahalaga sa iyo ang mga bagay na materyal kaysa ispiritwal… kapag labis mong pinagtutuunan ng pansin ang iyong katawan at mapabayaan mo ang iiyong kaluluwa ay malayo ka pa sa paghahanap sa tunay na kayamanan. Ano ba ang tinuturing mong kayamanan ngayon sa buhay MO?? KUNG NASAAN ANG KAYAMANAN MO…. NAROROON ANG IYONG PUSO..
